U Rwanda ruzasubukura ryari imirimo imwe yo kubaka ikibuga cy’indege cya Bugesera yasubitswe?

Yanditswe na Evariste Nsengimana
Kuya 4 Nyakanga 2019 saa 05:13
Yasuwe :
0 0

Mu ntangiro z’uyu mwaka nibwo Guverinoma y’u Rwanda yatangije umushinga wo kuvugurura imiterere [Design] y’ikibuga mpuzamahanga cy’indege cya Bugesera, ugamije kucyongerera ubushobozi bugishyira ku rwego mpuzamahanga.

Umushinga wo kubaka iki kibuga utangazwa bwa mbere, byari biteganyijwe ko kizubakwa mu bice bibiri, kimwe kizarangira gifite ubushobozi bwo kwakira abantu miliyoni 1.7 ku mwaka, kucyubaka bikarangira mu 2020 bitwaye miliyoni 418 z’amadolari ya Amerika.

Byari biteganyijwe ko nyuma kizagurwa ku buryo kizagira ubushobozi bwo kwakira abantu miliyoni 4.5 ku mwaka bikagerwaho hifashishijwe izindi miliyoni 400 z’amadolari ya Amerika.

Muri Werurwe 2019, Minisiteri y’Ibikorwa Remezo yemeje ko habayeho kuvugurura imiterere yacyo bituma hari imirimo imwe n’imwe yahise ihagarara, ikazongera gusubukurwa nyuma yo kugenerwa imiterere mishya.

Uyu mushinga wo kubaka iki kibuga watangijwe mu 2017, wongeye kugarukwaho mu cyumweru gishize n’abagize Inteko Ishinga Amategeko, umutwe w’Abadepite ubwo bari bakiriye Minisitiri w’Ibikorwa remezo, Amb. Gatete Claver, bamubaza aho imirimo igeze.

Depite Rwigamba Fidèle yavuze ko abakozi ba Minisiteri y’ibikorwa remezo babwiye Inteko Ishinga Amatege ko ikibuga mpuzamahanga cy’indege cya Bugesera giherutse guhindurirwa imiterere ariko bibaza aho imirimo igeze.

Ati “Umuntu akibaza mbere y’uko imiterere ihinduka, byavugwaga ko icyiciro cya mbere cyacyo cyazarangira 2020. Nyuma yo kuvugurura bimeze gute? Ese kizakomeza cyubakwe mu byiciro? Ese kizuzura ryari ko nta mushinga utagira iherezo, duheruka batubwira ngo kigeze kuri 7%.”

Minisitiri Gatete yavuze ko nubwo imiterere yacyo iri kuvugururwa, indi mirimo y’ubugeni, imihanda indege zigenderaho zihagurutse cyangwa zigiye kugwa ku kibuga n’indi itabangamirwa n’imiterere yo yakomeje.

Uretse ibyo, gukora no kwagura imihanda ijyayo irimo nk’unyura Kicukiro no ku mugezi w’Akagera nabyo byarakomeje. Hari n’undi uzaca i Masaka, uzajya wifashishwa mu gihe undi wagize ikibazo uteganywa kubakwa.

Minisitiri Gatete yavuze ko hari indi mirimo ikorwa ku kibuga cy’indege bitari gukunda ko ikomezwa mu gihe hakivugururwa imiterere yacyo nubwo atavuze ubwoko bwayo.

Yavuze ko ubwikorezi bwo mu kirere bw’u Rwanda bugenda bwaguka umunsi ku wundi ku buryo hari indege ebyiri nini [AirBus] rwitegura kwakira ariko ntiyavuze igihe zizahagerera.

Minisitiri Gatete yavuze ko muri uko kwagurwa ubwikorezi bw’u Rwanda harimo nko kongera ibyerekezo mu bihugu bitandukanye birimo Israel, u Bushinwa, Ethiopia, Angola, Repubulika iharanira Demokarasi ya Congo n’ahandi.

Ati “Ikibuga cy’indege kirakenewe cyane ku buryo igihari ntabwo cyazageza imyaka myinshi cyane iri imbere nubwo tugiye kongera tukacyaguraho gato...Nko mu kwezi kwa munani, kuvugurura imiterere y’icya Bugesera [Design] bizaba birangiye noneho tugatangira gukora ijoro n’amanywa twongeye gutangira kucyubaka.”

Imiterere y’iki kibuga ya mbere yateganyaga ko icyiciro cya mbere cyacyo cyagombaga kuzaba gifite ubushobozi bwo kwakira abagenzi miliyoni 1.7.

Minisitiri Gatete ati “Ubu twari tugeze ku bagenzi miliyoni 1.8 ariko noneho turagira ngo tuzagire hanini niyo mpamvu tubigaragarizwa n’imiterere mishya kuko turashaka kugira ikibuga cy’indege kitari nk’uko twagitekerezaga mbere.”

Iki kibuga cy’indege kiri kubakwa ku butaka bwa Leta busaga hegitari 2400. Minisitiri Gatete yavuze ko zikubye hafi inshuro ebyiri iz’ikibuga mpuzamahanga cy’indege cy’u Bwongereza.

Ati “Icyo bivuze ni uko dushaka kugira ikibuga cy’indege kigezweho nka biriya mubona i Burayi n’ahandi, niyo mpamvu twakomeje gusubiramo imiterere yacyo bundi bushya kugira ngo tubimenye neza.”

Minisitiri Gatete yavuze ko Guverinoma irimo kuganira n’abafayanyabikorwa bazafatanya muri uriya mushinga wo kubaka iki kibuga cy’indege.

Ati “Turatekereza ko muri uyu mwaka uzajya kurangira, akazi kongeye gutangira, noneho dukora amasaha menshi.”

Minisitiri Gatete yavuze ko kuvugurura imiterere yacyo nibirangira aribwo hazamenyekana imibare mishya y’abagenzi kizajya cyakira ariko ngo itandukanye na miliyoni 1.7 cyari cyateganyirijwe.

Yavuze ko ikigamijwe atari ukwihutisha umushinga wo kucyubaka gusa ahubwo hagomba no kwitabwa ku burambe kigomba kuzaba gifite.

Minisitiri Gatete ntabwo yasobanuye niba kuvugurura iyo miterere bizagira ingaruka ku gihe icyiciro cya mbere cyari kuzarangirira mu 2020, ariko aheruka gutangaza ko nta kibazo cy’amafaranga leta ifite.

Muri Werurwe uyu mwaka, Itsinda ry’intumwa za Qatar, riyobowe na Minisitiri w’Intebe wungirije akaba na Minisitiri w’Ububanyi n’Amahanga, Sheikh Mohamed bin Abdulrahman Al Thani, bagiranye ibiganiro na Leta y’u Rwanda birimo umushinga wo gutera inkunga umushinga wo kwihutisha kubaka ikibuga mpuzamahanga cy’indege cya Bugesera.

Igishushanyo mbonera cya mbere cy'ikibuga cy'indege cya Bugesera
Mu 2017 nibwo imirimo yo kucyubaka yatangiye
Minisitiri Gatete yavuze ko uyu mwaka uzarangira imirimo yo kubaka ikibuga cy'indege cya Bugesera yatangiye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza