Kwamamaza

U Rwanda n’u Burundi bibanye bite? Ibisubizo bya Minisitiri Mushikiwabo

Yanditswe kuya 11-11-2016 saa 10:04' na Philbert Hagengimana


U Rwanda n’u Burundi byari ibihugu by’ibivandimwe kuva ku ngoma za Cyami kugeza muri Repubulika, ibyo bigasobanurwa n’amasezerano byasinye y’uko nta na kimwe kizatera ikindi,ajyanye no gutabarana mu bihe by’amage nk’igihe cy’inkongi i Bujumbura ndetse n’umwenda u Rwanda rwabwishyuriye.

Icyakora haje kuzima uwatse kuva ubwo muri iki gihugu hatangiraga imvururu z’abamagana manda ya Gatatu ya Perezida Nkurunziza, maze Abarundi benshi batangira guhunga, ubutegetsi bw’icyo gihugu bugashinja u Rwanda kugumura abaturage ngo bahunge ariko rwo rubihakana rwivuye inyuma.

Abategetsi b’u Burundi bakunze gushinja u Rwanda gutoza abajya guhungabanya umutekano muri icyo gihugu, imipaka irafungwa Abanyarwanda bariyo bagirirwa nabi haba n’ibindi bikorwa by’ubushotoranyi.

Mu kiganiro yagiranye n’abanyamakuru kuri uyu wa 11 Ugushyingo, Minisitiri Mushikiwabo yagarutse ku mubano w’u Rwanda n’u Burundi ashima ko imvururu zahosheje, ariko ngo ibibazo ntibyakemutse.

Minisitiri Mushikiwabo yagize ati “Nk’uko mubibona, imvururu zisa n’izahosheje, ariko ikibazo nticyakemutse mu by’ukuri. Icyo twakoze nk’igihugu nk’uko twanabigarutseho mu biganiro n’abanyamakuru biheruka, uburyo bwiza bw’u Rwanda bwo kugira icyo bukora kugira ngo u Burundi buve muri ibyo bibazo, ni ukujya kure y’ibitarumvikanwagaho bituruka ku ruhande rw’icyo gihugu.”

“Yaba ubushotoranyi n’indi myitwarire idahwitse twabonye kuva icyo gihugu cyakwinjira mu mvururu, twahisemo kwituriza. Byaratubabazaga ariko bwari bwo buryo bwiza bwo kugira ngo tudatuma ikibazo kirushaho gukara.”

Yakomeje avuga ko nta gihugu kindi gishobora kwivanga muri ibyo bibazo, kuko u Burundi ari igihugu gifite ubusugire no mu gufata ibyemezo, yongeraho ko ikibabaje ari uko ku cyemezo cyo gufunga imipaka, aba mbere gifiteho ingaruka ari Abarundi babuzwa uburenganzira bwo kuza gucururiza ibyabo mu Rwanda kandi ari bwo buzima bari bamenyereye.

Ati “Ikibabaje ni uko ibicuruzwa byambukiranya imipaka byahagaritswe, birababaje kuba abakene bo hakurya y’umupaka badashobora kuwambuka ngo bagurishe ibyo batunze kandi ari bwo buzima bwabo bwa buri munsi, ariko na none nta byinshi twabikoraho kuko si igihugu cyacu.”

Minisitiri Mushikiwabo yakomeje avuga ko u Rwanda rwiteguye kuba rwagirana umubano mwiza n’u Burundi, ati “Abarundi ni abavandimwe, ni abaturanyi, ariko ibyemezo byafashwe n’abayobozi b’igihugu kandi nta ruhare twabigiramo, gusa bifite ingaruka zikomeye ku Barundi kuko ku ruhande rwacu, abaturage bacu bafite amahirwe menshi yo gukora ubucuruzi hamwe n’ibindi bihugu, cyangwa kubona ibikorwa bibateza imbere mu bukungu imbere mu gihugu.”

Yakomeje avuga kandi ko ari ah’ubutegetsi bw’u Burundi ngo bureke abaturage babwo biteze imbere bakorera ubucuruzi bwabo mu Rwanda.

Ubusanzwe Abarundi babashaga kwikenura bakaza gucururiza mu Rwanda imbuto nk’imyembe, amacunga, n’ibindi biribwa nk’amafi, indagara n’amamesa. Bo babashaga gutahana ibicuruzwa byakorewe mu nganda nk’ifu y’ibigori, iy’ingano, ifu y’imyumbati, n’ibindi.

Minisitiri Mushikiwabo yavuze ko u Rwanda rwahisemo kwitarura ubushotoranyi bw’u Burundi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved