Ikibazo cy’igwingira ry’abana cyahombeje u Rwanda Miliyari 503 kigiye gushakirwa umuti

Yanditswe na Philbert Girinema
Kuya 12 Ukwakira 2016 saa 06:47
Yasuwe :
0 0

Ihuriro ry’Imiryango irwanya imirire mibi mu Rwanda, Scaling Up Nutrition (SUN) Alliance, rivuga ko rigendeye ku bushakashatsi bwakozwe na Minisiteri y’Ubuzima ifatanyije n’abandi bafatanyabikorwa muri 2012 bwagaragaje ko u Rwanda rwatakaje miliyali zirenga 503 muri uwo mwaka kubera ikibazo cy’imirire mibi no kugwingira kw’abana, ryiyemeje gukora ibishoboka byose ngo gikemuke.

Byagarutsweho kuri uyu wa 11 Ukwakira 2016 mu nama yahuje abakozi ba SUN Alliance n’abayobozi bo mu turere two mu Ntara y’Amajyepfo bagira aho bahurira bya hafi n’imibereho myiza y’abaturage.

Umuyobozi wa SUN Alliance, Butera John Robert Mugabe, yabwiye abitabiriye iyi nama ko kugeza ubu ibipimo byerekana ko mu Rwanda abana bari munsi y’imyaka itanu bagera kuri 38% bafite ikibazo cyo kugwingira kubera imirire mibi, kandi igihugu kikaba gitakaza amafaranga menshi kuri iki kibazo, bityo abasaba ko bagomba gufatanya bagashyira ingufu mu gushaka umuti urambye.

Yagize ati “Dukurikije ubushakashatsi bwakozwe na Cost of Hunger Report muri 2012, bugaragaza ko u Rwanda buri mwaka rutakaza miliyari 503 na Miliyoni 600 bitewe n’imirire mibi. Ni ukuvuga ngo ikibazo cy’imirire mibi gifite ingaruka zikomeye ku bukungu bw’igihugu, kuko ayo mafaranga yakabaye akora ibindi bikorwa by’amajyambere”.

Umuyobozi wa SUN Alliance, Butera John Robert Mugabe

Ngo aka kayabo Leta igakoresha muri gahunda zitandukanye zo kwita ku bana bagwingiye, harimo kubagurira imiti, kubaha uburezi mu mashuri kuko bakunze gusibira, ubukangurambaga bukorwa bugamije kurandura imirire mbi n’ibindi.

Butera yasobanuye ko inama yabereye mu Ntara y’Amajyepfo igamije ubukangurambaga mu nzego zitandukanye kugira ngo habeho ubufatanye mu kurandura burundu imirire mibi mu bana ibatera kugwingira, kandi bizakorwa mu Ntara zose z’igihugu.

Mu Rwanda hose ibipimo byerekana ko abana bari munsi y’imyaka itanu bagwingiye kubera imirire mibi bari ku kigereranyo cya 38%, naho mu Ntara y’Amajyepfo bari kuri 34.2%.

Intara y’Iburengerazuba niyo igaragaramo abana benshi bagwingiye kuko bari ku kigereranyo cya 45,9% igakurikirwa n’Amajyaruguru kuri 38,9%.

Mu Ntara y’Amajyepfo, Akarere ka Nyamagabe niko bigaragara ko gafite abana benshi bagwingiye ku kigereranyo cya 51%, igakurikirwa na Huye iri kuri 42,6% ndetse na Muhanga ifite 41,6%.

Abitabiriye inama batahanye isomo n’umukoro

Bamwe mu bayobozi batuturutse mu turere dutandukanye two mu Ntara y’Amajyepfo bitabiriye iyi nama bavuga ko bahungukiye byinshi byatumye bafata ingamba zigamije guca burundu imirire mibi aho bayobora.

Umuyobozi wungirije ushinzwe imibereho myiza y’abaturage mu Karere ka Muhanga, Fortune Mukagatana, yavuze ko yasanze aho ayobora abana bagwingiye ari benshi bityo akaba atahanye ingamba.

Mukagatana ati “Mu by’ukuri iwacu duhagaze nabi kuko turi kuri 41,6%, uyu munsi twunguranye ibitekerezo ku buryo aho imbaraga zikiri nke twahabonye, tugiye gukomeza ubukangurambaga kugira ngo dukemure iki kibazo.”

Umuyobozi wungirije ushinzwe imibereho myiza y’abaturage mu Karere ka Muhanga, Fortune Mukagatana

Mu bitekerezo byatanzwe n’abari bitabiriye iyi nama, bagaragaje ko bimwe mu bitera imirire mibi mu muryango harimo amakimbirane aba hagati y’abashakanye agatuma batita ku bana babo, inda zitateguwe zikomeje kugaragara ku bana b’abakobwa, ababyeyi batazi gutegura indyo yuzuye, ubukene n’ibindi.

Abayobozi biyemeje ko bagiye kongera imbaraga mu gukangurira abaturage guca imirire mibi, no kubaha inyigisho binyuze mu mugoroba w’ababyeyi, igikoni cy’umudugudu ndetse no ku bajyanama b’ubuzima.

SUN Alliance igizwe n’imiryango 79 ya sosiyete sivile igamije guhashya ibibazo by’imirire mibi mu Banyarwanda.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244