U Busuwisi: Hari abiyemeje kusa ikivi cya Dr Naasson Munyandamutsa

Yanditswe na Kanamugire Emmanuel
Kuya 16 Ugushyingo 2016 saa 12:56
Yasuwe : XX
0

Ubwo bari mu muhango wo kwibuka Dr Naasson Munyandamutsa witabye Imana muri Werurwe uyu mwaka, hari benshi mu bakoranaga bya hafi na we bari bateraniye i Genève mu Busuwisi biyemeje gukomeza ibikorwa n’imishinga yari yaratangije.

Yaba Prof. François Ferrero wahoze ayobora ishami ry’ubuvuzi bw’indwara zo mu mutwe mu Busuwisi, André Laubscher uyobora ishami ry’ubuvuzi mu bitaro bya kaminuza by’i Genève ndetse na Madamu Marie Odile Godard, umuvuzi w’indwara zo mu mutwe mu Bufaransa akaba yarafatanyaga na Dr Naasson mu gushakira bimwe mu bisubizo ikibazo cy’ihungabana mu Rwanda, n’abandi bose bashimangiye ko ibikorwa bakoranaga na Dr Naasson bazabikomeza n’imishinga bari bafitanye itazadindira.

Ibi babitangaje ubwo Abanyarwanda n’inshuti zabo batuye ku mugabane w’u Burayi mu mpera z’icyumweru gishize ku wa 12 Ugushyingo 2016,bahuriye mu mujyi wa Genève mu Busuwisi mu gikorwa cyo kwibuka Dr Naasson Munyandamutsa.

Iki gikorwa cyo kwibuka uyu mugabo wagize ubutwari bukomeye mu isanamitima, guharanira amahoro, kurwanya ihungabana ndetse n’ibindi nyuma ya Jenoside yakorewe Abatutsi mu Rwanda cyari cyateguwe ku bufatanye na Ibuka, Ishami ryo mu Busuwisi.

Perezida wa Ibuka mu Busuwisi Dr Gakuba Michel yavuze ko kwibuka Dr Naasson ari ugukaza imfuruka z’ibyo yasize akoze, cyane cyane mu gusana imitima y’Abanyarwanda batari bake nyuma ya Jenoside yakorewe Abatutsi, ubwo yavuraga abari bafite ikibazo cy’ihungabana muri icyo gihe nta gihembo ategereje.

Mu ijambo rye Ambasaderi w’u Rwanda mu Busuwisi, Ngarambe François Xavier, yavuze ko Munyandamutsa yamubonyemo indangagaciro nyinshi.

Yagize ati “Yabaye umwizerwa kuri benshi bari buzuye agahinda ibyo batinyaga gushyira hanze babonye uwo babisukaho bararuhuka.”

Ambasaderi Ngarambe yashimangiyeko ubutwari n’ibigwi bya Dr Munyandamutsa bizahora byibukwa, cyane cyane muri benshi yagaruriye icyizere akabereka ko kubaho bigishoboka nyuma ya Jenoside yari imaze kuba uruhuri ry’ibibazo muri Sosiyete Nyarwanda.

Prof. François Ferrero wahoze ayobora ishami ry’ubuvuzi bw’indwara zo mu mutwe mu Busuwisi yashimangiye ubutwari bwe avuga ko yahuye n’umugabo w’imbaraga, bikaba ari nabyo byatumaga atsinda mu kazi ke no mu bucuti bwe n’abantu.

Prof Ferrero kandi yavuze ko biyemeje gukomeza imirimo Dr Munyandamutsa yari yaratangiye, birimo guhugura abanyeshuri b’inzobere mu buvuzi bw’indwara zo mu mutwe n’ibindi.

Ibi byo kusa ikivi cya Dr Munyandamutsa byanagarutsweho na André Laubscher uyobora ishami ry’ubuvuzi mu bitaro bya kaminuza by’i Genève, wavuze ko yakoranye igihe kinini na Dr Naasson, kandi hari imishinga bakoranaga nk’iyo kwita ku bapfakazi ba Jenoside bahuye n’ikibazo cy’ihohoterwa, bityo akaba asanga nta kizamubuza gukomeza ibyo bari baratangiye.

Kuri Madamu Marie Odile Godard, umuvuzi w’indwara zo mu mutwe mu Bufaransa akaba yarafatanyaga na Dr Naasson mu gushakira bimwe mu bisubizo ikibazo cy’ihungabana mu Rwanda nko gukora imishinga yo kwita kubafite ihungabana, na we yavuze ko yiyemeje gukomeza iyo mishinga. Uretse n’ubucuti bari bafitanye ngo yari yaramubonyemo ubumuntu butangaje.

Prof Naasson wakoze mu muryango uharanira amahoro ‘Interpeace’ bo bamubona nk’umugabo w’umuhanga mu kumva abandi no gushaka amahoro nk’uko byavuzwe n’uhagarariye uyu muryango ku rwego rw’Isi, M.Scott M.Weber.

Mu muhango wo kwibuka Dr Naasson herekanywe film y’ubuhamya bw’abantu baba hirya no hino,havugwa imivugo, ndetse hanatangwa urubuga ku washakaga kugira icyo amuvugaho wese.

Abo mu muryango wa Dr Naasson barimo umuhungu we n'umugore we
André Laubscher uyobora ishami ry’ubuvuzi mu bitaro bya kaminuza by’i Genève
Ambasaderi w'u Rwanda mu Busuwisi, Ngarambe Francois Xavier
Dr Gakuba Michel, Perezida wa Ibuka Suisse
Dr Murisanze Patana uhagarariye ishyirahamwe ry'abanyeshuri biga ibijyanye n'ubuvuzi bw'indwara zo mu mutwe
rof. François Ferrero wahoze ayobora ishami ry’ubuvuzi bw’indwara zo mu mutwe mu Busuwisi
Scott M. Weber, uhagarariye Umuryango Interpeace ku rwego rw'Isi
Madamu Marie Odile Godard, umuvuzi w’indwara zo mu mutwe mu Bufaransa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza