Twumvikane ko ari ubwa nyuma muje mushoreranye muri aba nyuma–Mureshyankwano abwira ba Meya

Yanditswe na Prudence Kwizera
Kuya 19 Gashyantare 2018 saa 07:02
Yasuwe :
0 0

Guverineri w’Intara y’Amajyepfo, Marie Rose Mureshyankwano, yabwiye abayobozi b’uturere two mu Majyepfo ko atazakomeza kwihanganira abaza mu myanya ya nyuma mu kwesa imihigo no kwita ku bibazo by’abaturage ndetse no kubateza imbere.

Yabivuze nyuma y’uko ubushakashatsi bw’Urwego rw’Igihugu rw’Imiyoborere (RGB) bwerekanye ko mu turere 10 turi inyuma mu buryo abaturage bishimira imiyoborere na serivisi bahabwa, dutanu ari utw’Intara y’Amajyepfo.

Ni ubushakashatsi ngarukamwaka RGB ikora kuri gahunda zitandukanye bugaragaza ishusho y’uko abaturage babona imiyoborere n’imitangire ya serivisi, zirimo iz’imibereho myiza, iterambere, ubuzima n’izindi.

Intara y’Amajyepfo igizwe n’uturere umunani; dutanu muri two twaje mu myanya ya nyuma mu miyoborere myiza, kwegera abaturage no kuba serivisi nziza nk’uko ubushakashatsi bwa RGB bwabyerekanye.

Uturere two mu Majyepfo twaje mu myanya myiza harimo Kamonyi yabaye iya munani n’amanota 74.6%, ikurikiranye na Nyanza ya cyenda ifite 74.0%, Muhanga yabaye iya 16 n’amanota 70.6%.

Utundi turere two mu Majyepfo tugaragara mu myanya 10 ya nyuma kuko Huye ari iya 22 n’amanota 68.5%; Nyaruguru ni iya 23 na 67.9%; naho Ruhango iza ku mwanya wa 25 n’amanota 67.3%; mu gihe Gisagara ari iya 27 na 65.7% igakurikirwa na Nyamagabe ya 29 ifite 64.6%.

Ibikubiye muri ubwo bushakashatsi RGB yabumurikiye abayobozi bo mu Ntara y’Amajyepfo kuri uyu wa Gatanu tariki ya 16 Gashyantare 2018.

Guverineri w’Intara y’Amajyepfo, Marie Rose Mureshyankwano, yashimye inzego z'umutekano avuga ko bagomba kuzifatiraho urugero rwiza

Nyuma yo kubona ko uturere two mu Ntara ayoboye twaje ku bwinshi mu myanya ya nyuma, Guverineri Mureshyankwano yavuze ko bigomba guhinduka kuko bibabaje.

Yagize ati “Ndagira ngo muri iyi nama twumvikane ko ari ubwa nyuma muje mushoreranye muri aba nyuma, twumvikane ko ari bwo bwa nyuma rwose, mumanuke mwegere abaturage”.

By’umwihariko yagarutse ku bijyanye na serivisi z’ubuhinzi n’ubworozi avuga ko kuba zitagenda neza biterwa n’abayobozi ku nzego z’ibanze bategera abo bayobora.

Ati “Rwose ba Nyakubahwa ba Meya na ba Visi Meya nta kindi kintu nzavuga namwe ubutaha nihatagira igihinduka mu turere mukuriye, mukoreshe ba Agronome b’imirenge; ariko ndagaruka ko kuri ba Gitifu b’imirenge, abantu mubana ku mirenge batagira icyo bakora, basana n’aho birirwa bicaye, ukagera mu murenge ugasanga ibigori by’abaturage byishwe na Nkongwa yarabimaze, [...], nimuhaguruke muve mu biro dukore, naho nibitaba ibyo ntabwo biri bukunde pe”.

Ubushakashatsi bwa RGB ntibuhabanye n’uko amanota yatanzwe mu mihigo

Urebye imyanya uturere two mu Majyepfo twajeho mu bushakashatsi bwa RGB, ijya gusa n’iyo twabonye mu mihigo y’umwaka wa 2016/2017.

Mu mwaka w’imihigo wa 2016/2017, mu uturere 10 twaje mu myanya ya nyuma harimo tune two Mu Ntara y’Amajyepfo ari two Nyanza, Gisagara, Nyamagabe na Ruhango.

Guverineri Mureshyankwano yavuze ko ibikubiye mu bushakashatsi bwa RGB ari ukuri, ahubwo biberetse aho bagomba gushyira ingufu, bityo ngo ni umwanya wo kwisuzuma no kwikosora.

Umuyobozi Mukuru muri RGB ushinzwe ubushakashatsi, Félicien Usengumukiza, yavuze ko Intara y’Amajyepfo iza mu za nyuma mu gutanga serivisi nziza ku baturage by’umwihariko mu bijyanye na serivisi z’ubuhinzi n’ubworozi kandi ari zo shingiro ry’imibereho y’abanyarwanda benshi.

Felicien Usengumukiza, Umuyobozi Mukuru muri RGB ushinzwe ubushakashatsi

Bamwe mu bayobozi b’uturere two mu Ntara y’Amajyepfo baganiriye na IGIHE bavuze ko bagiye kurushaho kwegera abaturage no kunoza imikorere bagendeye ku nama bagiriwe na RGB ndetse n’ubuyobozi bw’Intara.

Ubushakashatsi bwa RGB bugaragaza ko muri rusange mu miyoborere myiza n’imitangire ya serivisi, Intara y’Amajyaruguru iza ku mwanya wa mbere n’amanota 75.1% igakurikirwa n’u Burasirazuba bufite 73.7% hagakurikiraho Uburengezaba na 69.9%; Amajyepfo afite 69.1% hagaheruka umujyi wa Kigali ufite 65.7%.

Akarere kaza ku isonga mu miyoborere myiza n’imitangire ya serivisi ni Burera n’amanota 78%; gakurikiwe na Ngoma ifite 77.5%; na ho aka nyuma ni Kicukiro ifite amanota 64.4%.

Ubwo bushakashatsi bwa RGB bwakorewe mu turere twose tw’Igihugu, mu midugudu 181, mu ngo ibihumbi 11 bwibanda ku bipimo 15 bikubiye mu nkingi eshatu za gahunda ya Leta y’Imbaturabukungu, birimo ubukungu, imibereho myiza y’abaturage, imiyoborere n’ubutabera.

Umuyobozi w'Akarere ka Nyanza Erasme Ntazinda, atanga igitekerezo ku cyateza imbere Intara y'Amajyepfo
Bamwe mu bayobozi bo mu Ntara y'Amajyepfo bitabiriye imurikwa ry'ubushakashatsi bwa RGB

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza