U Buyapani bugiye gushora miliyoni $3.3 mu bikoresho bicunga umutekano ku mipaka ya EAC

Yanditswe na Twarabanye Venuste
Kuya 9 Ugushyingo 2019 saa 11:01
Yasuwe :
0 0

Guverinoma y’u Buyapani n’Ishami ry’Umuryango w’Abibumbye rishinzwe Imishinga inyuranye (UNOPS) byashyize umukono ku masezerano ya miliyoni $ 3.3 azakoreshwa mu mushinga ugamije gushyira ibikoresho bicunga umutekano ku mipaka y’ibihugu byo mu Muryango wa Afurika y’Iburasirazuba.

Uyu mushinga washyizweho hagamijwe koroshya ubucuruzi no gucunga umutekano.

Ni amasezerano yashyiriweho umukono i Nairobi muri Kenya, hagati ya Guverinoma y’u Buyapani na UNOPS, ku wa 8 Ugushyingo 2019.

Impande zombi zatangaje ko hazashyirwaho ibikoresho byifashishwa mu gucunga imipaka mu bihugu bitanu bya EAC bikazafasha gukuraho inzitizi mu bucuruzi, ibikorwa by’iterabwoba, ubucuruzi bw’intwaro ntoya n’ibiturika, bibangamiye iterambere ry’ubukungu muri Afurika y’Iburasirazuba.

Muri izo miliyoni hazashyirwa ibikoresho ku mipaka y’u Burundi, Kenya, Rwanda, Tanzania na Uganda.

Ibikoresho bizashyirwa ku mipaka birimo ibyuma bireba ibyo umuntu aba yahishe mu myambaro, ubwato bucunga umutekano, ibikoresho bitwarika bisuzuma ibigize imiti cyangwa ibinyobwa mu buryo bwihuse, imodoka zicunga umutekano n’ibikoresho bitahura ibiyobyabwenge by’umwihariko ku Rwanda n’u Burundi.

Ubucuruzi ni imwe mu nkingi ya mwamba mu guteza imbere ubukungu bwo mu Karere ariko buracyafite imbogamizi nyinshi.

Ibibazo by’iterabwoba n’ubucuruzi bw’intwaro ntoya n’ibiturika, bibangamiye ubukungu n’imikoranire y’ibihugu muri Afurika y’Iburasirazuba.

Gushyiraho ibikoresho bicunga umutekano bikaba ari indi ngamba yo kurwanya ubucuruzi bw’ibiyobyabwenge, bitemewe nka mugo.

Mu kurwanya izo nzitizi ku mutekano no guteza imbere ubukungu, ibihugu bitanu bya EAC byasabye Guverinoma y’u Buyapani gutanga ubufasha mu koroshya ubucuruzi no gucunga imipaka.

Ikigo cy’u Buyapani cy’Ubutwererane Mpuzamamahanga (JICA) gitangaza ko mu gushyira mu bikorwa uwo mushinga wo koroshya ubucuruzi no gucunga imipaka muri Afurika y’Iburasirazuba, UNOPS izakurikirana ishyirwa mu myanya ry’ibyo bikoresho.

Mu kubikora hakazanashyirwaho ubufasha ku biro bishinzwe za gasutamo.

Guverinoma y’u Buyapani isanzwe ifasha ibihugu bya EAC ku bijyanye n’imicungire y’imipaka mu mushinga “One Stop Border Post projects in EAC” kuva mu 2007 binyuze muri JICA.

Uyu mushinga mushya uzahangana n’ibyaha mpuzamahanga biba byateguwe, umutekano muke mu bucuruzi n’ibibazo by’iterabwoba bikomeje kwiyongera ku Isi, ku mipaka ya EAC.

JICA itangaza ko muri uwo mushinga bazamenyeramo ibindi bikenewe kugira ngo umutekano ku mipaka ube udadiye.

Umushinga uzamara amezi 18 uzashimangira umutekano mu bucuruzi mu kuzamura ubukungu muri Afurika y’Iburasirazuba.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza