Kwamamaza

U Rwanda na Congo mu gufatanya gucukura peteroli na Gaz Methane mu Kivu

Yanditswe kuya 11-11-2016 saa 07:28' na Mukwaya Olivier


Nyuma yaho u Rwanda rutangiye gucukura gaz methane mu kiyaga cya Kivu; biturutse ku masezerano abakuru b’ibihugu byombi bagiranye ubwo bahuriraga i Rubavu muri Kanama, hari ibikorwa byatangiye byo gushakisha na peteroli muri iki kiyaga gihuriweho n’u Rwanda na Congo.

Mu masezerano Abaminisitiri b’u Rwanda na Congo bafite mu nshingano zabo umutungo kamere bagiranye kuri uyu wa 10 Ugushyingo, bagaragaje ko ikiyaga cya Kivu kidafite gaz methane yonyine kuko harimo indi myuka myinshi ikenewe ndetse ibihugu byombi byiyemeje ubufatanye mu kuyibyaza umusaruro.

Umuyobozi w’ikigo gishinzwe gukwirakwiza ingufu (REG), Mugiraneza Jean Bosco, ari nawe wari ukuriye impuguke ku ruhande rw’u Rwanda, yemeza ko ikiyaga cya kivu gishobora kuba igisubizo cy’ikibazo cy’ingufu z’amashanyarazi ku bihugu byombi.

Ati “Ubu Gaz ducukura ingana na Megawatt 26 mu gihe ikiyaga cya kivu ubwacyo gifite ubushobozi bwo gutanga 700 kandi zigakoreshwa mu myaka mirong itanu bivuze ko ikibazo cy’amashanyarazi cyaba gicyemutse kuko ubu agera ku banyarwanda 27%.”

“…Kuri peteroli nayo ubushakashatsi bugeze kure n’imishinga ikomeye ariko ibihugu byombi bizabishobora kuko abakuru b’ibihugu bafite ubushake”

Minisitiri w’Umutungo Kamere, Dr Vincent Biruta, yemeza ko nubwo Congo itaragira na kimwe muri ibi bikorwa itangira, ngo byakabaye byiza iyi mirimo igiye ikorwa ku bufatanye bw’ibihugu byombi.

Ati “U Rwanda rwatangiye gukoresha amashanyarazi akomoka kuri gaz methane, Congo na yo izatangira imirimo vuba, uyu munsi rero turi kumvikana ukuntu twabikorera hamwe maze abaturage bakabasha kubona ibyiza bituruka kuri ubu bukungu.”

Ku ruhande rwa Congo, Minisitiri w’ingufu, Aime Ngoy Mukena, yatangaje ko imyaka 41 ishize ibihugu byombi byiyemeje kubyaza umusaruro ikiyaga cya Kivu ihagije kandi ko abakuru b’ibihugu babishimangiye ubwo baheruka.

Yagize ati “Ikiyaga ni icyacu twembi nitubona peteroli tuzayicukura twese ku bw’inyungu rusange kandi turarara dusinye amasezerano yo kuvana ingufu mu mutungo kamere uri mu kiyaga cya Kivu nkuko ba perezida bombi babyumvikanyeho ubwo baheruka guhura.”

Ministri Vincent Biruta mu rugendo yagiriye i Goma kuri uyu wa Kane taliki 10 Ugushyingo 2016 yagiranye inama mu muhezo n’abayobozi ba Congo bari bakuriwe na Minisitiri w’Ingufu Aime Ngoy Mukena na Guverineri w’Intara ya Kivu y’Amajyaruguru Julien Paluku Kahongya.

Iyi nama yakurikiwe n’itangira ry’akanama ka tekiniki kagizwe n’impuguke zo mu bihugu byombi zigomba kunoza iyi mishinga ibihugu byiyemeje mu nama yabereye muri Serena Hotel i Rubavu .

Akanama k'impuguke kateraniye i Rubavu muri Serena Hotel
Impuguke mu bya tekiniki ku mpande z'ibihugu byombi ziri mu biganiro
Guverineri Julien Paluku Kahongya Gouverineri wa Kivu y'Amajyaruguru
Ministri Biruta na mugenzi we Aime Ngoy Mukena i Goma

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved