Kwamamaza

U Rwanda rwagenewe igihembo rukesha gushyigikira pasiporo imwe ya Afurika

Yanditswe kuya 18-09-2016 saa 18:47' na Rabbi Malo Umucunguzi


U Rwanda rwagenewe igihembo kizashyikirizwa Perezida Paul Kagame, rugikesha ubushake rwagaragaje mu gushyigikira ishyirwaho rya Pasiporo Nyafurika Ihuriweho, yamuritswe mu nama ya 27 y’Umuryango wa Afurika Yunze Ubumwe yabereye mu Rwanda muri Nyakanga.

Iki gihembo ni kimwe muri byinshi bizatangwa ku mugoroba wo kuwa Kabiri tariki 20 Nzeri mu Mujyi wa New York, harimo n’ikizahabwa umuherwe w’Umunyanijeriya, Aliko Dangote, bikazatangwa n’ikigo cyitwa AAI (Africa-America Institute).

Iki gihembo kizahabwa u Rwanda nk’igihugu cyashyize imbaraga mu kwishyira hamwe kw’ibihugu, ari nayo mpamvu cyiswe AAI 2016 Regional Integration Award.

Ubwo iyi pasiporo yamurikwaga kuwa 17 Nyakanga 2016, Perezida wa Komisiyo ya AU, Dr Nkosazana Dlamini Zuma, yabwiye abakuru b’ibihugu ko aribo bayihawe mbere y’izindi nzego, ariko n’abaturage bazagenda bazihabwa hakurikijwe amategeko ibihugu bigenderaho.

Ati “Navuga ko twasabwe cyane ko zagenerwa abandi baminisitiri, abayobozi no ku bandi banyafurika bifuza ako gaciro ko gutunga pasiporo Nyafurika. Turasaba ko mu gihe tuzitangaje uyu munsi, twemeranye n’ibihugu gutanga pasiporo ku baturage babyo nk’uko bisanzwe bimera mu bihugu byabo, igihe bizaba bibyiteguye neza.”

Iyi pasiporo Nyafurika izatuma Abanyafurika babasha gutembera mu bihugu bigize uyu mugabane batatswe visa, ibintu byitezweho kuzoroshya urujya n’uruza rw’ibicuruzwa, ibihugu bya Afurika bikoroherwa no gucuruzanya hagati yabyo aho kuba n’indi migabane.

AAI ni ikigo giteza imbere ubushobozi bw’Abanyafurika binyuze mu burezi, ubumenyi, ibiganiro n’izindi gahunda zinyuranye, kikazaba gishima ubushake bw’u Rwanda mu kwishyira hamwe hamwe kw’ibihugu,

AAI kandi ishimira u Rwanda ku guteza imbere no kongerera ubushobozi amashuri makuru binyuze mu bikorwa birimo nk’imikoranire u Rwanda rwahanze na Kaminuza ya Carnegie-Mellon yo muri Leta Zunze Ubumwe za Amerika.

AAI yashinzwe mu 1953 ifite intego yo gufasha Abanyeshuri b’Abanyafurika gukomeza amasomo muri Leta Zunze ubumwe za Amerika, kuko muri icyo gihe abanyeshuri baturuka muri Afurika bajyaga kwigayo bafite icyizere, ariko bakagorwa n’ubushobozi ntibabashe kwirihira kaminuza.

Yatangiye itanga ubufasha bw’amafaranga, ahagana mu 1960 kugeza mu 1980 ubwo ibihugu bya Afurika byabonaga ubwigenge, AAI yaguye gahunda zayo z’uburezi muri Leta Zunze Ubumwe za Amerika ibifashijwemo na guverinoma y’icyo gihugu, itanga ubumenyi Abanyafurika bagombaga kuzifashishwa nyuma y’ubukoloni.

Mu 2003, Ikigega cya Leta Zunze Ubumwe za Amerika gishinzwe iterambere mpuzamahanga, USAID, cyagaragaje ko amamiliyoni y’amadolari yashowe mu mahugurwa na AAI guhera 1963 yatanze impinduka zazamuye iterambere rya Afurika mu buryo bugaragara.

Uyu munsi AAI ishyize imbere iterambere ry’impano muri Afurika, kuzamura ubushobozi bw’abatuye uyu mugabane no gushyigikira abayobozi na ba rwiyemezamirimo muri gahunda zireba Afurika.

Perezida Idris Deby wa Tchad unayoboye inama y’Umuryango wa Afurika Yunze Ubumwe, AU, na Paul Kagame w'u Rwanda nibo bashyirijwe Pasiporo Nyafurika ku ikubitiro

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved