U Rwanda rugiye kwifatanya n’ibindi bihugu kwizihiza umunsi wo kwibohora kwa Afurika

Yanditswe na Kanamugire Emmanuel
Kuya 18 Gicurasi 2017 saa 09:31
Yasuwe :
0 0

Kimwe n’ibindi bihugu bya Afurika ndetse n’andi mahanga, u Rwanda ruzizihiza umunsi wo kwibohora kwa Afurika ku itariki ya 25 Gicurasi 2017, hazirikanwa ibikorwa by’abakurambere mu guharanira ko uyu mugabane wigobotora ingoyi y’ubukoloni.

Uyu munsi washyizweho mu 1963 hagamijwe gukomeza guharanira ko ibihugu byose bya Afurika bigira ubwigenge bwuzuye, abaturage bagashobora kwigobotora inzitizi zose zituma batabaho neza.

Mu Rwanda insanganyamatsiko y’uyu munsi igaruka ku ruhare rw’itangazamakuru mu gufasha urubyiruko rwa Afurika kwimakaza ukwibohora kuzuye, ukazabimburirwa n’icyumweru cyahariwe ibikorwa bitandukanye birimo ibiganiro, umuganda n’ibindi.

Umuyobozi w’Umuryango ‘Pan African Movement (PAM)’, ugamije kwimakaza ihame ry’ubunyafurika mu banyarwanda ndetse no mu batuye uyu mugabane, Protais Musoni, yatangaje ko kwizihiza uyu munsi ari ukuzirikana ibyakozwe ngo ibihugu bibe bigeze aho bigeze uyu munsi.

Yavuze ko ari n’uburyo bwo guhaharanira kurenga ibikibangamira imibereho myiza, nk’intambara za hato na hato, kwibwa kw’umutungo kamere ukajya gukiza abandi aho gukiza abanyafurika.

Igikomeye cyane ariko ngo ni uko Abanyafurika bagira agaciro nk’abantu na bo ubwabo bakumva ko ibyo bakeneye bigomba kuva mu maboko yabo, bateza imbere umuco wo guhanga ibishya biganisha aheza kugira ngo Afurika igire ijambo mu ruhando mpuzamahanga.”

Kuba hari ibihugu by’ibihangange bifatira imyanzuro Afurika itigeze igira icyo ibazwa ni ikibazo kiraje ishinga uyu mugabane n’Umuryango PAM by’umwihariko, bituma uharanira ko hagira impinduka zibaho.

Musoni ati “ Hari ibihangange bikomeye ku Isi bishobora no gufatira Afurika ibyemezo bitayigishije inama. Ubu iyo Amerika ivuze ngo iki cye kuba bigenda bityo, u Burusiya bwavuga ngo iki ni kibe bikaba uko, u Bwongereza… ni uko … ni ibihugu bitanu biri ku migabane itandukanye, Afurika nta gihugu na kimwe ufite gishobora kuvuga ngo ibi bye kuba. N’imitegekere y’Isi igomba kuzamuka ntihazagire ikiba kuri Afurika itabanje kuvuga ngo ndabyemeye cyangwa ndabyanze.”

Yakomeje agira ati “Inzozi dufite ni ukuzagira Afurika Yunze ubumwe, ikungahaye idakennye, ubuhahirane n’ubufatanye busesuye, uburezi n‘uburere bushingiye ku muco wa Afurika, tutagomba kujya kubihaha ahandi, imbaraga zizateza imbere Afurika zikaba abanyafurika.”

Umuryango PAM uhamagarira abanyafurika n’abanyarwanda by’umwihariko kwibohora buri muntu ku giti cye bakanafatanya kubohora leta zabo mu ntumbero zo kugira Afurika Yunze Ubumwe.

Ikindi ni uguhora basesengura ibibazo bibera mu bindi bihugu nubwo byaba ibya kure, bikaganirwaho hakumirwa impamvu zishobora gutuma bibageraho.

Kugeza ubu haracyari byinshi bibangamiye ukwigenga kuzuye kwa Afurika harimo intambara za hato na hato Abanyafurika bashorwamo ku nyungu zitari izabo, ukwisuzugura gutuma benshi bumva ko bazakizwa no kujya i Burayi na Amerika binatuma benshi barohama mu Nyanja uko bukeye n’uko bwije.

Hari kandi n’abajyanwa gucuruzwa mu bindi bihugu bakisanga mu buzima bubi nyamara baribwiraga ko bagiye gusezera ku bukene.

Musoni yavuze ko abakora bene ibi kimwe n’ababibafashamo bakiboshye ndetse na leta zitabihagurukira zumva abaturage bazo baguye muri Méditerranée zifite ibibazo.

Nkwame Nkrumah, William Edward Burghardt Du Bois, Jomo Kenyata, Julius Nyerere ni bamwe mu banyafurika batangije gushaka kwigenga kwa Afurika.

Umuyobozi w’Umuryango ‘Pan African Movement (PAM)’, ugamije kwimakaza ihame ry’ubunyafurika mu banyarwanda ndetse no mu batuye uyu mugabane, Protais James Musoni

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza