00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda na Turikiya bigiye gufatanya mu burezi, inganda na siporo

Yanditswe na Iradukunda Serge
Kuya 7 Nzeri 2021 saa 04:34
Yasuwe :
0 0

Leta y’u Rwanda n’iya Turukiya byashyize umukono ku masezerano y’ubufatanye mu bijyanye n’uburezi, inganda na siporo.

Ku ruhande rw’u Rwanda, aya masezerano yasinywe na Minisitiri w’Ubabanyi n’Amahanga n’Ubutwererane, Dr Vincent Biruta uri mu ruzinduko rw’akazi muri Turikiya rugamije gushimangira umubano mwiza ibihugu byombi bisanzwe bifitanye

Ku ruhande rwa Turikiya yashyizweho umukono na Minisitiri w’Ububanyi n’Amahanga w’iki gihugu, Mevlüt Çavuşoğlu.

Mevlüt Çavuşoğlu yavuze ko u Rwanda ari igihugu cy’inshuti kandi gihahirana na Turukiya, gusa yemeza ko ubu buhahirane bukwiye gukomeza gutezwa imbere.

Ati “Ubucuruzi bukorwa hagati y’ibihugu byombi buri mu gaciro ka miliyoni 81$, habayeho ukwiyongera ugereranyije na 2019 nubwo hari icyorezo cya Coronavirus, ariko ntibiragera ku rwego twifuza. U Rwanda rutanga amahirwe ku bigo byacu kandi turabona nabyo biyabyaza umusaruro.”

Mevlüt Çavuşoğlu yavuze ko ibihugu byombi biri gukorana kugira ngo hazarebwe uburyo Perezida Kagame yagirira uruzinduko muri Turukiya.

Amakuru dukesha Daily Sabah avuga ko Minisitiri Biruta yagize umwanya wo kubonana no kuganira n’abashoramari bo muri Turukiya. Yashimye kandi umusanzu iki gihugu cyahaye u Rwanda mu bijyanye no kurwanya COVID-19.

Biruta yavuze ko u Rwanda na Turukiya biri gukorana bya hafi mu rwego rwo kwimakaza Isi irangwa n’amahoro n’umutekano.

U Rwanda na Turikiya bisanzwe bifitanye imikoranire mu nzego zitandukanye zirimo n’iz’umutekano by’umwihariko polisi.

Muri Werurwe 2020 Polisi y’u Rwanda na Polisi yaTurukiya bemeranyije gukomeza gushimangira ubufatanye mu nzego zitandukanye by’umwihariko mu kubaka ubushobozi.

Ni igikorwa cyabaye ubwo Umuyobozi Mukuru wa Polisi y’u Rwanda, IGP Dan Munyuza yari mu ruzinduko rw’iminsi itatu muri Turikiya ku butumire bwa mugenzi we uyobora Polisi y’iki gihugu, Dr Mahmet Aktas.

Mu 2015 kandi Leta y’u Rwanda n’iya Turikiya, i Ankara, zasinyanye amasezerano ashimangira ubufatanye hagati y’ibihugu byombi, icyo gihe kandi Polisi y’u Rwanda ndetse na Polisi ya Turikiya basinye amasezerano y’ubufatanye mu bijyanye no guhanahana amahugurwa mu kurwanya iterabwoba, kurwanya ibyaha by’ikoranabuhanga, amahugurwa y’umutwe udasanzwe wa Polisi (Special forces ) ndetse no guhugura abapolisi bazahugura abandi.

Minisitiri w'Ububanyi n'Amahanga w'u Rwanda, Dr Vincent Biruta na mugenzi we wa Turukiya, Mevlüt Çavuşoğlu bashyize umukono ku masezerano y'ubutwererane mu bijyanye n'uburezi, inganda na siporo
U Rwanda na Turikiya bisanzwe bifitanye umubano mwiza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .