U Rwanda mu bihugu byiyemeje kuzaba bikoresha ingufu zitangiza ikirere mu 2050

Yanditswe na Kanamugire Emmanuel
Kuya 20 Ugushyingo 2016 saa 04:19
Yasuwe :
0 0

Ibihugu byiganjemo ibikomeje kwibasirwa n’ingaruka z’ihindagurika ry’ibihe byiganjemo ibiri mu nzira y’amajyambere, byiyemeje kuzaba bikoresha gusa ingufu zisazura bitarenze mu 2050, umwanzuro watangajwe ku munsi wa nyuma y’inama yiga ku ihindagurika ry’ibihe, yaberaga i Marakech muri Maroc.

Ihuriro ry’ibihugu birimo u Rwanda bihangayikishijwe cyane n’ingaruka z’imihindagurikire y’ibihe rikomatanya ibihugu 43, ‘Climate Vulnerable Forum’, ryasohoye itangazo ko ingufu z’amashanyarazi bikoresha zizaba ari iz’izisazura, hagati ya 2030 na 2050.

Ibihugu biri muri iri huriro birimo nka Bangladesh ihangayikishijwe bikomeye n’izamuka ry’igipimo inyanja y’Abahinde yari isanzweho, n’ibindi bihugu nka Maldives n’ibirwa bya Marshall Islands bitorohewe n’imyuzure ishingiye ku ihindagurika ry’ibihe.

Byiyemeje kandi ko bizagaragaza gahunda bifite mu guca burundu carbon ikomeza koherezwa mu kirere bitarenze 2020.

Mu itangazo ryagiye ahagaragara nyuma ya COP22 yasojwe kuwa Gatanu w’iki cyumweru, rivuga ko ibyo bihugu “bizaharanira kubyaza umusaruro 100% by’ingufu zisazura mu gihugu vuba bishoboka, bigaharanira gukuraho ikibazo cy’ingufu z’amashanyarazi zidahagije no kurengera amazi n’ikibazo cy’ibiribwa, hitawe ku kibazo cya buri gihugu.’’

Iri huriro rikomeje gukora ibishoboka ngo bibashe gukumira izamuka ry’igipimo mpuzandengo cy’ubushyuhe bw’Isi muri iki kinyejana, kikaguma hasi ya dogere 2°C ariko intego ikaba ko kigera hasi ya dogere 1.5°C nk’uko byari bimeze mbere y’umwaduko w’inganda.

Ni amasezerano yakiriwe neza ku bihugu byugarijwe n’ibibazo by’ihindagurika ry’ibihe, aho Mattlan Zackhras, Minisitiri mu birwa bya Marshall, yagize ati “Ubu tubimburiye impinduka zigamije 100 ry’ikoreshwa ry’ingufu zisazura, ariko turashaka ko n’ibindi bihugu bikurikira mu ntambwe zacu hagamijwe gukumira burundu ibiza turi guhura na byo birimo imiyaga ikomeye, imyuzure n’amapfa.’’

Ibihugu byemeranyije kuri ayo masezerano birimo u Rwanda Afghanistan, Haïti, Philippines, Bangladesh, Honduras, Barbados, Kenya, Saint Lucia, Senegal, Burkina Faso, Madagascar, Sudani y’Epfo n’ibindibitandukanye bihangayikishijwe by’umwihariko n’ikibazo cy’ihindagurika ry’ibihe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza