Kwamamaza

U Rwanda rwashyigikiye kandidatire ya Amina Mohamed watanzwe na Kenya muri AU

Yanditswe kuya 10-10-2016 saa 07:12' na Rabbi Malo Umucunguzi


Guverinoma y’u Rwanda yagaragaje ko ishyigikiye kandidatire ya Minisitiri w’Ububanyi n’Amahanga wa Kenya, Amina Mohamed, watanzwe n’igihugu cye nk’umukandida ku Buyobozi bwa Komisiyo y’Umuryango wa Afurika Yunze Ubumwe, AU.

Kuwa Mbere tariki 3 Ukwakira nibwo Perezida Uhuru Kenyatta yatangaje ko bamaze gutanga Mohamed ho umukandida, kandi abona afite ubushobozi buhagije bwo kuzuza inshingano ze, mu gihe yaba atowe n’abakuru b’ibihugu 54 bigize AU, mu Nteko Rusange izaterana muri Mutarama, ku cyicaro cy’uyu muryango i Addis Ababa muri Ethiopia.

Ni amatora yo gusimbuza Umunyafurika y’Epfo Nkosazana Dlamini-Zuma, umaze imyaka ine ayobora Komisiyo ya AU kuva mu 2012, ariko udashaka indi manda nubwo ayemererwa n’amategeko.

Minisitiri w’Ububanyi n’Amahanga w’u Rwanda, Louise Mushikiwabo, yabwiye The EastAfrican ko igihugu cye gishyigikiye Mohamed, bivanaho ibyatekerezwaga ko gishobora gutanga umukandida hagati ya Dr Donald Kaberuka uheruka gusoza imyaka 10 nka Perezida wa Banki Nyafurika Itsura Amajyambere cyangwa Dr Richard Sezibera nawe wasoje imyaka itanu nk’Umunyamabanga Mukuru w’Umuryango wa Afurika y’u Burasirazuba, EAC.

Ati “Ni umugore tubona ukwiye uyu mwanya, kandi ni umukandida u Rwanda rushyigikiye cyane. Afite ubushobozi n’ubunararibonye budasanzwe muri dipolomasi n’ubuyobozi, umutima n’imitekerereze mizima ku bintu byihariye bireba umugabane wacu kimwe n’uruhare rwa Afurika mu rwego mpuzamahanga.’’

Amina Mohamed w’imyaka 55 yakoze inshingano zitandukanye zirimo guhagararira igihugu cye mu Muryango w’Abibumbye i Genève, Umunyamabanga Mukuru n’Umuyobozi Nshingwabikorwa w’Ishami ry’Umuryango w’Abibumbye rishinzwe Ibidukikije, i Nairobi.

Byitezwe ko azaba ahatanye n’abandi bakandida bazatangwa n’utundi turere tugize Afurika, akagira amahirwe yo gutorwa mu gihe ibihugu bya Afurika y’u Burasirazuba byaba byiyemeje kumujya inyuma.

U Rwanda na Kenya biramushyigikiye, ariko nka Uganda na Tanzania ntibiratangaza uruhande baherereyeho.

Minisitiri w’Ububanyi n’Amahanga wa Kenya, Amina Mohamed

Umunyamabanga Uhoraho muri Minisiteri y’Ububanyi n’Amahanga ya Uganda, James Mugume, yatangaje ko iki gihugu kizashyigikira umukandida bitewe n’uwo akarere kazemeranyaho hagati ya Mohamed na Fowyiso Yusuf Haji Adan wo muri Somalia.

Biteganyijwe ko abakandida bazahatanira imyanya yose uko ari 10 muri Komisiyo ya AU bazamenyekana bitarenze kuwa 14 Ukwakira 2016.

Gutanga abakandida bashya byafunguwe muri Kanama nyuma y’uko mu Nteko Rusange ya AU yabereye i Kigali muri Nyakanga, habuze umukandida ugira bibiri bya gatatu by’amajwi yose hamwe nk’uko biteganywa n’itegeko.

Abiyamamazaga bari Minisitiri w’Ububanyi n’Amahanga wa Botswana, Pelonomi Venson-Moitoi; Minisitiri w’Ububanyi n’Amahanga wa Guinea Equatorial, Agapito Mba Mokuy na Wandira Kazibwe wigeze kuba Visi Perezida wa Uganda utaziyamamaza kuri iyi nshuro.

Byitezwe ko Mohamed azaba ahanganye na Mokuy uhagarariye Afurika y’u Burengerazuba (Ecowas), Adan wo muri Somalia na Moitoi warushaga abandi amajwi mu matora yo muri Nyakanga, uri gusunikwa na Afurika y’Amajyepfo (SADC) kuko Dlamini Zuma ukomoka muri icyo gice atayoboye manda ya kabiri yari yemerewe kwiyamamariza.

Undi mukandida wo muri ECOWAS nawe uhanzwe amaso ni Umunya-Senegal ufite ubunararibonye muri Politiki ya Afurika, Abdoulaye Bathily, ubu ni Intumwa y’Umunyamabanga Mukuru w’Umuryango w’Abibumbye muri Afurika yo Hagati.

Côte d’Ivoire, Nigeria na Senegal baherukaga kurangaza imbere ibindi bihugu by’uwo muryango bisaba ko amatora yageragerejwe mu Rwanda yasubikwa kuko nta mukandida byabonaga ushoboye muri batatu bahatanaga.

Muri Gicurasi, Perezida Macky Sall wa Senegal na Muhammadu Buhari wa Nigeria bashimangiye izo mpungenge, ndetse muri icyo gihe batanze kandidatire ya Bathily ariko ntiyakirwa kuko gutanga abakandida byari byararangiye.

Minisitiri w'Ububanyi n'Amahanga w'u Rwanda mu nama ya AU iheruka kubera i Kigali

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved