00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rukomeje gushaka amafaranga yo kubaka ikibuga cy’indege cya Bugesera

Yanditswe na Habimana James
Kuya 28 Mutarama 2019 saa 03:04
Yasuwe :
0 0

Leta y’u Rwanda ikomeje gushyira imbaraga mu gushaka amafaranga yo kubaka ikibuga cy’indege cya Bugesera, biteganyijwe ko kigomba kuba cyamaze kuzura mu mwaka wa 2020.

Minisitiri w’ibikorwa remezo Gatete Claver, yavuze ko leta y’u Rwanda ikomeje gukorana n’Ikompanyi ya Mota-Engil yo muri Portugal, kugira ngo haboneke amafaranga akenewe ngo kubaka iki kibuga birangire.

Mota-Engil yatangiye kubaka iki kibuga mu mwaka wa 2017 biciye mu bufatanye n’u Rwanda, bikaba biyiha uburenganzira bwo kugenzura iki kibuga mu myaka 25 kugira ngo igaruze ishoramari ryayo, aya masezerano ngo ashobora kongerwaho imyaka 15.

Biteganyijwe ko kubaka iki kubuga bizatwara amadorali miliyoni 820.

Mu mwaka wa 2018, Perezida Paul Kagame yavuze ko habayeho guhindura imyubakire y’iki kibuga, aho yagize ati “Guhindura imyubakire y’iki kibuga byarakozwe, twashakaga kugihindura mu myubakire kugira ngo kigire ireme kandi kibe cyakwaguka.”

Biteganyijwe ko icyiciro cya mbere cyo kubaka iki kibuga bigomba gutwara amadorali miliyoni 418, naho icya kabiri kigatwara amadorali miliyoni 382.

Uruhare rwa leta y’u Rwanda muri uyu mushinga ntabwo rushyirwa ahagaragara, ariko mu mwaka wa 2017 yagurishije imigabane yayo yari ifite muri I&M Bank, ya miliyoni 13.6 z’amadolari yo gufasha muri uyu mushinga.

Minisitiri Gatere yabwiye The East African ati “Turimo kuvugana n’abatuguriza bigendanye no gutera inkunga, mu gihe haba impinduka tuzababwira.”

Ku bijyanye niba koko uyu mushinga uzarangira uko byateganyijwe, Gatete yagize ati “Nubwo muri 2020 ariwo mwaka wo gusoza uyu mushinga, ariko buri gihe iyo ukora umushinga munini nk’uyu hari ibintu bimwe ugenda uhindura cyane cyane nko guhindura imyubakire, kongera ahava amafaranga n’ibindi, ibi rero bishobora kugira ingaruka ku bintu byinshi, uko ukomeza gushyira mu bikorwa nibyo bishyiraho igihe cyo gusoreza.”

Muri Kanama 2018, umwe mu bakurikiranira hafi imirimo yo kubaka iki kibuga Nuno Cesar Silva yatembereje abanyamakuru ba IGIHE, abasobanurira ishusho y’iki kibuga mu cyiciro cya mbere ndetse na nyuma yo kucyagura.

Muri rusange igice cy’inyubako cy’iki kibuga kingana na metero kare 13 000. Kizaba kirimo inyubako umunani ari zo; inzu y’abagenzi, ahagurirwa amafunguro n’ibindi, inzu yo kurwanya inkongi, iya Polisi, iy’umutwe ushinzwe kurwanya iterabwoba, umunara, inzu y’imizigo, inzu y’abatunganya ikibuga n’ibindi.

Kizaba gifite inzu y’abagenzi (Terminal), aho bazajya bahererwa serivisi zose, yaba kugenzura imizigo, umutekano n’ibindi. Iyi nyubako irimo kubakirwa umusingi izaba igeretse gatatu. Ibanziriza izindi (Basement), izaba irimo uburyo bwo kugenzura imizigo, amaduka n’ibindi.

Iyikurikiye (Ground Floor), izaba ifite ibice bibiri icy’ibumoso n’iburyo, kimwe kizaba gikoreshwa n’abagenzi bageze ku kibuga (arriving), bakenera serivisi za gasutamo, ibiro bishinzwe abinjira n’abasohoka, aho bakura imodoka, aho gutwara imizigo, amaduka n’izindi serivisi bakeneye nk’ibiro by’ivunjisha.

Iki gice kandi gifite aho abagenzi bazajya basohokera bakagera aho babona imodoka zo kubatwara (Taxi) cyangwa izindi modoka zaje gutwara abagenzi.

Ikindi gice cy’iyi nyubako kizaba gifite aho gusakira (Checking), aho kunyuza imizigo, aho bafatira amatike, ibiro bishinzwe abinjira n’abasohoka bagiye hanze y’igihugu.

Nyuma yo kuva muri iki gice, abagenzi bagiye hanze y’igihugu bazajya berekeza mu nyubako ya mbere (Floor) bategerereze indege. Iki gice kizaba kirimo amaduka baguriramo ibintu bitandukanye.

Ikibuga Mpuzamahanga cy’indege cya Bugesera kizubakwa mu byiciro bitanu, biteganyijwe ko mu bindi byiciro hashobora kuzubakwa hoteli n’ibindi bikorwa remezo, ahateganyirijwe abagenzi bafite indege zabo bwite n’ibindi.

Ku bijyanye n’aho indege zizajya ziparika, iki kibuga gifite ubushobozi zo kwakira indege za kabiri ku Isi mu bunini mu zitwara abagenzi, Airbus A350 zitwara abagenzi bari hagati ya 280 na 366.

Gifite ahantu haparika indege enye zo muri ubu bwoko kandi zigahabwa serivisi zose zikenera. Mu Rwanda izikoreshwa nini ni Boeing 737, kizaba gifite ubushobozi bwo kwakira nk’izi zigera kuri 11 cyangwa 12 ziparitse.

Hari kandi igice cyagenewe indege z’abanyacyubahiro (Presidential Terminal). Kizaba gifite ubushobozi bwo kwakira indege ebyiri za Airbus 350 no kwakira enye zo mu bwoko bw’izo RwandAir ikoresha.

Impamvu yo gutandukanya abagenzi basanzwe n’igice cyagenewe abanyacyubahiro, ni ukugira ngo ba Perezida n’abandi badipolomate bajye bagenda cyangwa baze, mu buryo butekanye, bikorwe bitarogoye izindi ngendo. Bizatuma abantu bazajya bategura ingendo ntibakerezwe n’uko wenda hari Perezida uri bukoreshe ikibuga.

Igice indege zigwaho n’aho zihagurukira (Runway), kirimo gukorwa ku buryo uyu mwaka uzarangira cyatunganye. Iki gice kireshya na kilometero 3.75.

Ikibuga mpuzamahanga cy'indege cya Bugesera kizubakwa mu byiciro bibiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .