Kwamamaza

U Rwanda n’Ubwami bwa Morocco byashyize umukono ku Masezerano 19 y’Ubutwererane

Yanditswe kuya 19-10-2016 saa 16:46' na Cyprien Niyomwungeri


U Rwanda n’Ubwami bwa Maroc byasinyanye amasezerano 19 y’ubutwererane ari mu nzego eshatu z’ingenzi ari zo ubukungu, politiki, imibereho myiza; byose byakozwe mu gihe Umwami wa Maroc, Mohammed VI ari mu ruzinduko mu Rwanda.

Mbere yo gushyira umukono kuri aya masezerano, Perezida Kagame n’Umwami Mohammed VI babanje kugirana ibiganiro byihariye byabereye muri Village Urugwiro.

Minisitiri w’Ububanyi n’Amahanga w’u Rwanda, Louise Mushikiwabo yavuze ko uruzinduko rw’Umwami Mohammed VI rukomeye ku Rwanda kandi aya masezerano yasinywe ari ibyo bemeranyijwe n’ubwami bwa Maroc ubwo Perezida Kagame yasuraga iki gihugu muri Kamena uyu mwaka.

Yagize ati “Maroc ubundi ni igihugu dufitanye umubano mwiza ariko hashize igihe nta bikorwa bifatika dufite, igihe twariyo mu ruzinduko rwa Perezida wa Repubulika y’u Rwanda nibwo twemeje ko tugiye guhuza ibihugu byacu mu nzego zitandukanye tukareba ibyo twakorana ndetse tukihutisha ibishobora kwihuta tukabikora twihuse, niho aya masezerano twasinye uyu munsi yaturutse.”

Yakomeje avuga ko mu biganiro impande zombi zagiranye bemeranyije ko nubwo basinye amasezerano icyihutirwa ari ukugira ngo havemo umusaruro mu buryo bwihuta.

Amwe mu masezerano yasinywe

Amasezerano yashyizweho umukono harimo agamije ubufatanye mu by’umutekano hagati y’ibihugu byombi, agamije guteza imbere ibigo bito n’ibiciriritse; guteza imbere ibice byahariwe inganda mu Rwanda, agamije kubyaza ingufu nyiramugengeri n’andi.

Harimo kandi amasezerano mu by’amabanki nk’aho Banki yo muri Maroc yaguze imigabane muri Cogebanque; agamije kubaka inzu ziciriritse i Ndera ndetse n’ayo gushyiraho urwego rufasha abakora ubucuruzi hagati y’ibihugu byombi.

Hari kandi amasezerano yo guteza imbere ubukerarugendo aho abaturage b’ibihugu byombi bazagenderanira babifashijwemo n’andi masezerano yasinywe yo guhana uburenganzira bw’indege bizatuma mu minsi mike RwandAir ijyayo na Air Maroc ikaza mu Rwanda.

Yiyongeramo ay’abashoramari bo muri Maroc bazubaka uruganda mu Rwanda rukora imiti n’ibindi bikoresho byifashishwa mu buvuzi , banahubake ishuri ry’Ikoranabuhanga muri Afurika.

Minisitiri w’Imari n’Igenamigambi, Gatete Claver yavuze ko iyi ari intangiriro nziza kandi izabyara umusaruro ufatika no mu bihe bizaza.

Yagize ati “Ni intangiriro nziza cyane ku ruzinduko rw’Umwami wa Maroc, ni icyubahiro kinini twishimira cyane nk’Abanyarwanda tubona ko iyi ntangiriro ikomeye cyane, twazayubakiraho kugira ngo turebe ko twakubaka umubano wacu hagati y’u Rwanda na Maroc.”

Umuyobozi w’Ikigo cy’Igihugu gishinzwe kwihutisha iterambere, RDB, Francis Gatare, yongeyeho ko abashoramari bo muri Maroc baje mu Rwanda bari ku rwego rwo hejuru kandi ibikorwa byabo n’ubufatanye bazagirana n’abo mu Rwanda buzazamura igihugu.

Yagize ati “Abashoramari bo muri Maroc baje hano uyu munsi bari ku rwego ruhanitse mu bumenyi n’ubushobozi ku nzego zitandukanye kandi mu bintu bitandukanye, abashoramari baganiriye bamenyanye, bumvikanye uko bazafashanya. Bizatugirira akamaro nk’igihugu cyane cyane abikorera bacu kubera ubwo bufatanye. Bizafasha mu kongera umuvuduko mu iterambere ry’igihugu cyacu.”

Ku munsi w’ejo biteganyijwe ko hazasinywa andi masezerano yihariye agamije guteza imbere ubuhinzi.

Perezida Kagame asuhuza bamwe mu bagize itsinda ryazanye n'Umwami wa Maroc
Amwe muri aya masezerano ashyirwaho umukono n'abayobozi bo ku mpande zombi
Umwami wa Maroc na Perezida Kagame bagiranye ibiganiro byihariye

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved