Kwamamaza

U Rwanda rwashyigikiye umukandida wa Amerika ku buyobozi bwa Banki y’Isi

Yanditswe kuya 1-09-2016 saa 11:56' na Rabbi Malo Umucunguzi


Perezida Paul Kagame na Patrice Talon wa Bénin bagaragaje ko ibihugu byombi bishyigikiye kandidatire ya Dr Jim Yong Kim uheruka gutangwa na Leta Zunze Ubumwe za Amerika ku mwanya wa Perezida wa Banki y’Isi, bombi bitsa ku bushobozi yagaragaje mu myaka itanu amaze ayobora iyi banki.

Dr Jim usanzwe ari umuhanga mu bijyanye n’ubugenge, kuwa 01 Nyakanga 2012 nibwo yatorewe kuba Perezida wa 12 wa Banki y’Isi, mbere akaba yari Perezida w’Ishuri rikuru rya Dartmouth, rimwe mu mashuri akomeye muri Leta Zunze Ubumwe za Amerika.

Ni n’umwe kandi mu bashinze umuryango ‘Partners in Health’ mu Rwanda umenyerewe nk’Inshuti mu Buzima, ndetse mbere yanayoboye agashami gashinzwe kurwanya Sida mu Ishami ry’Umuryango w’Abibumbye ryita ku buzima.

Mbere y’uko Perezida Patrice Talon wa Bénin yurira rutemikirere ngo asubire i Cotonou nyuma y’uruzinduko rw’iminsi itatu yari amaze mu Rwanda, yagiranye ikiganiro n’abanyamakuru aho we na Perezida Kagame batangaje ko ibihugu byombi bigifitiye icyizere Dr Jim n’ubundi wari watanzwe na Amerika kuri manda ya mbere.

Muri iki gihe Umunyamabanga wa Leta muri Minisiteri y’Igenamigambi n’Iterambere muri Bénin, Abdoulaye Bio Tchane , niwe ukuriye ihuriro rya ba Guverineri b’Ikigega Mpuzamahanga cy’Imari, IMF, kimwe n’aba Banki y’Isi muri Afurika.

Perezida Kagame yavuze ko Dr Jim Kim yemerewe indi manda ndetse Leta Zunze Ubumwe za Amerika zamutanzeho Umukandida. Kandidatire ye yemejwe mu itangazo ryashyizwe ahagaragara kuwa 25 Kanama.

Perezida Kagame yagize ati “Ku byo nabonye kandi n’u Rwanda muri rusange, mu buryo bwagutse, banki yakoze akazi gakomeye ishinzwe, by’umwihariko kajyanye n’iterambere igihugu cyacu gishyize imbere. Kandi by’umwihariko Perezida Dr Jim Kim, urangije iyi manda, afite amateka akomeye mu bijyanye n’iterambere kandi yagaragaje ubushobozi bwo kugendera ku byo yakoze mbere mu gutunganya ibikeneye gukorwa.”

Perezida Kagame yavuze ko afata Dr Jim Kim nk’umuhanga kandi ushoboye, unafite ubushake bwo gukora akazi gakenewe kuri Banki y’Isi bijyanye n’iterambere ibihugu biri mu nzira y’amajyambere bikeneye.

Ati “Kubw’ibyo urumva ko tumushyigikiye, mbere na mbere tumushyigikiye nk’u Rwanda, ariko bijyanye n’ibiganiro nagiranye na Perezida [Patrice Talon], ibitekerezo ntibitandukanye n’ibyanjye.’’

Perezida Talon nawe yahamije ko akurikije ubushake n’ubushobozi Dr Jim Kim yagaragaje, akwiye icyizere cya Bénin nk’igihugu cyungukira mu mishinga ya Banki y’Isi.

Ati “Ni umwanya wo kugaragaza ko dushyigikiye kandidatire ye kuko yagaragaje ko ari umufatanyabikorwa mwiza kuri twe.’’

Mu itangazo guverinoma y’u Rwanda yashyize ahagaragara, yavuze ko izirikana ibyagezweho na Dr. Kim mu myaka ine ishize, ndetse ikaba yaratanze inkunga mu mishinga inyuranye y’ingenzi ku Rwanda n’umugabane muri rusange.

Rigira riti "Dr. Kim yagize Banki y’Isi umufatanyabikorwa ubereye amahitamo y’ibihugu bya Afurika. Iyi Banki yatanze ubufasha mu iterambere, mu nzego z’ingenzi muri Afurika zirimo ubuzima, ingufu, ibikorwa remezo, guteza imbere abaturage, iterambere ry’imijyi, ibidukikije, ubuhinzi n’uburezi.’’

‘‘Ku buyobozi bwa Dr. Kim, Banki y’Isi yagaragaje ubushake mu kwimakaza ituze n’iterambere mu karere k’Ibiyaga Bigari binyuze mu mishinga ihuriza hamwe guverinoma n’abikorera. Iyi banki kandi yafashe iya mbere mu gushakira igisubizo icyorezo cya Ebola mu Burengerazuba bwa Afurika,’’

Dr Jim Yong Kim yavukiye i Seoul muri Korea y’Epfo mu 1959 ariko ajya gutura muri Leta Zunze Ubumwe za Amerika hamwe n’umuryango we ubwo yari afite imyaka itanu gusa.

Ku buyobozi bwe [nibura nko mu 2016 honyine], Banki y’Isi yahaye u Rwanda inguzanyo ya miliyoni $95 yo kubaka ibikorwaremezo mu mijyi itandatu yunganira Kigali.

Hari kandi inguzanyo ya miliyari 15 Frw yo guteza imbere uburezi binyuze mu bushakashatsi n’amahugurwa, na miliyoni $11 azakoreshwa mu kuzamura Umujyi wa Muhanga mu bikorwaremezo birimo imihanda ya Kaburimbo no gutunganya za ruhurura.

Hashize imyaka isaga 70 Leta Zunze Ubumwe za Amerika arizo zitanga Umuyobozi wa Banki y’Isi nk’igihugu gishyiramo amafaranga menshi kurusha ibindi, mu gihe u Burayi aribwo buyobora Ikigega Mpuzamahanga cy’Imari, IMF.

Banki y’Isi ifite ibigega bibiri aribyo Banki Mpuzamahanga y’Iterambere (International Bank for Reconstruction and Development, IBRD) n’Ikigega Mpuzamahanga Gitsura Amajyambere, (International Development Association, IDA).

Kuva nibura mu 2006 kugeza mu 2015, Leta Zunze ubumwe za Amerika zatanze miliyari $ 2.9 muri IBRD, ibyo bikaba biyihesha uburenganzira bwo gufata ibyemezo ku kigero cya 16.56%, mu gihe muri IDA ho kuva mu 1996 kugeza mu 2012 yatanze miliyari $ 13.4 biyihesha uburenganzira bwo gufata ibyemezo ku 10.38%.

U Buyapani nibwo buyigwa mu ntege na miliyari $2 kuva 2006-2015 muri IBRD (7.16%) na miliyari $3.3 hagati ya 1991-2012. (8.44%).

Kugira ngo atangire kuyobora Banki y’Isi abanza kwemezwa n’Inama y’Ubutegetsi ya Banki y’Isi igizwe n’abantu 25, akemezwa hejuru ya 85%.

Dr Jim Yong Kim asanzwe ayobora Banki y'Isi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved