Kwamamaza

U Rwanda rwashimangiye ko abakekwaho Jenoside bacyihishahisha ntaho bazahungira ubutabera

Yanditswe kuya 29-09-2016 saa 09:20' na Rabbi Malo Umucunguzi


Ku mugoroba wo kuri uyu wa Gatatu nibwo u Rwanda rwashyikirijwe Dr Leopold Munyakazi wirukanwe muri Leta Zunze Ubumwe za Amerika, aho agomba kuburanishwa ku byaha bya Jenoside n’ibyibasiye inyokomuntu, ubwicanyi n’ubufatanyacyaha muri Jenoside.

Dr Munyakazi atandukanye n’abandi bakekwaho ibyaha bya Jenoside bagiye boherezwa n’izindi nkiko mu Rwanda hagashyirwaho ‘amabwiriza’ azubahirizwa mu rubanza rwe, kuko yirukanwe muri Amerika.

Agomba kuburanira i Muhanga, akiregura ku byaha bikekwa ko yakoreye i Kayenzi mu Ntara y’Amajyepfo, mu gihe aboherejwe n’izindi nkiko nka Dr Mugesera bo bagiye baburanira mu rugereko rwihariye ruri mu Rukiko Rukuru.

Ubushinjacyaha buvuga ko bumaze kohereza impapuro zisaga 600 zisaba ko abakekwaho ibyaha batabwa muri yombi, gusa ibihugu bigenza gake muri iki gikorwa.

Umuvugizi w’Ubushinjacyaha, Nkusi Faustin, yavuze ko Leta Zunze Ubumwe za Amerika yazanye mu Rwanda Dr Munyakazi zagaragaje ubushake bwo kohereza mu Rwanda abantu bakekwaho ibyaha bari ku butaka bwayo.

Ati “Ni igihugu dushima cyane kuko gikomeje kugaragaza ubushake mu kohereza abakoze Jenoside. Kuba bamuzanye ni ibintu twishimira mu butabera.”

“Kugeza ubu muri Amerika bamaze kohereza bane muri ubu buryo bwo kubirukana mu gihugu cyabo. Hari uwo bohereje 2005, abandi babiri babohereza mu 2011, uyu bamwohereje ari uwa kane.”

Umuyobozi wa Polisi Mpuzamahanga Ishami ry’u Rwanda, ACP Anthony Kulamba, yavuze ko nta buhungiro abanyabyaha bateze kuzabona ku buryo igihe cyose bazafatwa.

Ari “Umuntu nk’uyu kuba agaruwe nyuma y’imyaka myinshi yihisha ubutabera, ni icyerekana ko abajenosideri bose aho bari, ubutabera buzabakurikirana. Bitinde, ariko buhoro buhoro ntaho bazihisha, umuntu wakoze ibyaha ntashobora kwihisha igihe cyose.”

“Murabona ko ubutabera bukora. N’ubu hari abandi bari ku rutonde bashakishwa na Interpol, bashakishwa ku Isi yose. Ni ibikorwa bikomeza n’abandi bazaza buhoro buhoro, iki cyaha bakoze ubutabera buzabibaryoza.”

U Bufaransa ntibukozwa ibyo kohereza mu Rwanda abakekwaho ibyaha

Jean Bosco Siboyintore ukuriye Ishami ry’Ubushinjacyaha bw’u Rwanda rikurikirana abakekwaho Jenoside bahunze ubutabera, yavuze ko u Rwanda hari impapuro zisaga 600 zisaba itabwa muri yombi ry’abakekwaho ibyaha bya Jenoside, ariko kubafata biracyagenda gake.

Ati “Nko muri Amerika dufiteyo 21, ariko nko mu Bufaransa honyine hari izirenga 39. Ikindi nk’uko mwagiye mubikurikirana, mu Bufaransa batangiye kuburanisha, biragoye nta rubanza na rumwe bari bemeza kohereza mu Rwanda, ariko bahisemo kubaburanisha.”

Jean Bosco Siboyintore ushinzwe gukurikirana abahunze ubutabera

“Nabyo ni icyemezo twakira neza, iyo buri gihe igihugu kidashoboye kuburanisha cyohereza umuntu kugira ngo ikindi kumuburanishe, ariko nticyananirwa gukora byombi."

Siboyintore yavuze ko mu manza u Bufaransa bwaburanishije bose bajuririye ibihano bahawe, ariko igikenewe ni uko buri wese ufite icyo yakoze akibazwa.

Ati “Kugeza ubu bamaze kuburanisha batatu, Simbikangwa, Ngenzi na Tito Barahira, babiri ba nyuma bakatiwe burundu ubu barajuriye, Simbikangwa yakatiwe gufungwa imyaka 25 nawe yarajuriye. Reka turebe aho byerekeza ariko ni intera, biragenda gahoro ariko birerekeza mu cyerekezo dushaka cy’ubutabera, ngo umuntu wese wakoze Jenoside amategeko abimuryoze. Yabimuryoreza hano cyangwa se aho yaba ahererereye.”

Umuvugizi w’Ubushinjacyaha, Nkusi Faustin, yavuze ko n’ibindi bihugu bifashe uwo murongo bikaburanisha abakekwaho ibyaha ntibibohereze mu Rwanda “ntacyo bitwaye kubera ko ni ubutabera twe dukeneye kandi ni inshingano amategeko mpuzamahanga ateganya.”

Yakomeje agira ati “Kohereza impapuro zisaba abantu basaga 600, hakaburanishwa batatu mu Bufaransa, ejo hakaburanishwa babiri mu Budage, ntabwo bigenda ku muvuduko dukeneye. Iki cyaha ni mpuzamahanga kandi ni inshingano y’ibihugu byose ku Isi kuko nka jenoside yabaye mu Rwanda si icyaha cyakorewe Abatutsi gusa, ni icyaha mpuzamahanga.”

Nkusi yavuze ko ubushinjacyaha budateze kuzacika intege, ahubwo buzakomeza gusaba ko buri wese ukurikiranweho ibyaha atabwa muri yombi akabibazwa.

Dr Munyakazi wazanwe mu Rwanda, yaherukaga gufungwa ariko mu 1999 arekurwa by’agateganyo nyuma y’uko Ubushinjacyaha bwari bugikusanya ibimenyetso, ahabwa amabwiriza ko atagomba gusohoka mu gihugu.

Yasubiye mu buzima busanzwe ndetse aza kwigisha mu ishuri rikuri ryahoze ari KIE, mu 2004 ahungira muri Leta Zunze Ubumwe za Amerika. Mu 2008 u Rwanda rwohereje impapuro zo kumuta muri yombi, aza gufatwa ndetse ibihugu byombi bimukoraho iperereza kugeza ubwo byemeje ko agarurwa mu Rwanda.

Nkusi ati “Kuba yarafunzwe akarekurwa ntacyo byari binatwaye, ariko no gutoroka biragaragaza ko yanikekaga. Muri Amerika basanze yaranababeshye ko ashakishwa kubera ipamvu zitandukanye kandi atari byo, ahubwo baza gusanga ibyo twatanze tugaragaza ko hari ibintu yasize akoze aribyo.”

Umuvugizi w'ubushinjacyaha, Nkusi Faustin
Umuyobozi w'Ishami rya Polisi Mpuzamahanga mu Rwanda, ACP Anthony Kulamba
Dr Leopold Munyakazi yagaruwe mu Rwanda

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved