00:00:00 IGIHE NETWORK KN KINYARWANDA EN ENGLISH FR FRANCAIS

U Bwongereza bugiye gukuraho amabwiriza yose yo kwirinda Covid-19

Yanditswe na Umwali Zhuri
Kuya 5 Nyakanga 2021 saa 11:23
Yasuwe :
0 0

Minisitiri w’Intebe w’u Bwongereza, ategerejwe kuza kwemeza amabwiriza mashya agenga abatuye icyo gihugu, ari bukureho andi yose yari yarashyizweho mu rwego rwo kwirinda ikwirakwira ry’icyorezo cya Covid-19.

U Bwongereza bumaze gukingira nibura 63% by’abantu bakuru bamaze guhabwa dose ebyiri z’urukingo rwa Covid-19, mu nkingo zirenga miliyoni 78 zimaze gutangwa.

Iki gihugu ariko kimaze iminsi kibona ubwiyongere bw’ubwandu bwa Covid-19 cyane cyane bitewe n’ubwoko bushya bwa Coronavirus buzwi nka Delta, bufite ubushobozi bwo kwandura no kwica vuba kurusha ubusanzwe, bukaba bugize 99% by’ubwandu bushya buri kugaragara mu Bwongereza.

Ku munsi w’ejo abantu barenga ibihumbi 24 basanzwemo Covid-19, abandi 15 bitaba Imana kandi iyi mibare iri kuzamuka.

Boris Johnson yavuze ko Leta ye igiye gukuraho ingamba zose zari zijyanye n’amabwiriza yo kwirinda ikwirakwira rya Covid-19, avuga ko abaturage bakeneye “ubwigenge bwabo” kandi ko “bazakoresha umutimanama wabo mu guhitamo icyo bakwiye gukora mu kurinda amagara yabo.”

Byitezwe ko Inteko Ishinga Amategeko izatera ku itariki ya 12 Nyakanga ikaganira kuri iki cyemezo cyakwemezwa kikazatangira gushyirwa mu bikorwa ku itariki ya 19 Nyakanga.

Nikimara kwemezwa bizaba bivuze ko amabwiriza arimo kwambara agapfukamunwa, guhana intera no kudakora ibiterane by’abantu benshi yose azavanwaho, maze ubuzima bugasubira nk’uko bwari bumeze mbere y’icyorezo, icyakora abazashaka gukomeza kubahiriza amabwiriza, ntabwo bazabihanirwa.

U Bwongereza buri kwitegura gutanga dose ya gatatu y’urukingo rwa Covid-19 ku bantu bafite ibyago byinshi byo kwandura Covid-19 n’abari hejuru y’imyaka 50 mu rwego rwo kongera ubwirinzi bw’umubiri wabo mbere y’itangira ry’ibihe by’ubukonje.

Mu ntangiriro za Shampiyona y'u Bwongereza mu kwezi gutaha, byitezwe ko abafana bazagaruka ku kibuga badasabwe kubahiriza amabwiriza yo kwirinda ikwirakwira rya Covid-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .