Kwamamaza

U Buyapani n’u Rwanda mu kunoza imikoranire nyuma y’inama ya TICAD

Yanditswe kuya 30-08-2016 saa 08:00' na Ezechiel Mbananabo


Ku Cyumweru tariki ya 28 Kanama 2016 nibwo hasojwe Inama Mpuzamahanga ya gatandatu ya Tokyo yiga ku iterambere rya Afurika (Tokyo International Conference on African Development) yaberaga i Nairobi muri Kenya.

Yari igamije kongera imikoranire isesuye hagati y’u Buyapani n’umugabane wa Afurika cyane cyane mu bucuruzi,umuco n’ikoranabuhanga nk’uko Ishami ry’Ikoranabuhanga mu Rugaga rw’Abikora mu Rwanda ribisobanura.

Nyuma y’uko muri iyi nama hafatiwemo imyanzuro itandukanye irimo kongera ubufatanye mu by’ubucuruzi n’ubukungu muri rusange hagati y’u Buyapani na Afurika, kuri uyu wa Kabiri habaye inama yahurije hamwe abahagarariye ibigo bitandukanye by’abikorera mu Rwanda ndetse no mu Buyapani mu rwego rwo kuganira ku buryo hanozwa imikoranire.

Imikoranire hagati y’ibihugu byombi isanzwe yaratangiye by’umwihariko hagati y’Ishami ry’Ikoranabuhanga mu Rugaga rw’Abikora mu Rwanda nk’uko byatangajwe na Robert N. Ford, Umuyobozi wungirje waryo.

Iyi mikoranire irimo nk’umushinga K Initiative washyizweho hagati y’u Rwanda na Kaminuza yo mu Mujyi wa Kobe yigisha ibijyanye na mudasobwa (Kobe Institute of Computing) aho ugamije kongera umubare w’Abanyarwanda bakora ibijyanye na gahunda za mudasobwa, ku buryo nyuma yo kwiga ibigo byo mu Buyapani bizajya bibaha akazi bari mu Rwanda binyuze mu kohereza ibyo bikeneye ko byakorwa ubundi bikishyura.

Hari kandi n’abandi Banyarwanda bajya kwigayo ibintu bitandukanye, aho bamara amezi atandatu yo kwitoza umwuga bakorana n’amakompanyi yo muri icyo gihugu nyuma yo kurangiza kwiga.

Robert yagize ati “Turashaka guhuza ibigo byo mu Buyapani n’ibyo mu Rwanda kugira ngo bigire imikoranire kandi turizera ko mu gihe gito tuzaba dufite ibigo byo mu Buyapani bikorera mu Rwanda cyangwa Abanyarwanda bakorera yo.”

Umuyobozi w’Umuryango w’u Buyapani w’Ubucuruzi bwo hanze mu Mujyi wa Kobe ( Japan External Trade Organization), Hisashi Yamada, yagaragaje ko nabo biteguye kubaka umubano hagati y’amakompanyi akomeye y’i Kigali mu mu Rwanda ndetse n’ayo mu Mujyi wa Kobe, by’umwihariko mu guteza imbere ikoranabuhanga hagati y’ibihugu byombi.

Muri iyi nama, hatangiwemo ibitekerezo bitandukanye nko kuba hashyirwaho ikigo cyigisha ikinyarwanda mu Buyapani, ndetse n’icyigisha ikiyapani mu Rwanda,kandi hagashyirwaho uburiro butegura indyo za buri gihugu.

Nubwo bikiri mu nyigo,ngo biramutse byemejwe byatuma ubuhahirane n’imikoranire bigenda neza hagati by’ibihugu byombi.

Mu bigo by’u Buyapani bifite ubushake bwo gukorera mu Rwanda harimo Ottawa Denki Engeneering gifasha mu gukumira inkuba, Toyota Tsusho gikora ibijyanye n’ubucuruzi na Kobe Institute of Computing cyatangiye cyo cyanatangiye ubufatanye mu 2013.

Naho mu byo mu Rwanda bifite ubushake bwo gukorana n’u Buyapani harimo Vision technologies, ASI-D gikwirakwiza mudasobwa, Ishami ry’Ikoranabuhanga mu Rugaga rw’Abikorera mu Rwanda ndetse na Wiredin gikora porogaramu za mudasobwa.

Umuyobozi wungirije w'Ishami ry’Ikoranabuhanga mu Rugaga rw’Abikora mu Rwanda, Robert N. Ford
Umuyobozi w’Umuryango w’u Buyapani w’Ubucuruzi bwo hanze mu Mujyi wa Kobe ( Japan External Trade Organization), Hisashi Yamada
Bamwe mu bitabiriye ibi biganiro

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved