Kwamamaza

U Rwanda rwashimwe muri raporo y’uko uburezi buhagaze ku Isi ruranakeburwa

Yanditswe kuya 6-09-2016 saa 19:58' na Ntakirutimana Deus


Raporo y’ishami rya Loni rishinzwe Uburezi, Umuco na Siyansi(UNESCO) y’uko uburezi buhagaze ku Isi mu mwaka wa 2016, yagaragaje ko mu Rwanda bwateye imbere ugereranyije n’ibindi bihugu,ariko irukebura mu nzego zitandukanye.

Iyi raporo yagendeye ku ntego 17 z’iterambere rirambye (SDGs), ariko yibanda ku burezi nk’inkingi ya mwamba mu gihe buramutse buteye imbere bwatuma n’izindi ntego zose zigerwaho kuko akenshi kutagerwaho biterwa n’ubumenyi buke n’amikoro.

Mu Rwanda umubare w’abana bagejeje igihe cyo kujya ku ishuri babona uburezi bw’ibanze bagera ku kigero cya 98%. Icyo kigereranyo kiri hejuru ugereranyije n’ibihugu bikennye byo muri Afurika biri kuri 50%.

Mu minsi yashize abageze igihe cyo kwiga babonaga uburezi bw’ibanze bavuye kuri 72.6% muri 2000 bagera kuri 96.5 muri 2012. Nibura abanyeshuri 78.6% barangizaga amashuri abanza muri 2012 mu gihe mu 2000 bari 22%.

Muri rusange abana basaga miliyoni 25 ku Isi ntibabasha kugana ishuri.Mu bihugu bikennye abagera kuri 30% bavuka mu miryango ikennye ntibigera bagana ishuri.

Iyo raporo yerekana ko inzira ikiri ndende mu bihugu bya Afurika usanga byifata ku bijyanye no gushora amafaranga mu burezi.

Inzobere mu ibarurishamibare no gusesengura politiki muri UNESCO, Nicole Bella yavuze ko ibihugu bya Afurika bitifuza gushora imari mu burezi, kubera ko birufata nk’urwego rutinjiriza amafaranga igihugu, bigatuma barugenera ingengo y’imari nto.

Yavuze ko uburezi bwo mu bihugu bya Afurika yo munsi y’ubutayu bwa Sahara byugarijwe n’umubare munini w’abana bata ishuri ndetse n’umubare muto w’ab’igitsina gore biga muri za kaminuza.

Nicole yashimye u Rwanda aho rugeze anarukebura ku bijyanye no guhagurukira ikibazo cy’abanyeshuri barangiza batazi gusoma, ndetse n’ibijyanye n’ireme ry’uburezi rigishidikanywaho ku buryo leta ishobora kubura abakozi kandi hari abarangije mu cyiciro ibashakamo.

Ikibazo cy’ubusumbane bw’imishahara hagati y’abakozi ba Leta usanga bigira ingaruka ku burezi bw’abana babo, aho umwana wa Minisitiri ashobora kwiga mu ishuri ryiza mu mahanga, uwa mwarimu akiga mu ishuri rikibura ibikoresho nkenerwa.

Minisitiri w’Uburezi Dr Musafiri Papias Malimba yavuze ko u Rwanda rudahagaze nabi ku bijyanye n’ibiri muri iyo raporo, kuko biri no mu byatumye u Rwanda rujya mu bihugu bine ku Isi byamurikiwemo iyo raporo.

Ati “ Kuba bahisemo u Rwanda si impanuka, ni uko u Rwanda rwitwaye neza mu ntego z’ikinyagihumbi zirimo iyarebaganaga n’uburezi kuri bose. U Rwanda ruhagaze neza kuri 98% ku ntego yo kugeza uburezi bw’ibanze kuri bose, mu gihe ku yindi migabane mu bihugu bikennye hari abakiri hasi ya 50%.”

Minisitiri Musafiri yavuze ko aho u Rwanda rudahagaze neza ruzakomeza kongeramo imbaraga.

Ati “ Tugomba gukomeza kwita ku kugeza uburezi kuri bose n’uburezi bufite ireme ariko tureba ngo ‘abantu basohoka mu byiciro bitandukanye by’uburezi, ubumenyi bakuyemo babukoresha gute mu gutanga umuti ku bibazo babona muri sosiyete Nyarwanda?’.”

Yongeyeho ati “ Icya kabiri gukomeza gushyigikira uburezi budaheza twita ku burezi butandukanye, burimo ubw’umwana w’umukobwa n’ubw’abafite ubumuga.”

Mu bibazo byagarutsweho, Dr Musafiri yabajijwe ku bijyanye n’ireme ry’uburezi mu Rwanda n’uko rihagaze.

Yasubije ko hari intambwe u Rwanda rwateye mu guharanira uburezi bufite ireme, rwinjiza ikoranabuhanga mu burezi n’izindi ngamba zitandukanye zagiye zifatwa, ariko asaba abaterankunga n’abikorera muri rusange kunganira leta ngo iryo reme rikomeze kugerwaho ku kigero gikenewe.

Umuhuzabikorwa w’amashami ya Loni mu Rwanda, Lamin Manneh yavuze ko leta y’u Rwanda ikomeje kugaragaza ubushake mu gushyigikira uburezi, ariko ko bikwiye ko amashuri afasha abanyeshuri gusubiza ibibazo bitandukanye biri mu muryango nyarwanda.

Umunyamabanga wa Leta ushinzwe amashuri abanza n'Ayisumbuye, Olivier Rwamukwaya na Minisitiri w'Uburezi, Papias Musafiri Malimba
Abayobozi mu nzego zitandukanye zifite aho zihuriye n'uburezi bakurikiranye imurika ry'ubu bushakashatsi
Bamwe mu bitabiriye imurika ry'ubushakashatsi bwerekana uko uburezi buhagaze ku Isi
Inzobere mu ibarurishamibare no gusesengura politiki muri UNESCO, Nicole Bella

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved