TV1 na KISS FM zanikiye izindi zigenga mu gukurikirwa na benshi mu Rwanda

Yanditswe na Kanamugire Emmanuel
Kuya 28 Ugushyingo 2016 saa 09:22
Yasuwe : XX
0

Hashize imyaka 12 itangazamakuru ryo mu Rwanda rihinduye isura ryibaruka amaradiyo n’amateleviziyo menshi byigenga;iri terambere ntiryasize inyuma uruvange rw’ibyo ibitangazamakuru bigeza ku baturarwanda yaba ababyumva cyangwa babireba.

Umwihariko wa buri gitangazamakuru niwo utuma kigarurira imitima ya benshi, bakagikurikirana ubutaruhuka.

Raporo yashyizwe ahagaragara n’Ikigo cy’Abanyamerika, GeoPoll’s Media Measurement Service ku buryo Televiziyo zarebwe na Radio zikumvwa mu gihembwe cya gatatu cya 2016, igaragaza urukundo rukomeye itangazamakuru rya leta rikomeje kugira ku baturage benshi ugereranyije n’iryigenga, gusa ibi byose biterwa no kuba rifite ubushobozi bwo kugera kuri buri wese aho ari mu gihugu.

Iki kigo gikurikije imibare cyakusanyije buri munsi, cyagaragaje ko muri Nyakanga, Kanama na Nzeri Radio Rwanda ari yo yumvwa cyane n’abantu benshi cyane hagati ya saa mbili na saa yine z’ijoro naho Radio 10 ikaba iya kabiri mu zumvwa cyane hagati ya saa yine na saa sita z’amanywa.

Muri rusange Radio Rwanda niyo yumvwa na benshi mu gihugu cyose n’abantu 32.0% , ikurikirwa na Kiss FM ifite abantu 8.1%. Radio Flash ni iya gatatu n’abantu 6.3%, Salus ni iya kane n’abantu 5.8%.

Radio 10 iza ku mwanya wa gatanu igakurikirwa na Radio 1, Isango Star, Radio Rusizi na Radio Musanze.

Andi maradio asigaye atagaradara muri aya 10 ya mbere, asangiye abayakurikiye muri ariya mezi bangana na 24.2%, ibi bikaba byerekana ko mu Rwanda hari umubare munini w’amaradio ariko atabasha kugera mu gihugu hose.

Imibare y’ikigo cy’Igihugu kigenzura imirimo imwe n’imwe ifitiye igihugu akamaro, RURA muri Kanama 2016, igaragaza ko Radio Rwanda n’amaradiyo ayishamikiyeho zibasha kugera mu Rwanda hose ku kigero cya 98%, ikurikirwa na Radio Maria igera hose ku kigero cya 80%, Flash 70% , Radio Salus na Radio 10 zikagera mu gihugu ku kigero cya 65% buri imwe. Mu zindi zisigaye inyinshi zigera mu gihugu ku kigero cya 60%.

Iyi raporo igaragaza ko Rwanda TV ariyo irebwa n’abantu benshi bangana na 35.7% ikurikirwa na TV 1 ifite abayireba bangana na 14.8%. TV 10 ni iya gatatu mu zirebwa n’abantu benshi bangana na 10.6% zikurikirwa na Canal + ikurikirwa n’abagera ku 8.9%.

Mu maradiyo na televiziyo byigenga, KISS FM na TV1 ni zo zakurikiwe cyane mu gihembwe cya gatatu cya 2016.

Muri Gicurasi uyu mwaka, RURA yagaragaje ko mu Rwanda hari Televiziyo 22 zemewe n’iki kigo, izigera ku icyenda muri zo zirakora, mu gihe izindi zicyiyubaka. Yego TV ni imwe mu zakoraga ariko yafunze imiryango.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza