U Rwanda rwagaragarije ECCAS intambwe rwateye mu kwimakaza ihame ry’uburinganire

Yanditswe na HABIMANA James
Kuya 27 Kamena 2019 saa 07:42
Yasuwe :
0 0

Umunyamabanga Uhoraho muri Minisiteri y’Uburinganire n’Iterambere ry’Umuryango (Migeprof), Umutoni Gatsinzi Nadine, yabwiye abayobozi baturutse mu Muryango w’Ubukungu w’Ibihugu byo muri Afurika yo Hagati (ECCAS) ko ubuyobozi bwiza bw’u Rwanda bwafashije abagore kugira uruhare mu iterambere ry’igihugu.

Yabigarutseho mu nama yahuje impuguke mu by’iterambere n’uburinganire bw’umuryango bavuye mu bihugu bigize ECCAS, aho bari mu Rwanda kugeza kuri uyu wa Gatanu baganira ku mahame agenga uburinganire.

Ubwo yatangizaga iyi nama, ku wa 26 Kamena 2019, Umutoni Gatsinzi Nadine yashimiye ubunyamabanga bwa ECCAS kuba bwarahisemo kuyikorera mu Rwanda.

Yashimiye ibihugu bigize ECCAS uburyo kandi bikomeje kwita ku mahame n’agaciro k’uburinganire hagati y’abagabo n’abagore, byose bigamije ko na bo bisanga mu bukungu, umuco kimwe n’abagabo.

Yagize ati “Abagore bagize kimwe cya kabiri cy’abatuye Isi no muri Afurika muri rusange, kubera iyi mpamvu abagore ni bo benshi bagize umuryango bivuze ko bagomba kuba intangiriro ya byose muri gahunda zifatwa.”

Ubwo yagaragazaga uko u Rwanda rwageze ku mahame y’uburinganire, yagize ati “Igihugu cyashyize aya mahame mu bikorwa byose by’iterambere kandi ibi byagezweho kubera imiyoborere myiza ari na yo yanatanze amahirwe ku bagore ubundi bari baragiye basigazwa inyuma.”

Yavuze ko kubera iyi mpamvu abagore bajya mu nzego zifata ibyemezo biyongereye.

U Rwanda rufite abagore mu Nteko Ishinga Amategeko (61.25%) mu gihe 50% bari muri guverinoma na 40% mu nama njyanama z’inzego z’ibanze.

Isabelle Boukinda Nzaou uhagarariye Uburinganire muri ECCAS yashimiye ubuyobozi buri mu Rwanda cyane Perezida Paul Kagame, washyize imbere gahunda y’uburinganire no gutuma abagore bagaragaza uruhare rwabo muri politiki no mu bikorwa by’iterambere.

Mu baturage b’u Rwanda basaga miliyoni 12, igitsina-gore gifite 52% kandi bafite uruhare rufatika mu bukungu bw’igihugu.

Raporo y’Ikigo Mpuzamahanga cy’Imari yagaragaje ko abagore batanga umusanzu wa 30% mu bukungu bw’imbere mu gihugu (GDP).

Ubushakashatsi ‘Capacity Assessment Report’ bwakozwe mu 2018, bwagaragaje ko mu byateye abagore kwiyemeza kwikorera birimo ko 86% baharaniye kwigira; 83% bari babifitiye umuhamagaro mu gihe 45% bashyigikiwe n’abagabo babo.

Kuri uyu wa Kane izi mpuguke zakomeje kuganira kuri gahunda z’uburinganire.

Biteganyijwe ko mu gusoza iyi nama, hazaterana ba baminisitiri bashinzwe iby’uburinganire mu bihugu bigize ECCAS birimo u Rwanda, Angola, u Burundi, Cameroon, Congo, Gabon, Guinea Equatorial, Repubulika ya Centrafrique, Repubulika Iharanira Demokarasi ya Congo, São Tomé and Príncipe na Tchad.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza