U Rwanda rwatanze isomo ku ikoreshwa rya Biogaz mu magereza

Yanditswe na Cyprien Niyomwungeri
Kuya 19 Gicurasi 2017 saa 08:02
Yasuwe :
0 0

Abayobozi b’inzego z’amagereza muri Afurika bitabiriye inama y’iminsi itanu yaberaga i Kigali, kuri uyu wa Gatanu basuye gereza eshatu zo mu gihugu, basobanurirwa imikorere yazo by’umwihariko banyurwa n’ikoranabuhanga rya Biogaz rifasha mu kugabanya ibicanwa no gusigasira isuku.

Kuva ku wa 15 Gicurasi kugera 18 Gicurasi, u Rwanda rwakiriye Inama ya kane y’Ihuriro Nyafurika ry’Amagereza (African Correctional Services Association, ACSA), aho abayitabiriye bunguranye ibitekerezo by’uburyo inzego z’amagereza ku mugabane wa Afurika zatera imbere.

Abayobozi bitabiriye iyi nama bakaba bigabanyijemo amatsinda atatu basura gereza zitandukanye zirimo; iya Nyagatare ifungirwamo abana, iya Ngoma y’abagore n’iya Nyanza ifite umwihariko wo kuba ifungiwemo abanyamahanga 15 barimo abanya-Sierre Leone batandatu.

Muri gereza ya Nyanza, aba bayobozi basuye imfungwa z’abanyamahanga zihafungiye, basobanurirwa uko Biogaz ifasha mu kubungabunga isuku no kugabanya ibicanwa ndetse banerekwa ibikorwa by’ubukorikori bikorwa n’imfungwa n’abagororwa.

Umuyobozi Mukuru w’urwego rw’imfungwa n’abagororwa muri Namibia, Raphael Hamunyela, yabwiye itangazamakuru ko basuye Kigali bakanyurwa n’isuku bahabonye bityo bakifuza no kugera muri gereza ngo barebe uko u Rwanda rwashoboye kugezayo uwo muco, bityo barwigireho.

Yagize ati “Nk’abayobozi b’inzego z’imfungwa n’amagereza muri Afurika yose turashaka kwigiranaho, u Rwanda ni ahantu twese dukeneye kuza tukiga kuko ibirimo kuba mu Rwanda nta handi birimo kuba ku Isi.”

Yongeyeho ko yasuye inzego nyinshi z’imfungwa n’abagororwa, amagereza, ariko atigeze abona gereza n’imwe ifite isuku nk’izo mu Rwanda.

Hamunyela yatangaje ko Namibia ifite abagororwa 4000 gusa bafungiye muri gereza 13 ariko nta nimwe ifite isuku nk’iya Nyanza ifungiyemo abagera ku 7000 yonyine. Ibi kimwe n’imikoreshereze ya Biogaz igira uruhare runini muri iyi suku akaba abisubiranye iwabo.

Ati “Twasobanuriwe byimbitse ku bijyanye na Biogaz, ikintu kizadufasha kugabanya amafaranga dukoresha mu bicanwa. Ni ikintu cyiza nsubiranyeyo kizadufasha gucunga neza amagereza yacu.”

Umuyobozi w’urwego rw’imfungwa n’abagororwa mu Rwanda (RCS), CGP George Rwigamba, yatangaje ko aba bashyitsi bemeye ko bazaza kwigira ku Rwanda ibijyanye na Biogaz.

Yagize ati “Kuko duhana ibitekerezo tukanigira ku bandi nabo bakatwigiraho, baje kureba ikintu cya Biogaz ntabwo ahandi ku magereza bayigira nitwe tuyigira. Igabanya ibirenze kimwe cya kabiri cy’ibicanwa bigatuma turengera ibidukikije kandi tukagira n’isuku. Bemeye ko bazaza bakiga nabo bakabikora iwabo.”

Iyi nama yari ifite insanganyamatsiko igira iti “Kubaka urwego rw’imfungwa n’abagororwa rukora kinyamwuga muri Afurika.”

Raphael uyobora urwegpo rw'amagereza muri Namibia(hagati)
Mukono, Umuyobozi wa Gereza ya Nyanza
Umuyobozi w’urwego rw’imfungwa n’abagororwa mu Rwanda (RCS), CGP George Rwigamba,

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244