Kwamamaza

U Rwanda ntirwanyuzwe na raporo ya Mo Ibrahim mu by’umutekano

Yanditswe kuya 5-10-2016 saa 12:00' na Ntakirutimana Deus


U Rwanda ntirwanyuzwe n’icyegeranyo cyakozwe n’Umuryango Mo Ibrahim kigaragaza uko ibihugu bya Afurika bihagaze mu miyoborere kirushyira ku mwanya wa 15 mu bijyanye n’umutekano.

Icyo cyegeranyo cyatangarijwe i Londres mu Bwongereza ku wa Mbere tariki ya 3 Ukwakira 2016, kigaragaza ko Afurika yazamutse mu bijyanye n’imiyoborere mu myaka 10 ishize.

Muri rusange Afurika yiyongereyeho inota rimwe muri icyo cyiciro mu myaka 10 ishize. Guhera muri 2006, ibihugu 37 bifite abaturage bagera kuri 70% by’abatuye uyu mugabane byazamutse mu bijyanye n’imiyoborere.

U Rwanda ruri mu bihugu byiyongereye amanota muri rusange kuko rwiyongereyeho 8,4 mu nzego zose zisuzumwa, uko ari enye. Côte d’Ivoire yiyongereyeho amanota 13.1, Togo 9.7, Zimbabwe 9.7 na Liberia yiyongeraho 8.7.

U Rwanda kandi rwagarutse mu bihugu byongereye amanota mu bijyanye n’iterambere rya muntu mu myaka 10 ishize. Ruri ku mwanya wa kane mu cyiciro kimwe n’ibihugu nka Niger, Côte d’Ivoire, Togo na Kenya byose byiyongereyeho amanota arenga 10.

Muri rusange u Rwanda ruri ku mwanya wa 9 mu bihugu 54 mu bijyanye n’imiyoborere, aho rufite amanota 62.3%. Ruza kandi imbere muri Afurika mu bijyanye no guteza imbere icyaro. Ni urwa mbere mu guteza imbere uburinganire n’amanota 90.3%, ni ukuvuga ko rwazamutseho amanota 24.6 mu myaka 10 ishize.

U Rwanda ntirwanyuzwe kuri bimwe

Ku bijyanye n’umutekano u Rwanda rwashyizwe ku mwanya wa 15, umwanya rutishimiye ugereranyije n’uko umutekano warwo uzwi.

Umuyobozi w’Ikigo cy’Igihugu Gishinzwe Imiyoborere(RGB), Prof. Shyaka Anastase yavuze ko u Rwanda rutemera uko bimwe muri ibyo byiciro bikorwamo.

Yagize ati “Hari ibitakigibwaho impaka iyo abantu bavuga ko u Rwanda rwakataje mu bijyanye n’umutekano, ubundi mu by’ukuri ntibigishidikanywaho kuko hari ibindi bipimo byinshi ku Isi, hari ibyo natwe dufite hano mu gihugu, hari n’uko Abanyarwanda babayeho, umutekano si ibintu ushyira munsi y’akabati ni ibintu byivugira.”

Hari bimwe Mo Ibrahim yirengagije

“Iyo ukoze igipimo cy’umutekano ugasanga u Rwanda ruri mu bihugu bya nyuma muri Afurika, uba ufite ikibazo nawe cy’uko ubwo bushakashatsi wabukoze. Ni cyo kibazo rero kigenda kigaragara muri ibi bipimo by’imiyoborere, umutekano, kugendera ku mategeko n’uburenganzira bwa muntu."

Prof Shyaka yavuze ko icyo kibazo kigaragara mu ngengamikorere ya Mo Ibrahim, aho imibare agenderaho ngo ituma atagendera ku bintu bifatika; ahubwo ngo agendera ku bibogamye.

Ati “Aracyahusha kuko iyo urebye umutekano mu gihugu cyacu, Isi yose irabizi ko uza mu by’imbere, ku manota y’umutekano ya Mo Ibrahim, u Rwanda rukaza mu bihugu bya 15; [ushobora kugira utya ugasanga na bya bihugu twagiye guha umusada(gutabara) biri imbere yacu mu mutekano]. Ni ukuvuga ngo ukuntu abikora hari aho avana ibipimo bye mu nzego zitandukanye, mu bihugu bitandukanye i Burayi n’ahandi aho bafadite amakuru nyayo, bakagendera ku bintu bitanoze.”

Ku bijyanye no guharanira iterambere ry’abaturage, Shyaka yemeza ko u Rwanda rwabiharaniye rutangiza gahunda zitandukanye zigamije kubavana mu bukene.

Prof Shyaka akaba yemeza ko umwanya u Rwanda rwahawe ari uw’ukuri, ariko hari ahandi bitakozwe neza.

Ati “Ni ukuvuga biriya bindi iyo agiye gushaka amakuru ayashaka ashingiye ku buryo ibintu bimeze mu Rwanda, akayavana n’ahantu umuntu wese yasinyira, ariko kuri biriya bindi by’uburenganzira, by’umutekano afite ahandi ayakura. Ni bwo buryo bakoresha, baravuga bati ’aya makuru twebwe tuzayahabwa n’ikigo runaka cy’aha n’aha.”

Mu ntangiriro y’iyi raporo hagenzurwaga ibihugu 48 byo mu nsi y’ubutayu bwa Sahara, ariko ibigize Afurika byose byaje kongerwamo biba 54, ndetse n’ibipimo byakurikizwaga biva kuri 58 bigera kuri 95.

Ku mwanya wa mbere hari Ibirwa bya Maurice, bikurikiwe na Botswana na Cap Vert mu gihe mu ya nyuma hari Somalia na Sudani y’Epfo.

Ingingo zishingirwaho hakorwa iyi raporo ni iterambere rya muntu, ubwitabire bw’abaturage n’uburenganzira bwa muntu, amahirwe arambye mu by’ubukungu, umutekano n’ubuyobozi bugendera ku mategeko.

Umuyobozi w’Ikigo cy’Igihugu Gishinzwe Imiyoborere(RGB), Prof. Shyaka Anastase ntiyemeranwa na raporo ya Mo Ibrahim ishyira u Rwanda ku mwanya wa 15 ku bijyanye n'umutekano

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 11 Ukuboza 2016
Copyright © 2009 -2014 - IGIHE Ltd - All Rights Reserved