U Bwongereza: Abanyarwanda baba i Leeds bishyuriye mitiweli abapfakazi 147

Yanditswe na Kanamugire Emmanuel
Kuya 26 Kanama 2016 saa 09:03
Yasuwe :
0 0

Abanyarwanda baba mu Mujyi wa Leeds mu Bwongereza hamwe n’abo mu bindi bihugu bahuriye mu muryango witwa “Common Cause”, bishyuriye ubwisungane mu kwivuza ku bapfakazi 147 hirya no hino mu Rwanda.

Perezida wa Repubulika Paul Kagame, ntahwema gushishikariza abanyarwanda gukura amaboko mu mufuka, ngo bakore biteze imbere bityo banateze imbere igihugu, aho anakangurira abatuye hanze y’u Rwanda kubigenza batyo mu bihugu barimo ariko bakanibuka n’urwababyaye.

Aho ni ho haturutse igitekerezo cy’abatuye mu Mujyi wa Leeds mu Bwongereza, cyo gukora cyane aho bari ariko bakibuka no kugira icyo bafasha abatishoboye basize mu Rwanda nk’uko IGIHE yabitangarijwe na Jimmy Kanyambo, intumwa y’umuryango ‘Common Cause’, woherejwe gushyikiriza ubwo bufasha abo bugenewe.

Kanyambo yagize ati “Gahunda ya Leta y’u Rwanda isaba ko buri wese akura amaboko mu mufuka. Natwe turi hanze, twatekereje icyo twakorera igihugu cyacu, duhera ku gufasha abadafite mitiweli, ariko gahunda turateganya kuzafata nk’abana tukajya tubishyurira amafaranga y’ishuri.”

Ku ikubitiro mu gikorwa cy’uwo muryango cyo gufasha, bahereye ku kwishyurira ubwisungane mu kwivuza abapfakazi 147, barimo 48 bo mu miryango 17 mu Murenge wa Gahini ho mu Karere ka Kayonza, imiryango 17 irimo abantu 48 mu Karere ka Gakenke, n’abandi.

Kanyambo yakomeje avuga ko abo bantu 147 bazajya bishyurirwa Ubwisungane mu kwivuza buri mwaka, gusa ngo bakaba bashobora kuziyongera.

“Common Cause” ni Umuryango udaharanira inyungu, ushinzwe gufashanya mu buryo bw’imibereho, ukaba uhuriwemo n’abantu baturuka mu bihugu bisaga 10 (Rwanda, Kenya, Uganda, Burundi, Republic Democratic of Congo, France, Belgium, United Kingdom, Italy), batuye mu Mujyi wa Leeds ho mu Bwongereza.


Niba ushaka kuduha inkuru waduhamagara kuri 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza