00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda na Congo byasinyanye amasezerano atatu

Yanditswe na Muhonzire Sylvine
Kuya 26 Kamena 2021 saa 06:10
Yasuwe :
0 0

U Rwanda na Repubulika Iharanira Demokarasi ya Congo byasinyanye amasezerano ari mu byiciro bitatu bitandukanye bigamije gutsura ubuhahirane hagati y’ibihugu byombi harimo n’agena amahame yo gukuraho gusoresha kabiri ibicuruzwa byambukiranya imipaka.

Aya masezerano yasinywe kuri wa 26 Kamena 2021, mu ruzinduko Perezida Paul Kagame yagiriye muri Congo nyuma y’aho mugenzi we Félix Tshisekedi asuye u Rwanda ku wa 25 Kamena 2021.

Uru ruzinduko abakuru b’ibihugu byombi bagiriye mu Rwanda no muri Repubulika Iharanaira Demokarasi ya Congo, rwibanze ku kureba ibyangijwe n’ikirunga cya Nyiragongo haba mu Karere ka Rubavu no mu mujyi wa Goma, ndetse bagirana ibiganiro bigamije gutsura umubano hagati y’ibihugu byombi, harimo no kunoza ubuhahirane.

Mu bindi byakozwe harimo gusinya amasezerano hagati y’ibihugu byombi, aho mu yasinywe harimo ayashyizweho umukono na Minisitiri w’Ubucuruzi n’Inganda w’u Rwanda, Habyarimana Beata na Minisitiri w’Ubucuruzi Mpuzamahanga wa RDC, Jean-Lucien Bussa Tongba, ajyanye no guteza imbere no kurinda ishoramari hagati y’u Rwanda na Congo.

Andi masezerano yasinywe hagati ya Minisitiri w’Imari n’Igenamigambi w’u Rwanda, Uzziel Ndagijimana na Minisitiri w’Imari wa Congo, Nicolas Kazadi, amasezerano agena amahame yo gukuraho imisoro itangwa kabiri ku bicuruzwa byambukiranya imipaka y’ibihugu byombi.

Amasezerano ya gatatu yasinywe ajyanye n’ubufatanye hagati y’inzego z’abikorera mu bihugu byombi, ku ruhande rwa RDC yashyizweho umukono na Fidele Basenenane Kasongo, Umuyobozi Mukuru wa Société Aurifère du Kivu et du Maniema (Sakima S.AA) mu gihe ku ruhande rw’u Rwanda Jean Pierre Rutagarama ubarizwa mu rwego rw’abikorera ari we wayashyizeho umukono.

Byitezwe ko aya masezerano azatuma ubucuruzi n’ubuhahirane byiyongera kandi akarushaho gutsura umubano w’ibihugu byombi ku bw’inyungu z’abaturage b’ibihugu by’u Rwanda na RDC.

Nibura kugeza mu 2019 ku mupaka muto (Petite Barrière) uhuza ibi bihugu, hanyuraga abantu bari hagati y’ibihumbi 40 na 45 buri munsi.

Minisiteri y’Ubucuruzi n’Inganda yatangaje ko ubucuruzi bwambukiranya imipaka hagati y’u Rwanda na Congo bwari bufite agaciro ka miliyoni 120 z’amadolari mu 2018.

Ibihugu byombi byasinyanye amaseserano arimo agamije gukuraho gusoresha kabiri ibicuruzwa byambukiranya imipaka
Umupaka munini uzwi nka La Corniche uhuza u Rwanda na Repubulika Iharanira Demokarasi ya Congo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .