U Rwanda rwashyikirije Sierra Leone umugororwa wayo wari ufungiwe i Nyanza

Yanditswe na Evariste Nsengimana
Kuya 9 Nyakanga 2018 saa 09:47
Yasuwe :
0 0

Urwego rw’Imfungwa n’abagororwa mu Rwanda, RCS, kuri iki Cyumweru rwarekuye runacyura umugororwa w’Umunya-Sierra Leone, Alliue Musa Kondewa, wari ufungiye mu Rwanda kubera ibyaha by’intambara yahamijwe.

Mu 2009 nibwo Musa Kondewa n’abandi banya-Sierra Leone umunani barimo Issa Sesay, Morris Kallon, Alex Tamba Brima, Santigie Borbor Kanu, Ibrahim Bazzy Kamara, Augustine Gboa, na Moinina Fofana, boherejwe kurangiriza ibihano byabo mu Rwanda.

Nyuma yo kurangiza 2/3 by’igihano cy’imyaka 20 yakatiwe, akanitwara neza muri gereza, urukiko rwamufunze rwamurekuye by’agateganyo, maze Urwego rw’Imfungwa n’abagororwa mu Rwanda (RCS) rumucyura iwabo.

Mu itangazo RCS yashyize ahagaragara, yemeje ko uyu mugororwa Alliue Musa Kondewa wari afungiye muri Gereza ya Nyanza yafunguwe by’agateganyo kuri uyu 8 Nyakanga 2018, aho yasubijwe iwabo muri RwndAir, aherekejwe n’Umuvugizi wa RCS, SSP Sengabo Hillary.

SSP Hillary yagize ati “Yakiriwe neza iwabo, aremeza ko mu Rwanda yahaboneye inyigisho zamufashije guhinduka umuturage mwiza. We na bagenzi be 8 bagejejwe mu Rwanda kuwa 31 Ugushyingo 2009. Yahamwe n’ibyaha by’intambara no gushyira abana bato mu gisirikare. Yakatiwe n’Urukiko Rwihariye rw’Umuryango w’Abibumbyye Rwashyiriweho Sierra Leone, igifungo cyimyaka 20, yafashwe ku wa 29 Gicurasi 2003.”

Kondewa ni muntu ki?

Kondewa yahoze ari umuvuzi gakondo ukomeye wo mu bwoko bw’aba-Kamajors buturuka mu ba-Mende, akaba n’umusirikare ukomeye mu mutwe wa gisirikare washinzwe mu yabaye muri icyo gihugu hagati ya 1991 na 2002.

Uwo mutwe Kondewa yarwanagamo warwanyaga inyeshyamba zitavugaga rumwe na Perezida Ahmed Tejan Kabbah, wari utorewe kuyobora iki gihugu ku nshuro ya gatatu.

Kondewa wavukiye mu Karere ka Bo, yashikirijwe ubutabera bw’icyo gihugu mu 2004 hamwe n’abandi bagabo barimo uwitwa Moinina Fofana na Samuel Hinga Norman, bose bashinjwa ibyaha by’intambara n’ibyibasiye inyoko muntu.

Mu 2008, Urukiko rwihariye ku kuburanisha ibyaha byakorewe mu ntambara muri icyo gihugu, rwahamije Kondewa bitanu birimo iby’intambara n’ibyibasiye inyoko muntu, rumukatira gufungwa imyaka 20.

Mu 2009 nibwo we na bagenzi be umunani boherejwe kurangiriza ibihano byabo mu Rwanda, bafungirwa muri Gereza ya Nyanza.

Kondewa abaye umugororwa wa Kabiri w’umunya-Sierre Leone ufunguwe n’u Rwanda nyuma ya Moinina Fofana warekuwe mu 2015.

Kondewa ku Kibuga Mpuzamahanga cy'Indege cya Kigali
Kondewa yabanje kuganira na Komiseri Mukuru wa RCS, George Rwigamba
Ubwo SSP Sengabo yashyikirizaga ubuyobozi bw'urukiko muri Sierra Leone uyu mugororwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza