Kwamamaza

U Rwanda na Maroc mu kwezi kwa buki!

Yanditswe kuya 27-10-2016 saa 17:02' na Philbert Girinema na Cyprien Niyomwungeri


Burya koko ifuni ibagara ubucuti ni akarenge; umubano w’u Rwanda na Maroc nubwo uri mu mezi yawo ya mbere, magingo aya urahumeka umwuka umwe wuje ibinezaneza nka bimwe by’urugo rushya mu minsi ya mbere iganisha ku munezero w’igihe kirekire, bya bihe Abongereza bita "honeymoon" cyangwa ukwezi kwa buki mu rurimi rwacu.

U Rwanda ruherutse kwakira umushyitsi udasanzwe; Umwami Mohammed VI wa Maroc. Nubwo uyu mwaka rwakiriye abakuru b’ibihugu basaga 45 mu bihe bitandukanye, bwari ubwa mbere mu myaka 10 ishize rwakiriye umwami nyuma ya Mswati mu 2005.

Uruzinduko rw’Umwami Mohammed VI mu Rwanda rwari rwihariye ku mpamvu nyinshi; yaje agaragiwe n’abantu barenga 150 baje mu ndege eshanu zirimo iyaje imuhetse ikoze mu buryo ifite amagorofa abiri. Mu baje bamugaragiye harimo abaminisitiri, abagize Inteko Ishinga Amategeko, abanyemari, yewe n’abo mu muryango we barimo mubyara we ndetse n’inshuti ze za bugufi ntabwo yari yazisize.

Mu gihe yari bumare iminsi itatu gusa mu Rwanda, Umwami Mohammed VI yaryohewe n’urwa Gasabo birangira ahamaze itandatu yose, ku buryo byahungabanyije gahunda y’uruzinduko yari kugirira muri Tanzania akiva mu Rwanda kuko rwaje kwigizwa inyuma.

Mbere y’uko tugaruka kuri byinshi bidasanzwe byaranze uruzinduko rw’uyu mwami, dusubize gato amaso inyuma.

Umubano w’u Rwanda na Maroc wateye intambwe ya mbere ndende hagati y’itariki 20 na 21 Kamena ubwo Perezida Kagame, umuyobozi usasirwa ibishura n’ibihugu byo mu Burengerazuba bwa Afurika byiganjemo ibyabaye imbata y’u Bufaransa na n’ubu bigishaka uko byabwigobotora yageraga i Rabat .

Yagiriye uruzinduko muri Maroc, yakirwa by’agahebuzo muri Dâr-al-Makhzen [ingoro y’umwami] i Rabat n’Umwami Mohammed VI. Byari ibirori mu bindi dore ko uyu mushyitsi muhire yahuriranye n’ukwezi gutagatifu maze akazuba ka kiberinka kamuritse basangira Iftar.

Uyu musangiro waje uherekeza ibyishimo n’ibinezaneza n’icyubahiro cyagaragajwe n’Umwami Mohammed VI mwene Hassan wa II, wari umaze kwambika Perezida Kagame umudali uruta indi yose mu gihugu witwa Wissam Al-Mohammadi. Ni umudali ukozwe muri diyama itavangiye ariko wungikanyije inshuro 19 mu nteranyirizo zikoze muri zahabu. Urabagirana mu mabara aho ugenda wihindagura uba move cyangwa iroza.

Umwami wa Maroc, Mohammed VI yambitse Perezida Kagame umudali ukoze muri diyama itavangiye

Urwo ruzinduko rufatwa nk’urwari rugamije kumvisha Maroc ko igomba kugaruka muri Afurika Yunze Ubumwe dore ko u Rwanda rwiteguraga kwakira iyo nama idasanzwe. Icyakora hari andi makuru avuga ko Umwami Mohammed VI, yatumiye Perezida Kagame, kuko mu myaka itanu cyangwa itandatu ishize ubwo u Rwanda rwabaga ruri mu Kanama k’Umutekano ka Loni, rwakunze gushyigikira ibitekerezo byabaga byazanywe na Maroc.

Perezida Kagame yakiriwe mu musangiro n'Umwami Mohammed VI

Kuki ari Kagame?

Kuki ari Kagame umwami wa Maroc yatumiye? Kuki atahisemo bariya bayobora ibihugu byifite mu bukungu kurusha u Rwanda? Igisubizo kigaragazwa n’intambwe u Rwanda rwateye mu myaka 22 ishize ishimangira ubudasa bw’umuyobozi warukuye mu manga akarugeza aho rugeze ubu hishimirwa hafi na buri wese mu gihe nta mahirwe yahabwaga yo kubigeraho.

Kuva Conakry, Cotonou, Libreville n’i Algiers muri Algeria hose batondagura inshinga ’Kagamé’, nk’icyifuzo cy’umuyobozi umeze nka Perezida Paul Kagame w’u Rwanda bifuza.

Babishingira ku kuba ariwe wabashije kuzahura u Rwanda nyuma y’imiborogo ya 1994 ntawabitekerezaga none ubu rukaba ruza ku mwanya wa karindwi muri Afurika mu kugira imyaka myinshi y’icyizere cy’ubuzima aho ingana na 66.1, rukaba nya mbere mu koroshya ubucuruzi, mu ishoramari, ikoranabuhanga, imiyoborere myiza no guteza imbere uburinganire.

Binajyana kandi n’icyerekezo cye ku gihugu n’umugabane muri rusange nk’umuyobozi udahwema kuvuga ko Afurika ikwiye kurenga imitekerereze y’ubukoroni ikigobotora ingoyi ya ba gashakabuhake ahubwo ikabana nabo mu bwubahane. Ni imitekerereze igirwa n’umugabo igasiba undi ku buryo abayigize bose ubu bitwa intwari. Nta mpamvu rero yo kudakorana nayo mu gihe ihari.

Ibi n’ibindi bitarondereka nibyo bituma bose bamwifuza aka wa mukobwa mwiza mu rusisiro. Byageze n’aho hari bamwe baza kumurahuraho ibanga, aha twavuga nka Talon wa Benin, Bongo n’abandi.

Umwami wa Maroc yagendeye kuri iri jabo atumira Kagame agira ngo amufashe kumvisha abandi bakuru b’ibihugu ko agace ka Sahrawi kamburwa ubunyamuryango bwa AU akabona kugarura igihugu cye muri uyu muryango. Aha ho yari amukeneye cyane kuko kugakuramo bisaba kamarampaka y’ibihugu bigize umuryango.

Sahrawi (Sahara y’Uburengezuba) yari agace ka Maroc ariko kuva mu 1975 yemewe nka leta yigenga, iza kuba n’Umunyamuryango wa AU. Maroc irashaka ko kabaho kigenga ariko gafatwa nk’igice cyayo dore ko ntawundi muryango mpuzamahanga ukemera nk’igihugu.

Umwami Mohammed VI yakirijwe imbyino za Kinyarwanda ubwo yageraga i Kigali. Igihugu cye umwaka ushize cyakoresheje ingengo y'imari ingana na miliyari 34.4 z'ama-Euro

Iminsi itatu yahindutsemo itandatu…

Ku mugoroba wo kuwa 18 Ukwakira 2016 nibwo Boeing 747-400 yasesekaye i Kanombe. Ni indege rutura igura hagati ya miliyoni 234 na 266.5 z’amadolari asaga miliyari 215 Frw.

I Kanombe hari hahindutse nka Casablanca Mohammed V Airport kuko usibye iyi Boeing hari izindi ndege enye zaherekeje uyu mwami wa cyenda utegetse Maroc kuva ikinyejana cya 20 cyatangira.

Itsinda ry’abayobozi ba Maroc, Abagize Inteko Ishinga Amategeko, abashoramari n’abaherwe, abayobora ibigo by’ishoramari n’itsinda ry’abanyamakuru, tutibagiwe abashinzwe umutekano; bose hamwe bagera ku 150 nibo bari baherekeje uyu mwami mu rugendo rw’imbonekarimwe i Kigali. Nari nibagiwe kuvuga kandi ko hari isinzi ry’abahereza b’umwami n’ibyegera bye bya hafi.

Ntibikunze kubaho kandi ko umuntu wasuye u Rwanda yakirwa n’abayobozi bo mu nzego hafi ya zose z’igihugu kuko kuri uriya munsi kuva ku bo mu Rugwiro kugera ku bayobora ibigo bitandukanye bose bari berekeje i Kanombe aharirimbiwe Cherifian yubahiriza iki gihugu.

Mu ndorerwamo ya Kigali, KCC, Umwami wa Maroc yakirijwe imbyino n’umurishyo wa Kinyarwanda; by’agahebuzo iyi nyubako imuha ikaze mu mabara y’ibendera ry’igihugu ategeka.

Mu mujyi rwagati uko amasaha yicumaga niko umutekano wakazwaga. Inzira zose zerekeza kuri Marriot Hotel, imwe muri hoteli ebyiri mu gihugu zifite icyumba cyakira Umwami [Executive King Suite] zari zafunzwe nta wapfaga kuzinyuramo.

Executive King Suite ni icyumba kigari kurusha ibisanzwe gitatse biteye amagengeza. Kirimo igitanda kigari gihora gishashe neza (keretse umwami yibikiriye) n’intebe zishobora guhuriramo abantu barenga 10 bagakora inama. Kirimo murandasi inyaruka n’indabo zitoshye. Kirisanzuye ugereranyije n’ibindi ndetse gifite ahantu Umwami atekera (yicara) akareba hanze ahirengeye. Muri make, buriya ashobora kuba yari yitegeye Kacyiru, Rebero...

Dâr-al-Makhzen, Ingoro y’Umwami Mohammed VI

Yarambagiye Kigali n’amaguru...

Uyu mwami w’imyaka 53 (yavutse kuwa 21 Kanama 1963) wimye ingoma kuwa 23 Nyakanga 1999 asimbuye se Hassan II wari umaze gutanga, ntawashidikanya ko yavukanye imbuto kuko umunsi yageze ku Isi, Se yahise avuga ati ‘Umwami ni uyu’.

Yashakanye na Salma Bennani bafitanye abana babiri barimo Moulay Hassan wavutse mu 2003 akaba yaragenwe nk’umusimbura we na Lalla Khadija wo mu 2017.

Ubwo yari mu Rwanda yarambagiye igihugu atikandagira dore ko n’isuku yacyo iri mu byirahirwa. Kuwa Gatanu tariki 21 Ukwakira yagaragaye mu iguriro ryo mu muturirwa wa Kabiri muri KCT ricuruza imirimbo, mu gusohoka aca ahirengeye azamuka n’amaguru yemye yerekeza ahari imodoka ze. Uyu munsi yari yambaye bisanzwe ndetse aherekejwe n’imodoka mbarwa, yewe yari yicishije bugufi ku buryo na bake mu bamurinda yari kumwe nabo, hari aho yabonye bashaka kwigiza abantu kure ye, arabatambamira kuko wabonaga ameze nkuri iwe mu rugo ntacyo yishisha.

Kwiyumva nk’uri muri Dâr-al-Makhzen i Rabat byari byabaye no ku munsi ubanziriza uwo wa Gatanu kuko yagaragaye mu Rugunga ahacururizwa imitako ya Kinyarwanda. Urugendo rwe rwagombaga kumara iminsi itatu ariko kubera ‘urugwiro’ yakiranywe, rwamaze iminsi itandatu [hari na bamwe bari hafi ye bemeza ko ashobora kuba yaratashye atabishaka].

Ubusanzwe Umwami Mohammed VI ni umwana wa kabiri akaba umuhungu mukuru w’umwami Hassan II ku mugore we wa kabiri Latifa Hammou. Se yashishikajwe cyane no kumwigisha ibijyanye n’amahame y’idini na politiki agifite imyaka ine, aho yabyigiraga mu ishuri ry’ubwami ryitwa Qur’anic.

Afite impamyabumenyi y’icyiciro cya kabiri cya Kaminuza mu by’amategeko yabonye mu 1985 muri Kaminuza yitiriwe Umwami Mohammed V i Agdal, ari nawo mwaka yagizwemo Colonel Major mu ngabo z’Umwami wa Maroc aho yari umuhuzabikorwa w’ibiro na serivisi z’Ingabo z’Umwami kugeza mu 1994. Amaze imyaka 22 abonye ipeti rya Major General mu ngabo z’umwami yanabereye Umugaba w’ikirenga.

Ikindi kandi mu 1993 yahawe impamyabumenyi y’ikirenga, PhD ayikuye muri Kaminuza yo mu Bufaransa.

Avuga Icyarabu, Icyongereza, Icyesipanyolo n’Igifaransa. Ni umutegetsi wijeje abaturage be kurwanya ruswa n’ubukene, kubahangira imirimo no guharanira uburenganzira bwa muntu. Mu 2004 yahinduye itegeko ry’umuryango, agamije guha umugore ijambo. Ni umutegetsi urangwa no gushyigikira demokarasi.

Mohammed VI ni umunyemari ukomeye mu mabanki, aho mu 2009 Forbes yagaragaje ko yashoyemo miliyari 2.5 z’amadolari ya Amerika. Imwe muri Banki ibarizwa mu mutaka w’ishoramari rye, Attijariwafa, iherutse kugura 76.19% bya Cogebanque, imwe muri Banki zikomeye mu Rwanda.

Umwami Mohammed VI yagombaga kumara iminsi itatu mu Rwanda amara itandatu

Miliyoni z’amadolari zatangiye kuva i Rabat ziza i Kigali

Amasezerano y’ubufatanye 22 hagati y’ibihugu byombi yashyizweho umukono mu minsi yari mu Rwanda. Ubaze mu mafaranga, ni akayabo kuko ufashe miliyoni 41 z’amadolari (asaga miliyari 33 Frw), ukongeraho imishinga y’indi y’akayabo nko kubaka inzu ziciriritse zigera ku 5000 mu Murenge wa Ndera zizatwara miliyoni 68 z’amadolari (asaga miliyari 54 Frw), miliyoni y’ama-euro yahawe Imbuto Foundation, n’indi mishinga nko kubaka uruganda rw’imiti, ishuri ry’ikoranabuhanga,.. uru rugendo koko rwari ingirakamaro ndetse ni imbonekarimwe nka za nyama z’imfizi.

Maroc ni igihugu cyateye imbere kiri ku buso bwa Km2, 446 550 n'abaturage miliyoni 34

Perezida Kagame yashimye cyane uru ruzinduko ashingiye ku musaruro rwatanze, avuga ko rwazamuye umubano w’ibihugu byombi.

Ati ‘‘Kubera uru ruzinduko, twazamuye cyane umubano wacu na Maroc kandi turashaka kugera kure. Hari n’ibindi bihugu mu Muryango wa Afurika Yunze Ubumwe byifuza kunyura muri iyi nzira. Umubano wacu tugomba kuwongerera imbaraga ariko bikajyana n’icyo ubyara haba mu ishoramari, ibikorwaremezo, umuco, amacumbi na serivisi z’imari.”

Umwami Mohammed VI nawe yamwoherereje ubutumwa bw’ishimwe agira ati “Mu gihe mvuye mu kirere cy’igihugu cyanyu, aho nsoje uruzinduko rw’akazi muri Repubulika y’u Rwanda, nashakaga kubashimira byimazeyo, no kubereka ko nezerewe kubera uburyo budasanzwe mwanyakiriyemo hamwe n’abo twari turi kumwe.”

Umubano w’u Rwanda na Maroc ni urugero rwiza rw’uko ibihugu bya Afurika bikwiye kubana, bibyaza umusaruro amahirwe byifitemo binyuze mu bufatanye, nyuma akaba aribwo bigana amahanga ya kure. Ibi ni nabyo Perezida Kagame akunze kugarukaho.

Kigali Convention Center yakaga amabara y'ibendera rya Maroc
Mu 2005 umusaruro mbumbe (GDP) wa Maroc wanganaga na miliyari 100.36 z’Amadolari ya Amerika
Kuboneza urubyaro muri Maroc byamaze kuba umuco kuko umugore umwe abarirwa abana 2.5 mu gihe mu Rwanda ari 4.1. Icyizere cyo kubaho cyo ni imyaka 74.3
Ibikorwa remezo i Rabat bizamurwa ubutitsa

[email protected], [email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved