U Rwanda na Congo Brazaville biri mu nzira zo guhererekanya abanyabyaha

Yanditswe na Jean Pierre Tuyisenge
Kuya 19 Mata 2017 saa 05:35
Yasuwe :
0 0

Abadepite bagize Komisiyo y’Ububanyi n’Amahanga n’Ubutwererane mu Nteko Ishinga amategeko y’u Rwanda basuzumye umushinga w’itegeko ryemerera kwemeza burundu amasezerano yo kohererezanya abakekwaho ibyaha n’abahamwe na byo hagati ya Repubulika y’u Rwanda n’iya Congo.

Ni umushinga ushingiye ku masezerano yashyirizweho umukono i Brazaville muri Repubulika ya Congo, kuwa 9 Ugushyingo 2013, ariko amategeko abigena agateganya ko iryo hererekanya ry’abanyabyaha bibanza kwemezwa mu nteko z’ibyo bihugu.

Umunyamabanga wa Leta muri Minisiteri y’Ubutabera ushinzwe Itegeko Nshinga n’andi mategeko, Me Evode Uwizeyimana, yavuze ko niriramuka ryemejwe rizafasha u Rwanda cyane cyane mu kwihutisha kuzana abakekwaho ibyaha bya Jenoside bari muri icyo gihugu.

Yagize ati “U Rwanda rufitemo inyungu cyane cyane muri aya masezerano kuko nk’uko mubizi, hari abantu tugishakisha bakoze ibyaha bya Jenoside hano mu Rwanda na n’ubu bakihishahisha hirya no hino mu bindi bihugu, mu byo barimo rero na Congo irimo, ngira ngo mwumvise ko duheruka gusinya n’andi masezerano yo muri ubu bwoko na Malawi.”

Ni itegeko ryitezweho gukuraho inzitizi z’amategeko zajyaga zibaho, aho hari aho bajyaga bashaka kuzana abakekwaho ibyaha cyangwa abashaka kurangiriza ibihano byabo mu Rwanda cyangwa muri Congo ariko bikabangamirwa n’uko nta masezeraho yo guhererekanya abanyabyaha ariho.

Amasezerano Mpuzamahanga agenga ibyo kohererezanya abashinjwa ibyaha, asaba ko igihugu umunyabyaha yoherejwemo, kigomba kubanza kwerekana niba kiteguye guha uwo muntu ubutabera buciye mu mucyo, niba azabona umwunganizi ubishoboye kandi wishyurwa na Leta, Evode akaba ari byo aheraho avuga ko ari ubutabera buhenze.

Kugeza ubu umuntu u Rwanda rukuye hanze ruba rugomba kumwishyurira umwunganizi utari munsi ya miliyoni 15 z’amafaranga y’u Rwanda, kandi ava mu ngengo y’imari ya leta.

Komisiyo izashhyikiriza Inteko rusange y’abadepite uyu mushinga w’itegeko ryemerera kwemeza burundu amasezerano yo kohererezanya abakekwaho ibyaha n’abahamwe na byo hagati ya Repubulika y’u Rwanda n’iya Congo.

Umunyamabanga wa Leta Me Evode Uwizeyima na Perezida wa Komisiyo y’Ububanyi n’Amahanga n’Ubutwererane mu Nteko Ishinga Amategeko Mutimura Zeno

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza