U Rwanda rwaje ku mwanya wa kane muri Afurika mu korohereza abashaka kurujyamo

Yanditswe na Cyprien Niyomwungeri
Kuya 12 Ugushyingo 2019 saa 09:15
Yasuwe :
0 0

Raporo ya 2019 ya Banki Nyafurika Itsura Amajyambere ifatanyije n’Umuryango wa Afurika yunze Ubumwe ku buryo ibihugu byorohereza abantu kubyinjiramo (Africa Visa Openness Report), yashyize u Rwanda ku mwanya wa kane mu gufungurira imipaka abashaka kurujyamo.

Iyi raporo ikozwe ku nshuro ya Kane, yatangajwe kuri uyu wa Mbere mu nama yabereye ku ruhande rw’inama yiga ku ishoramari muri Afurika irimo kubera i Johannesburg muri Afurika y’Epfo.

Irerekana intambwe idasanzwe Afurika imaze gutera mu gufungurirana imipaka, aho ibihugu 47 byakoze impinduka nziza cyangwa bikagumishaho politiki zabyo zo gufungurira imipaka abashaka kubijyamo binyuze mu gukuraho viza cyangwa kuzifatira ku mipaka.

Ku nshuro ya mbere mu mateka, abanyafurika bashobora gukorera ingendo mu bihugu nibura 27 badasabye viza cyangwa bakazisaba bageze ku mipaka. Ethiopia niyo yazamutse cyane kuri uru rutonde imyanya 32 bituma yinjira mu bihugu bya mbere 20 byorohereza cyane abashaka kubijyamo.

Ku mwanya wa Mbere haza Seychelles, uwa kabiri Bénin, uwa gatatu Sénégal naho u Rwanda rukaza ku mwanya wa kane. Ugereranyije na raporo ya 2018, u Rwanda rwasubiyeho inyuma umwanya umwe.

Iyi raporo yerekana ko abaturage bo mu bihugu 17 bemerewe kujya mu Rwanda nta viza mu gihe abo mu bihugu 36 bazifata bageze ku mupaka warwo.

Mu bihugu biza mu myanya ya nyuma harimo Guinée Équatoriale, Libya, Sudani, Eritrea, Sudani y’Epfo, Misiri, Maroc, u Burundi, Algeria na Repubulika Iharanira Demokarasi ya Congo.

U Rwanda kandi ruri mu bihugu 13 byakoze ibidasanzwe mu korohereza abashaka kubijyamo hagati ya 2016 na 2019, aho binatanga viza hifashishijwe ikoranabuhanga (eVisas). Ruri kumwe na Angola, Benin, Cameroon, Misiri, Ethiopia, Gabon, Kenya, Rwanda, São Tomé and Príncipe, Sierra Leone, Tanzania, Tunisia na Zimbabwe.

Iterambere mu koroshya urujya n’uruza rigaragara muri iyi raporo rikomoka ku mbaraga zirimo gushyirwa mu kwihuza hagati y’ibihugu ndetse n’amavugurura arimo gukorwa n’abayobozi batandukanye hirya no hino agamije korohereza abacuruzi b’abanyafurika, abashoramari, abanyeshuri n’abakerarugendo kubasha gukora ingendo nta nkomyi.

Abasura Afurika ntabwo bagikeneye viza ituma bagenda muri kimwe cya kane cy’ibihugu bya Afurika ni ukuvuga ibirenga 13 mu gihe ibihugu byari byarakuyeho viza byari kimwe cya gatanu mu 2016.

Kugeza ubu ibihugu 21 bya Afurika byashyizeho uburyo bwo gusabira Viza ku ikoranabuhanga bivuye kuri 16 mu 2018, 13 mu 2017 n’icyenda mu 2016.

Ugiye kureba ibihugu biri ku isonga mu korohereza abantu kubijyamo usangamo ibifite urwego rwo hejuru rw’ishoramari mpuzamahanga n’ibikura inyungu nyinshi mu bukerarugendo.

Perezida wa Banki Nyafurika Itsura Amajyambere, Dr Akinwumi Adesina, avuga ko iyi raporo ikorwa bagamije gusuzuma uko uyu mugabane urimo koroshya urujya n’uruza rw’abantu.

Ati “Hari byinshi byiza byakozwe ariko haracyari ibindi bikeneye gukorwa. Mu guhuza Afurika, dukeneye gusenya ibikuta. Urujya n’uruza rw’abantu cyane cyane mu bijyanye no gukora imirimo ni ingenzi mu guteza imbere ishoramari”.

Gahunda ya 2063 y’Umuryango wa Afurika yunze Ubumwe (AU), iteganya kwihutisha iterambere ry’umugabane hakurwaho imbogamizi zimwe na zimwe nk’urujya n’uruza rw’abantu n’ibintu.

Iyi gahunda yemejwe mu Nama y’Abakuru b’Ibihugu bya Afurika muri Mutarama 2015 i Addis Ababa muri Ethiopia, iteganya ko mu 2018 ibihugu bya Afurika byagombaga kuba byakuriyeho visa Abanyafurika.

Iyi raporo yerekana kandi ko mu 2019 hari ibihugu 26% muri Afurika ushobora kubona viza ku mupaka bivuye kuri 1% mu 2016. Gusa hakenewe ko ibihugu bikomeza kwitabira gushyiraho uburyo butuma abantu babona viza bageze ku mipaka.

Ibi kandi bifite inyungu kuko gukuraho imipaka ibuza abantu kugenda bizatuma Afurika ibonera inyungu nyinshi mu isoko rusange, guhuza ikirere mu ngendo z’indege ndetse no koroshya urujya n’uruza rw’abantu.

U Rwanda ruri ku mwanya wa Kane muri Afurika mu korohereza abashaka kurujyamo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza