U Rwanda mu nzira yo kwemeza amasezerano yo gukumira ikwirakwizwa ry’intwaro nto

Yanditswe na Akayezu Jean de Dieu
Kuya 12 Ukwakira 2018 saa 09:40
Yasuwe :
0 0

Ubuyobozi bw’Umuryango RECSA, urwanya ikwirakwizwa ry’intwaro nto n’iziciriritse mu baturage, bwashimiye u Rwanda nka kimwe mu bihugu bikomeje gutanga umusanzu mu ishyirwa mu bikorwa ry’amasezerano agamije kurwanya ikwirakwiza ry’intwaro nto mu baturage.

Byatangajwe mu ntangiro z’iki Cyumweru mu Nama y’Iminsi ibiri yari igamije ubukangurambaga muri gahunda yo kwemeza amasezerano mpuzamahanga yerekeye ubucuruzi bw’intwaro nto n’iziciriritse.

Aya masezerano u Rwanda rutaremeza burundu rwayasinye muri 2013, rujya ku rutonde rw’ibihugu bitanu birimo u Burundi, Djibouti, Tanzania na Repubulika Iharanira Demokarasi ya Congo.

N’ubwo uyu muryango ugizwe n’ibihugu 15, ibimaze kwemeza ishyirwa mu bikorwa ry’aya masezerano ni bibiri aribyo Sychelles na Repubulika ya Centrafrique.

Uhagarariye u Rwanda muri aya masezerano, Costa Habyara yabwiye IGIHE ko kuba bataremeza aya masezerano biterwa na zimwe mu mpamvu zibanza gusuzumwa mu mategeko, ariko kuba igihugu cyarashyize umukono kuri aya masezerano ari intambwe ikomeye cyateye.

Mu 2016 u Rwanda rufatanyije n’uyu muryango wa RECSA hangijwe toni 55 z’intwaro zari zishaje zirengeje igihe.

U Rwanda kandi rwavuguruye itegeko rigenga imikoreshereze y’intwaro nka kimwe mu bisabwa n’uyu muryango.

Umunyamabanga w’Umuryango RICSA, Lt. Gen. Badreldin Elamin Abdelgadir, yashimiye u Rwanda nka kimwe mu bihugu bikomeje gutanga umusanzu kugirango ishyirwa mu bikorwa ry’aya mazezerano rigende neza.

Yagize ati “Muri ibi bihugu byose bigize umuryango turashima intambwe u Rwanda rumaze gutera mu kurwanya ikibazo gikomeye kirebana n’ikwirakwizwa ry’intwaro nto mu karere, ikindi ubu ni igihugu gitekanye.”

Minisitiri w’Ubutabera akaba n’Intumwa Nkuru ya Leta, Busingye Johnston yavuze ko aya masezerano azafasha mu kugenzura inshingano z’ibihugu mu mikoreshereze y’intwaro nto n’iziciriritse, bigakorwa mu buryo bukurikije amategeko.

Yagize ati “Iyi si turimo irimo inyungu nyinshi, muziko ibamo intambara nyinshi n’ibindi bikorwa bikoresheje by’ubugizi bwa nabi intwaro, muzi ko ibamo ubushimusi bw’abantu n’inyamanswa bikoreshejwe intwaro, muzi ko ibamo intambara hagati y’abantu.”

“Ibyo byose rero dushaka ko buri gihugu kigira uruhare mu gukumira no kurwanya ikwirakwiza ry’izo ntwaro nto zikoreshwa muri ibyo bikorwa bikoma mu nkokora iterambere ry’Isi.”

Umuryango RECSA washinzwe muri 2000, ufite icyicaro i Nairobi muri Kenya. Mu nshingano zawo harimo kurwanya ikwirakwizwa ry’intwaro nto n’iziciriritse mu baturage.

Ifoto y'urwibutso nyuma y'ibiganiro ku isinywa ry'amasezerano yo kurwanya ikwirakwizwa ry'intwaro nto, mu ntangiriro z'iki cyumweru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza