U Bubiligi: Urubanza rwa Fabien Neretse ushinjwa ibyaha bya Jenoside yakorewe Abatutsi rukomeje kurangwamo amagambo ayipfobya

Yanditswe na Karirima A. Ngarambe
Kuya 13 Ugushyingo 2019 saa 10:50
Yasuwe :
0 0

Urukiko rw’i Bruxelles mu Bubiligi rwatangiye kuburanisha urubanza rwa Fabien Neretse, umunyarwanda ushinjwa kugira uruhare muri Jenoside yakorewe Abatutsi, aho rukomeje kugaragaramo amagambo n’imvugo bivuga ko habayeho Jenoside yakorewe Abatutsi n’iyakorewe Abahutu n’izindi.

Uru rubanza rw’uyu mugabo w’imyaka 71, rwafunguwe ku wa 4 Ugushyingo ubwo hatoranywaga itsinda ry’abaturage bagomba gutanga ubuhamya bumushinja n’ubumushinjura, nyuma y’iminsi itatu rutangira kuburanishwa mu mizi, hasomwa ibirego ashinjwa.

Ku wa 8 Ugushyingo Neretse yatangiye kubazwa ibyo yagiye akora, aho yize n’ibindi kugera mu gihe cya Jenoside yakorewe Abatutsi n’igihe uyu mugabo yafataga icyemezo cyo kuva mu Rwanda imaze guhagarikwa akagana iy’ubuhungiro.

Neretse wari ufite ijambo ku butegetsi bwa Habyarimana, ashinjwa kugira uruhare mu kwica Umubiligi Claire Beckers n’umugabo we Isaïe Bucyana n’umukobwa wabo Katia. Aba biciwe i Kigali ku wa 9 Mata 1994, nyuma y’iminsi mike Jenoside itangiye.

Aregwa kandi ubwicanyi yakoreye iwa mu yahoze ari Perefegitura ya Ruhengeri ahitwa i Mataba barimo Mpendwanzi bivugwa ko yagiye kumushaka mu rugo rwe amushinja kuba icyitso cya PFR Inkotanyi nubwo yari Umuhutu.

Ku bwicanyi bwabereye i Mataba, Neretse yabwiye abacamanza ko iyo ataza kuhagera ahubwo hari kwicwa abatutsi batabarika, ashingiye ku ruhare ngo yagize mu guhosha imvururu zabaye mu 1993, ubwo abahezanguni b’abahutu bibasiraga abanyeshuri b’abatutsi bigaga mu ishuri ryari rihari.

Ku rupfu rwa Joseph Mpendwanzi, Neretse yireguye ko atari ashyigikiye igitero cy’abamwishe, mu gihe bivugwa ko ariwe wari ukiyoboye.

Umwe mu batangabuhamya yavuze ko icyo gihe Neretse yamunyuzeho ajya ku ishuri n’amaguru akamuhagarika ngo amutware mu modoka, akabona atwayemo abantu bambaye imyenda ya gisirikare.

Neretse yavuze ko yamusabye kumugeza ku ishuri bitewe n’uko yabonaga ko ari mu byago kuba ari kugenda n’amaguru kandi icyo gihe umutekano utari wifashe neza.

Umunyamategeko Karongozi André wunganira bamwe mu bishwe bigizwemo uruhare na Neretse yabwiye IGIHE ko abunganira Neretse barimo umunyamategeko Frame na Jean Pierre Jacques, bafite inyandiko igizwe na Paje zirenga 50 zuzuyemo imvugo zo guhakana no gupfobya Jenoside yakorewe Abatutsi.

Ati “Usanga zivuga ko habayeho Jenoside yakorewe Abatutsi ariko hari n’iyakorewe Abahutu uretse ko banyuzamo bakigarura ngo ‘Ntibahakana Jenoside ariko wumvise uyu munsi Neretse avuga ko hari abatutsi bapfuye kuko bari abatutsi ariko akanavuga ko hari abahutu bapfuye kuko ari abahutu.”

Ibyo ngo harimo kwitiranya ibintu kuko bizwi ko Jenoside yabaye mu Rwanda kandi yemejwe n’Umuryango w’Abibumbye ari iyakorewe Abatutsi, bikaba bisaba kuba maso mu guhangana n’abahakana bakanapfobya Jenoside yakorewe Abatutsi.

Urubanza rwa Neretse rubaye urwa gatanu rw’umunyarwanda ruburanishirijwe mu Bubiligi ariko Me Karongozi asanga arirwo rukomeye bitewe n’imyitwarire y’uregwa ukomeje guhakana ashaka kwigira inyangamugayo.

Umuntu umwe wo mu muryango w’umubiligi Neretse ashinjwa kugira uruhare mu rupfu rwe [Claire Beckers] witwa Martine Beckers, yavuze ko ibiri kuvugirwamo bibabaje cyane kandi birimo ukwivuguruza gukabije ariko ukurikije uburyo abacamanza bashishikajwe no kumubaza ibibazo byinshi kandi by’ubuhanga, bitanga icyizere ko ruzaburanishwa mu mucyo.

Muri uru rubanza, Perezida w’urukiko yavanye abanyamakuru Judi Rever, Peter Verlinden na Luc Marchal ku rutonde rw’abatangabuhamya bunganira Neretse, kubera uburyo bakunze kugaragara mu biganiro n’inyandiko zipfobya Jenoside yakorewe Abatutsi.

Yananze ko Filimi yakozwe na Jambo News nyuma y’igitabo cya Judi gisohoka nayo yitwa ‘In Praise of blood’ n’iherutse guca kuri Radio Canada zirimo uguhakana no gupfobya Jenoside yakorewe Abatutsi zerekanywa mu rukiko.

Fabien Neretse ukomoka mu Ruhengeri yafatiwe mu Bufaransa mu 2011.

Abanyarwanda bagize Parties Civiles baganira imbere y'Urukiko rw'Ikirenga (Palais de Justice de Bruxelles)
Abunganizi bari ku ruhande rw'abarega ko biciwe na Neretse muri Jenoside yakorewe Abatutsi. Barimo Umunyarwanda Me Karongozi
Félicité Lyamukuru uyobora Ibuka-Mémoire & Justice ubwo yakurikiranaga uru rubanza
Ibumoso: Antoinette Corrêa; umwe mu bagize Parties Civiles ubwo bari ku Rukiko rw'Ikirenga rwa Bruxelles
Me André Martin Karongozi wunganira bamwe mu barega Neretse Fabien mu kiganiro na Karirima Ngarambe wa IGIHE mu Burayi
Karirima yagiranye ikiganiro na Martine Beckers na Me André Martin Karongozi
Uru rubanza ruri kuburanishirizwa mu Rukiko rw’i Bruxelles mu Bubiligi

Amafoto: Jessica Rutayisire


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza