Kwamamaza

U Rwanda ruracyakusanya miliyoni 225 $ yo kubyaza MW 80 Nyiramugengeri y’i Gisagara

Yanditswe kuya 1-11-2016 saa 12:52' na Philbert Hagengimana


U Rwanda rushishikajwe no gukusanya amadolari ya Amerika miliyoni 225 yo kubaka uruganda rutunganya Nyiramugengeri rukayibyaza amashanyarazi azatanga Megawati 80 (80MW) guhera mu mwaka wa 2018.

Urwo ruganda ruzubakwa n’Ikigo Hakan Madencilik Ve Elektrik Uretim San. Tic. A.S cyo muri Turikiya, rukazubakwa mu gishanya cy’Akanyaru, mu Karere ka Gisagara.

Nk’uko byatangajwe na Minisitiri w’Imari n’igenamigambi, Ambasaderi Gatete Claver, urwo ruganda rukeneye miliyoni 225 z’Amadolari ya Amerika kugira ngo rutangire gukora bityo runatange inguzu z’amashanyarazi zingana na MW80 nk’uko biteganyije.

Ati “Turimo gukora umushinga mugari w’amashanyarazi ya Nyiramugengeri, uzadufasha kugera ku ntego yacu ya Megawati 563 (563 MW) bitarenze umwaka wa 2018. Bizadufasha gukwiza ingufu z’amashanyarazi ahagije ku iterambere ryacu mu bukungu. Ubu turimo gukusanya amafaranga kugira ngo dushyire mu bikorwa uwo mushinga.”

Hamwe mu hateganywa guturuka amafaranga azashyira mu bikorwa uwo mushinga ni muri PTA Bank, Banki y’Iterambere mu Rwanda (BRD), Banki Nyafurika y’ibyinjizwa n’ibyoherezwa mu mahanga (Afreximbank) yo yanateye inkunga umushinga w’inyubako ya Kigali Convention Centre.

Mu kiganiro yagiranye n’abanyamakuru mu cyumweru gishize, Umuyobozi wungirije wa Afreximbank, Dr. George Elombi yatangaje inkunga y’iyo banki mu mishinga itandukanye muri Afurika, aho yanagaragaje iyo izatanga muri uwo mushinga wa Nyiramugengeri, bikazaba byakozwe muri uku kwezi k’Ugushyingo.

Ati “Tunafasha ibikorwaremezo by’ingufu, ndetse hari n’uruganda rumwe rw’ingufu ruzatanga Megawati 80 z’amashanyarazi ya Nyiramugengeri rugiye gutangira vuba aha mu Rwanda, aho muri miliyoni 225 z’amadolari u Rwanda rukenewe Afreximbank izatangamo miliyoni 35.”

Inama y’Abaminisitiri yateranye kuwa Gatatu tariki 16 Ukuboza 2015 ni yo yemeje ko Guverinoma y’u Rwanda igirana amasezerano n’Ikigo Hakan Madencilik Ve Elektrik Uretim San. Tic. A.S cyo muri Turikiya, kigiye kubyaza MW 80 Nyiramugengeri yo mu Karere ka Gisagara.

U Rwanda rufite toni zisaga miliyoni 155 za Nyiramugengeri ziboneka kuri hegitari 50.000, kandi 77% by’iyo Nyiramugengeri biboneka mu nkengero z’umugezi w’Akanyaru, Nyabarongo, no mu kibaya cya Rwabusoro, yose ikaba ishobora gutanga Megawatt 450 mu myaka 25.

Mu myaka 20 ishize, REG ivuga ko abafite amashanyarazi bikubye inshuro zisaga icumi, ariko haracyari ibigomba gukorwa ngo amashanyarazi agere ku baturarwanda 70% bavuye kuri 24% bahari ubu, nk’uko Leta y’u Rwanda yabyiyemeje bitarenze 2018. Hateganywa ko icyo gihe u Rwanda ruzaba rufite mw 563 zivuye ku 161.2 zihari uyu munsi.

Minisitiri w'Imari n'Igenamigambi, Amb. Claver Gatete, yavuze ko u Rwanda rugikusanya amafaranga yo gushyira mu bikorwa umushinga wo kubyaza amashanyarazi Nyiramugengeri ya Gisagara
Umuyobozi wungirije wa Afreximbank, Dr. George Elombi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved