Kwamamaza

U Rwanda rwaburiye ibihugu bya EAC byanze gusinya ku masezerano y’ubufatanye n’u Burayi

Yanditswe kuya 28-08-2016 saa 10:47' na Uwishyaka Jean Louis


Minisitiri w’Ubucuruzi n’Inganda mu Rwanda, François Kanimba yavuze ko hashobora kuvuka ibibazo mu muryango wa Afurika y’u Burasirazuba, EAC, mu gihe ibihugu biwugize bizaba byanze gushyira umukono ku masezerano y’ubufatanye n’Umuryango w’Ubumwe bw’u Burayi, EU, mu bijyanye n’ubukungu, Economic Partnership Agreement (EPA).

Mu minsi ishize Tanzania yavuze ko itazasinya amasezerano y’uyu mushinga, ishingiye ku bibazo Umuryango w’Ubumwe bw’Ibihugu by’u Burayi wari utangiye guhura nabyo, nyuma y’uko u Bwongereza bwari bufashe umwanzuro wo kwivanamo.

Gusinya aya masezerano y’ubufatanye hagati ya EAC na EU, yatekerezwaga nk’azoroshya imikoranire mu bucuruzi n’ubufatanye mu iterambere hagati y’iyi miryango yombi, harimo no gukuraho imisoro ku bicuruzwa bikorerwa mu bihugu bigize iyo miryango yombi.

Nka Tanzania yashimangiye ko nta nyungu ifatika EPA izazanira iki gice cya Afurika, kuko izaha isoko rigali ibihugu byo muri EU bifite inganda zateye imbere, kurusha iki gice cya Afurika gifite inganda zicyiyubaka.

Umunyamabanga uhoraho muri Minisiteri y’Ububanyi n’Amahanga ya Tanzania, Dr. Aziz Mlima, muri Nyakanga yavuze ko igihugu cye kititeguye gusinya kuri aya masezerano ashobora kuzana ibihombo kuri EAC kurusha inyungu.

Ati “Impuguke zacu zasesenguye neza ko uburyo ayo masezerano yakozwemo, ko EPA itazungura inganda zacu muri Afurika y’u Burasirazuba. Ahubwo azatuma zisenyuka kuko ibihugu byateye imbere biziharira isoko ryacu.”

Ku ruhande rw’u Rwanda, Minisitiri w’Ubucuruzi n’Inganda François Kanimba, yabwiye The East African ko abanyepolitiki bakwiye gushyira imbere inyungu z’akarere muri rusange kurusha iz’igihugu ukwacyo, bagashyira umukono kuri ayo masezerano “y’ingirakamaro ku karere”.

Yagize ati: “Ibibazo biri kugenda bigaragazwa kuri aya masezerano ya EPA ni ibibazo byatekerejweho mbere kandi ingamba zihagije zo kubyirinda zashyizwe mu masezerano ya nyuma mu rwego rwo kurengera inganda zacu zikiri nto.”

Yakomeje agira ati: “Niba mu gihe kiri imbere hari impungenge ku bukungu bwacu, dushobora kongera tukabiganiraho. EPA ntabwo ari bibiliya. Twumvikanye ko nyuma ya buri myaka itanu tuzajya twongera tukaganira kandi tukagenzura uko amasezerano yashyizwe mu bikorwa. Niba hari igihugu gisanze kitarungukiye muri EPA, gishobora kuzamura icyo kibazo kikaganirwaho”.

Tanzaniya yari yahaye rugari ibindi bihugu bya EAC bishaka gusinya kuri ayo masezerano amaze imyaka isaga itanu aganirwaho, ndetse mu Ukwakira 2014 bikaba byarasaga n’aho ibihugu bitanu byari bigize EAC aribyo u Burundi, Kenya, u Rwanda, Tanzania, na Uganda, byasoje ibiganiro.

Ayo masezerano byari byitezwe ko ashyirwaho umukono kuwa 18 Nyakanga, mu nama ya 14 y’Umuryango w’Abibumbye yigaga ku Bucuruzi n’Iterambere yaberaga i Nairobi muri Kenya, UNCTAD 14, yabaye hagati ya tariki 17 na 22 Nyakanga 2016, ariko ntibyashoboka.

Minisitiri Kanimba avuga ko aya masezerano ya EPA ari “inyungu ikomeye mu bijyanye n’ubucuruzi”, gusa icyo gitekerezo u Rwanda ntirugihurizaho na Tanzania na Uganda.

Uwahoze ari Perezida wa Tanzania, Benjamin Mkapa, nawe aheruka kuvuga ko ibihombo bishobora kuzava ku isinywa ry’aya masezerano bizaba biruta inyungu ibihugu bizayaronkamo.

Ambasaderi w’u Bwongereza mu Rwanda William Gelling aherutse gutangaza ko ibihugu bigize EAC bidasinye ku masezerano y’ubufatanye mu by’ubukungu na EU, byaba ari icyemezo kibi kandi byazicuza mu gihe kizaza, bitewe n’intego bifite yo kuba mu bihugu bifite ubukungu buringaniye.

Ibihugu byo muri EAC byohereza cyane mu bigize EU, ibicuruzwa birimo Ikawa, indabo, itabi, icyayi, amafi n’imboga, mu gihe ibihugu byo muri EU byohereza muri EAC ibicuruzwa birimo imashini zo mu nganda n’ibyuma binyuranye, imodoka, imiti n’ibindi.

Minisitiri w’Ubucuruzi n’Inganda mu Rwanda, François Kanimba

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 27 September 2016
Copyright © 2009 -2014 - IGIHE Ltd - All Rights Reserved