Kwamamaza

U Rwanda rwasinye amasezerano azatuma 70% by’Abanyarwanda batunga amashanyarazi

Yanditswe kuya 12-10-2016 saa 19:56' na Cyprien Niyomwungeri


Guverinoma y’u Rwanda yihaye intego yo gukorana n’abikorera mu rwego rwo guteza imbere ubukungu by’umwihariko kugeza amashanyarazi ku baturarwanda, aho nibura mu mwaka wa 2018 ingo zigera kuri 70% zizaba zifite amashayanyarazi.

Ku gicamunsi cyo kuri uyu wa Gatatu tariki 12 Ukwakira, ikigo cy’igihugu gishinzwe guteza imbere ingufu (EDCL), cyasinyanye amasezerano n’amasosiyete yigenga 13 atanga ingufu zikomoka ku mirasire y’izuba kugira ngo muri uriya mwaka 22% by’ingo z’abaturarwanda zizabe zikoresha ariya mashanyarazi.

Aya masosiyete arimo 12 akomoka mu Rwanda, yiyongera ku yandi ane asanzwe akorera mu gihugu ariyo Mobisol, Neseltec, Nots na Ignite Power.

Umuyobozi mukuru w’ikigo cy’igihugu gishinzwe guteza imbere ingufu, Kamanzi Emmanuel, yavuze ko aya masezerano azatuma Guverinoma y’u Rwanda igera ku ntego yayo yo kugeza amashanyarazi akomoka ku zuba ku ngo zigera kuri 22% n’adakomoka ku zuba ku ngo zigera kuri 48% muri 2018.

Akomeza avuga ko bizagira inyungu ikomeye ku baturage kuko ukwiyongera kw’aya masosiyete kuzatuma agabanya ibiciro bityo abatuye mu bice bigoranye kugezamo amashanyarazi akabageraho.

Yagize ati “Muri aya masosiyete ibiciro biratandukanye, ibikoresho bitandukanye bizatuma abaturage bakeneye aya mashanyarazi bagira amahitamo menshi kandi bagahendukirwa kuko hari amapiganwa menshi.”

Ubusanzwe ingufu z’amashanyarazi aturuka ku mirasire y’izuba zari mu ngo zingana n’ibihumbi 47, amashuri 260 amavuriro 163. Uyu mwaka biteganyijwe ko uyu mubare uzagera ku ngo 255, gusinya aya masezerano byerekana ko iyi ntego izagerwaho nta mbogamizi.

Muri aya masezerano Leta izafasha amasosiyete kumenyekanisha ibikorwa no kureba uko serivisi zigera ku baturage zikora neza, kuvanaho imisoro kugira ngo umuturage ahendukirwe. Iranateganya kuyafasha kubona amafaranga afite inyungu ntoya, byose bigamije ko umuturage adahendwa.

Amasosiyete akwirakwiza ingufu zikomoka ku zuba yemeza ko uyu ari umwanya babonye wo gutanga umusanzu wabo ku ntego Guverinoma y’u Rwanda yihaye kuko ahatari amashanyarazi n’iterambere rigorana.

Umuyobozi wa Zola Rwanda ishami rya Off Grid Electronic imwe mu zasinye amasezerano, Anthony Mburu, yavuze ko bishimiye kuba bamwe mu bazafasha u Rwanda kugera ku ntego zo kugira amashanyarazi arambye.

Yagize ati “Uyu munsi abantu batatu kuri bane mu Rwanda ntabwo bafite amashanyarazi, ubu bufatanye na EDCL buzabihindura. Mu myaka nk’itatu urugo rumwe muri eshanu ruzaba rufite amashanyarazi meza kubera ubu bufatanye.”

Muri rusange kugeza ubu Abanyarwanda bafite umuriro w’amashanyarazi ni 24.3% gusa, Guverinoma y’u Rwanda ntihwema kuvuga ko mu myaka ibiri isigaye abagera kuri 70% bazaba bafite amashanyarazi binyuze mu ngomero zizubakwa, gukangurira abaturage gukoresha ingufu zikomoka ku zuba n’ibindi.

Umuyobozi mukuru w’ikigo cy’igihugu gishinzwe guteza imbere ingufu, Kamanzi Emmanuel ahererekanya amasezerano n'abayobozi b'ibigo bitanga umuriro ukomoka ku mirasire y'izuba
Hamuritswe ibikoresho bitanga amashanyarazi akomoka ku mirasire y'izuba

Amafoto: Mahoro Luqman


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved