U Rwanda rwashimiwe kugira umubare munini w’abagore muri Guverinoma

Yanditswe na Mukaneza M.Ange
Kuya 19 Ukwakira 2018 saa 08:59
Yasuwe :
0 0

Umuyobozi wa Komisiyo y’Umuryango wa Afurika Yunze Ubumwe, AU, yashimye u Rwanda rukomeje guteza imbere abagore binyuze mu kubaha imyanya mu nzego zirimo Guverinoma n’Inteko Ishinga Amategeko.

Abinyujije kuri Twitter, Umuyobozi wa Komisiyo ya AU, Moussa Faki Mahamat, yavuze ko u Rwanda rukomeje kuyobora ibindi bihugu mu kubahiriza ihame ry’uburinganire, aho rukurikirwa na Ethiopia.

Ati “Ubushake bwa politiki mu kwemera ko abagore n’abagabo bareshya ni ingenzi cyane muri iki gihe duharanira kugira Afurika twifuza. Ndashimira abaturage na Guverinoma y’u Rwanda n’iya Ethiopia.”

Ibi Mahamat yabitangaje nyuma y’uko ku mugoroba wo ku wa 18 Ukwakira, Perezida Paul Kagame atangaje guverinoma nshya, aho mu ba minisitiri 19 bashyizweho, 11 ari abagore bivuze ko bihariye 58%.

Ni mu gihe aba minisitiri wongeyeho abanyamabanga ba Leta, abagore bihariye 50%, kuko bafite imyanya 13 muri 26 yose yashyizweho.

U Rwanda kandi rwagabanyije umubare w’abagize guverinoma bava kuri 31 baba 26.

Aba bagore bari mu guverinoma nshya yashyizweho, baje biyongera kuri 61.3% bari mu Nteko Ishinga Amategeko Umutwe w’abadepite.

Mu badepite bose uko ari 80, abagore ni 49 mu gihe abagabo ari 31. U Rwanda nirwo ruyoboye ibindi bihugu byo ku Isi mu kugira abagore benshi mu Nteko Ishinga Amategeko.

Ku wa Kabiri nibwo Ethiopia yashyizeho guverinoma nshya igizwe n’abaminisitiri 20, barimo abagore 10.

Umuyobozi wa Komisiyo ya AU, Moussa Faki Mahamat, yashimye u Rwanda kuba rwarimakaje ihame ry’uburinganire muri Guverinoma

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza