00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rugiye gusubukura ibikorwa byo gukingira Covid-19

Yanditswe na Ndahayo Emmanuel
Kuya 28 Gicurasi 2021 saa 10:16
Yasuwe :
0 0

Minisiteri y’Ubuzima mu Rwanda yatangaje ko ibikorwa by’ikingira bigiye gusubukurwa, nyuma y’uko igihugu cyakiriye inkingo 247 000 binyuze muri gahunda ya Covax, igamije gufasha ibihugu kubona inkingo za Covid-19.

U Rwanda rwari rwaratanze inkingo 350 400 mu cyiciro cya mbere cy’ikingira, cyatangiye kuwa 5 Werurwe 2021. Inkingo 102 000 mu zatanzwe zari izakozwe n’uruganda rwa Pfizer, ndetse abazihawe bamaze kubona dose ebyiri zikenerwa kugira ngo umubiri wubake ubudahangarwa mu kwirinda Covid-19.

Ku rundi ruhande, abahawe urukingo rwa AstraZeneca bahawe dose imwe, ariko ibi ntacyo byari bitwaye kuko ubushakashatsi butandukanye bwemeje ko umuntu wahawe uru rukingo ashobora kubona urundi nyuma y’amezi atatu kandi ibi bikamufasha kugira ubudahangarwa buruta ubwo yari kuba afite iyo aruhabwa vuba.

Inkingo zakiriwe ni 247 000 zirimo 117 600 zatanzwe ku bufatanye n’igihugu cy’u Bufaransa, zazanywe na Perezida Emmanuel Macron mu ruzinduko rw’iminsi ibiri yarimo gukorera mu Rwanda.

Minisitiri w’Ubuzima, Dr. Daniel Ngamije, yatangaje ko u Rwanda rwiteguye gutanga izi nkingo mu gihe gito nk’uko byagenze ku nkingo za mbere zatanzwe kuva kuwa 5 Werurwe 2021.

Yagize ati “Twishimiye cyane ubufatanye na Guverinoma y’igihugu cy’u Bufaransa ndetse n’abandi bafatanyabikorwa bacu bagize uruhare mu kuboneka kw’izi nkingo. Twiteguye guhita dutangira gukingira duhereye ku bahawe urukingo rwa mbere rwa AstraZeneca.”

Kuri uyu wa 28 Gicurasi 2021, byitezwe ko inkingo zose zirara zigejejwe mu bigo nderabuzima aho zizatangirwa, ku buryo ku munsi w’ejo tariki ya 29 Gicurasi, zitangira gutangwa.

Byitezwe ko abantu bahawe urukingo rwa mbere rwa AstraZeneca ari bo bari buherweho bahabwa urukingo rwa kabiri, inzego z’ubuzima zifite imyirondoro yabo zikazakomeza kubaha ubutumwa bw’igihe bazabonera urukingo.

Ibikorwa by’ikingira mu Rwanda no muri Afurika byaradindiye bitewe n’uko igihugu cy’u Buhinde, ari nacyo gifite uruganda rwakoraga inkingo za AstraZeneca zoherezwaga muri Afurika muri gahunda ya Covax, cyakumiriye ko izo nkingo zikomeza kujyanwa hanze, bitewe n’ubwiyongere bukabije Covid-19 bumaze iminsi buyogoza u Buhinde.

Minisitiri Ngamije yavuze ko n’ubwo ibintu bimeze gutyo, u Rwanda ruzakomeza gukora iyo bwabaga mu kubona inkingo rukeneye kugira ngo ruzese umuhigo wo gukingira 60% by’Abanyarwanda bitarenze 2022.

Yagize ati “Dukomeje kandi ibiganiro n’abafatanyabikorwa kuira ngo n’izindi nkingo zikenewe ziboneke bityo dukingire umubare munini w’Abaturarwanda kuko ari bumwe mu buryo buzatuma dutsinda burundu iki cyorezo.”

U Rwanda rwateganyije ko ibikorwa byo kugura inkingo no kuzikwirakwiza mu gihugu hose, bizatwara miliyoni 120$, kandi ibi bikorwa bikazaba byarangiye mbere y’uko umwaka utaha urangira. Ni mu gihe muri uyu mwaka, nibura uzarangira 30% by’Abanyarwanda bamaze gukingirwa.

Muri rusange, u Rwanda rubarwa nka kimwe mu bihugu byitwaye neza mu guhangana na Covid-19, kuko kugera kuri uyu wa 27 Gicurasi, umubare w’abantu bamaze gupfa ari 351, abanduye iki cyorezo bose bakaba 26 843, mu gihe abakirwaye ari 1 039.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .