Kwamamaza

U Rwanda rwasangije amahanga uko rwishatsemo ibisubizo mu bwiyunge no komora ibikomere

Yanditswe kuya 11-11-2016 saa 16:03' na Rabbi Malo Umucunguzi


Mu nama ku isanamitima n’ubwiyunge iteraniye i Kigali, u Rwanda rwagaragaje uko rwagiye rwishakamo ibisubizo bishingiye ku mateka yarwo, hagamijwe kongera kubaka imibanire y’Abanyarwanda n’ubwiyunge.

Kuva kuri uyu wa Kane tariki 10 Ugushyingo, Impuguke zisaga 100 zaturutse mu bihugu birimo Uganda, Kenya, Chypre, Repubulika ya Centrafrique, Sudani y’Epfo, u Bubiligi, Leta Zunze Ubumwe za Amerika n’u Budage, zikoraniye i Kigali mu nama y’iminsi ibiri yiga ku isanamitima n’uko abarikoraho barushaho gukorana.

Iyi nama yateguwe na Never Again Rwanda hamwe na Interpeace ku nkunga y’abanya- Suède.

Mu kiganiro cyatanzwe na Dr Alfred Ndahiro usanzwe ari umujyanama mu biro by’Umukuru w’Igihugu ndetse akaba yaranditse ibitabo bitandukanye ku mibanire y’Abanyarwanda no kuri Jenoside, yagarutse ku ntambwe u Rwanda rwagiye rutera mu gukemura ibibazo no kongera kubaka ubumwe bw’Abanyarwanda, hashingiwe ku muco gakondo.

Komisiyo y’Igihugu y’Ubumwe n’Ubwiyunge igaragaza ko Abanyarwanda biyunze kugera kuri 92.5%, nubwo ibikomere bya Jenoside bikiri imbogamizi ikomeye ku bumwe n’ubwiyunge, aho mu mbogamizi zose bifitemo 4.6%.

Dr Ndahiro yagarutse ku ngero 15 zirimo Inkiko Gacaca, Abunzi, Girinka, n’izindi u Rwanda rwagiye rukomora mu mateka yarwo no mu ndangagaciro z’Abanyarwanda, mu guhangana n’ingaruka za Jenoside yakorewe abatutsi mu 1994 no kubaka iterambere igihugu gikeneye.

Yavuze ko hashingiwe ku nkingi enye za guverinoma arizo Ubutabera, imibereho myiza, imiyoborere myiza n’iterambere ry’ubukungu, u Rwanda rwagiye rwishakira ibisubizo byanagize uruhare mu isanamitima n’ubwiyunge, kuko zabaga ntawe ziheza.

Yavuze uko Inkiko Gacaca zafashije mu guca imanza za Jenoside zari nyinshi cyane, zikanaha ubutabera abacitse ku icumu kandi zikunga Abanyarwanda, aho amakuru yatangiwemo agaragaza uko abapfuye bishwe n’aho bashyizwe biri muri bimwe mu bigerageza gufasha uwabuze uwe.

Ati “Mu gihe cy’imyaka 10, inkiko zisaga ibihumbi 12 zishingiye ku baturage, zaciye imanza miliyoni 1.9 mu gihugu. Impuguke zivuga ko byagombaga gufata imyaka 100 mu kuziburanisha. Gacaca yanafashije mu komora ibikomere n’ubwiyunge, binyuze mu gushyiraho uburyo ngo abarokotse bamenye iherezo ry’abo bakundaga, zinatanga amahirwe ku bakoze Jenoside ngo bicuze ibyo bakoze, banasabe imbabazi imbere y’abaturage.’’

Dr Ndahiro yanagarutse no ku ruhare rw’Abunzi bashyizweho hagamijwe gufasha abaturage kubona ubutabera na gahunda ya Girinka yahinduye ubuzima bw’abari babayeho mu bukene barimo abarokotse Jenoside, imaze gutangwamo inka zisaga ibihumbi 150.

Yashimangiye n’akamaro k’Ubudehe “bufasha abantu guhurira hamwe bose bakagira uruhare mu gushaka ibisubizo by’ibibazo bafite’’, Umushyikirano, Umwiherero w’abayobozi bakuru b’igihugu, Itorero, VUP, n’Ikigega Agaciro kigaragaza ko Abanyarwanda bashyize hamwe bagera kuri byinshi.

Yakomeje agira ati “Komora ibikomere n’ubwiyunge ni urugendo, ntabwo ari ikintu kiba ako kanya. Ni nayo mpamvu hari abatarabigeraho, ariko nkuko twabibonye, ibi bisubizo igihugu cyishakamo bigamije gutanga umusanzu muri uru rugendo.’’

Dr Alfred Ndahiro yagaragaje ko hari uburyo butandukanye u Rwanda rwagiye rwishakamo ibisubizo

Muri iyi nama ihuje ibihugu bitandukanye, harimo n’ibikiri mu makimbirane cyangwa se ibyayavuyemo bikeneye imbaraga mu rugendo rw’ubwiyunge no kongera kubaka imibanire y’Abanyarwanda.

Chantal Kongbah waturutse muri Repubulika ya Centrafrique, igihugu cyugarijwe n’ibibazo guhera mu 2013, yavuze ko ubwo yajyaga kuza mu Rwanda abagore bahuriye mu muryango, bagaragaje ko bagiye kwigira ku Rwanda uburyo bwo kugarura ubumwe mu gihugu cyabo.

Kongbah wanyuzwe n’intambwe u Rwanda rwateye binyuze mu kwishakira ibisubizo, yabajije niba byashoboka ko Abanyarwanda bajya kubasangiza ubunararibonye, Ndahiro usanzwe uyobora umuryango Uyisenga ni Imanzi, yamwijeje ko bishoboka cyane nk’uko muri icyo gihugu hariyo ingabo z’u Rwanda ziri mu butumwa bwo kugarura amahoro.

Dr Ndahiro yashoje ikiganiro cye agaragariza abitabiriye inama ko ingamba u Rwanda rwafashe zo kwishakira ibisubizo ku bibazo by’umwihariko rufite ari nabyo byaremyemo abanyarwanda kwigenera ejo harwo hazaza.

Impuguke zisaga 100 nizo zitabiriye iyi nama
Iyi nama ku isanamitima yateguwe na Never Again Rwanda hamwe na Interpeace ku nkunga y’abanya- Suède

Amafoto:Luqman Mahoro


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved