U Buholandi bwatanze miliyari 12 Frw mu mushinga wo kubaka ibyambu bine ku kiyaga cya Kivu

Yanditswe na Rabbi Malo Umucunguzi
Kuya 30 Ugushyingo 2019 saa 05:53
Yasuwe :
0 0

Guverinoma y’u Rwanda n’iy’u Buholandi zashyize umukono ku masezerano y’inkunga ya miliyoni 11.6 z’Amayero, azatuma bifatanya gushora imari mu kubaka ibyambu bine ku kiyaga cya Kivu, ku rwego rwa 45% rw’agaciro k’uyu mushinga.

Ni amasezerano yashyizweho umukono kuri uyu wa Gatanu hagati ya Minisitiri w’Imari n’Igenamigambi, Dr Uzziel Ndagijimana na Ambasaderi w’u Buholandi mu Rwanda, Matthijs Wolters, mu gushimangira icyerekezo gishya cy’umubano w’ibi bihugu byombi mu butwererane mu bukungu no guteza imbere ishoramari.

Ayo mafaranga ahwanye na miliyari hafi 12 Frw, azafasha mu kubaka ibyambu bine ku kiyaga cya Kivu, bizatanga umusanzu ukomeye mu guteza imbere ubucuruzi bwifashisha inzira zo mu mazi hagati y’u Rwanda na RDC.

Ikigo cy’igihugu gishinzwe iterambere ry’ubwikorezi (RTDA), gitangaza ko umushinga wo kubaka ibyo byambu na serivisi bijyana uzatwara miliyoni 27.3 z’amadolari.

Muri werurwe 2018 Guverinoma y’u Rwanda na TradeMark East Africa (TMEA), bashyize umukono ku masezerano yo kubaka kubaka ibyambu bine mu Turere twa Rusizi (Bugiki), Rubavu (Nyamyumba), Karongi (ku isoko mpuzamipaka) na Rutsiro (mu gace ka Nkora), ku nkengero z’ikiyaga cya Kivu.

Icyo gihe Umuyobozi ushinzwe igenamigambi n’ubushakashatsi muri RTDA, Fabrice Barisanga, yavuze hagikenewe andi mafaranga ajya muri uyu mushinga.

Yagize ati “Amasezerano yasinywe ahangaha harimo miliyoni 12 z’amadolari yo kubaka i Rusizi ahantu hitwa mu Budike na Rubavu ahantu hitwa Nyamyumba hafi ya Bralirwa ariko Leta y’u Rwanda irakomeza gushaka amafaranga kuko tumaze kubona 44% by’ayakenewe.”

Bitaganyijwe ko imirimo y’ubwubatsi igomba gutangirira ku byambu bya Rusizi na Rubavu, imirimo ikazatangira mu mwaka utaha wa 2020.

Umubano w’u Rwanda n’u Buholandi muri iki gihe wifashe neza, aho watangiye mu 1995 ubanza kwibanda ku nzego zirimo kwihaza mu biribwa, amazi n’ubutabera.

Kuva mu mwaka ushize wa 2018 kubera iterambere ry’u Rwanda rikomeje kwihuta, umubano w’ibi bihugu watangije gusa nuva mu bufatanye mu iterambere wimukira mu bijyanye n’ubukungu. Ibihugu byombi bifata uyu mushinga w’ibikorwa remezo nk’uzazana impinduka zikomeye mu bucuruzi bukorerwa mu Kiyaga cya Kivu.

Aya masezerano yashyizweho umukono kuri uyu wa Gatanu hagati ya Minisitiri w’Imari n’Igenamigambi, Dr Uzziel Ndagijimana na Ambasaderi w’u Buholandi mu Rwanda, Matthijs Wolters
Abayobozi ku mpande zombi bafata ifoto y'urwibutso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza