TV1 irateganya kurega Meya wa Rulindo mu nkiko

Yanditswe na Mathias Hitimana
Kuya 16 Mata 2015 saa 11:20
46 31

Ubuyobozi bwa TV1 na Radio1 bwatangaje ko buzajyana mu nkiko Umuyobozi w’Akarere ka Rulindo Justus Kangwagye nadasaba imbabazi mu ruhame nyuma yo gushinja ingengabitekerezo ya Jenoside Umunyamakuru wayo.

Tariki ya 2 Mata 2015, Umunyamakuru wa TV1 na Radio1 yabajije Perezida Paul Kagame ikibazo cy’abatuye Umurenge wa Rusiga, Akarere ka Rulindo, bavuga ko buri rugo rwategetswe kwishyura ibihumbi 300 by’imitungo yangijwe mu gihe cya Jenoside, abaturage bakibaza uko bakwishyura ibyo batangije.

Iki kibazo Meya wa Rulindo yagifashe ukundi, ndetse agaragaza ko uburyo cyabajijwe abishoboye yashinja abanyamakuru ingengabitekerezo ya Jenoside. Byongeye, we (Meya) anavuga ko Umunyamakuru yavuze ko ari muri Rulindo yose bishyuzwa imitungo nyamara Umukuru w’Igihugu yarabwiwe abo mu Murenge wa Rusiga.

Mu bikorwa byo kwibuka byabereye mu Murenge wa Rusiga kuwa 12 Mata 2015, Meya Kangwagye yagaragaje uko yafashe ibazwa ry’icyo kibazo, abigeza kuri Minisitiri ushinzwe ibikorwa by’Umuryango w’Afurika y’Iburasirazuba wari umushyitsi mukuru.

Yagize ati“Nsoza reka ibintu byavuzwe mu itangazamakuru mu Karere ka Rulindo mbivuge kuko niwo mwanya mbonye wo kuvuga, iyo nza kuba mfite ubwisanzure nari kuvuga ko abanyamakuru na bo bamaze kujya mu ihakana rya Jenoside, ariko binabaye ntabwo byaba ari igitangaza.”

Yakomeje agira ati“Nk’ejobundi baravuze, Nyakubahwa Minisitiri, ngo muri Rulindo abantu bose barishyuzwa imitungo. Igikomeye cyane ni abagize ubwoba bwa biriya…ariko umunyamakuru yarabajije ngo muri Rulindo abantu bose bishyuzwa imitungo.”

Yakomeje asobanura ko iki kibazo kitareba Imirenge yose ahubwo kireba Umurenge umwe, kandi nawo wa kera.

Yongeraho ati“Umunyamakuru yabivuze yigiza nkana, kubera ko Inkiko za Gacaca zari zifite abacamanza bemewe bubatse u Rwanda uyu munsi tukaba tugendera ku musingi wabo. Inka ijana zaririwe hano ntabwo ziriye, abishyuza inka 100 zaririwe hano ntabwo bishyuzwa ba nyira zo barishyuzwa inka, ubwo rero igikoko kikurira inka kikakurusha kurakara.”

Uyu munyamakuru ngo yabivuze ari impitagihe, kuko ngo bashinga igiti cy’ubumwe n’ubwiyunge kiri muri uwo Murenge bamaze kwigishwa amezi ageze kuri atandatu bayobowe n’umukozi w’Akarere witwa Rutayisire bavuze ngo reka tugabanye ku mafaranga wishyuzwa barayishyura.

Kangwangye ati“Nari kubabazwa n’uko biriya byari kuvugwa n’Umunyarulindo ariko ubwo bitavuzwe nawe nizo mbaraga mfite.”

Asoza agira ati“Nkaba rero mbizeza Nyakubahwa Minisitiri ko guhakana Jenoside tuzabirwanya mu rwego rwacu, nkaba numva ntari kugenda ntabisobanuye kuko byabajijwe Umukuru w’Igihugu, abibaza atari qualified , nta makuru afite, abibaza no mu bihe nk’ibi ngibi twari turimo kwinjiramo aha ngaha mu Karere ka Rulindo, ntabwo rero nari kubona umwanya wo kubivuga kuko nta mwanya nari mfite ariko nagira ngo nyakubahwa Minisitiri abituvugire n’ubundi nibyo mushinzwe.”

Umuyobozi w’Akarere ka Rulindo Justus Kangwagye

TV1 na Radio1 byafashe gute iki kibazo?

Mu kiganiro IGIHE yagiranye n’Umuyobozi wa Radio1 na TV1, Kakooza Nkuriza Charles (KNC), yavuze ko ibyakozwe na Meya Kangagwe bidakwiye kuko yaharabitse Umunyamakuru wabajije ikibazo afitiye ububasha.

KNC ati“Twafashe icyemezo ko Meya tugomba kumwandikira, tukabigeza no ku zindi nzego zirimo na Perezidansi tumusaba ko asaba imbabazi, atabikora tukamugeza mu nkiko. Ikibazo twabajije Perezida nta ngengabitekerezo irimo.”

Yakomeje avuga ko ikibazo babajije ari inkuru bakoze kandi babonye ukuri kwayo, ubuyobozi bw’Umurenge burayasobanura uko ateye ariko Meya abifata ukundi.

Ati“Meya ari mu rwego rudashinzwe kumenya icyo abanyamakuru babaza Perezida. Ingingo ya 46 y’Itegeko Nshinga igena ko Umunyarwanda yagombye kumenya uburyo ayobowe, Perezida ni uwacu nitwe twamutoye, ni uburenganzira bwacu duhabwa n’ Itegeko Nshinga.”

Akomeza acyemanga ubutumwa bwagaragaye mu ijambo rya Meya, ati “Ibyo Meya Kangwage ahisha Abanyarwanda ni umwihariko we? Icyo nicyo kibazo umuntu agomba gusesengura akareba.Meya iyo avuga ngo iyo aza kuba afite ubwisanzure yabuburiye hehe? Tukibaza tuti ibi bintu yavuze biteye agahinda ...Iyi mitungo igomba kwishyurwa na buri wese wujuje imyaka 18 Jenoside yanabaye ataravuka. Kubibaza Nyakubahwa Perezida wa Repubulika iyo ni ingengabitekerezo ya Jenoside?”

KNC yavuze ko uyu muyobozi agomba gusaba imbabazi mbere y’iminsi 30, kandi mu ruhame haba kuri TV1 na Radio1 cyangwa se kuri Televiziyo y’u Rwanda.

Ati “Aho duhagaze ni aha; Meya naze adusabe imbabazi ku mugaragaro araramuka atabikoze, hagashira iminsi 30 turamujyana mu rukiko. Sinzi niba azi Jenoside icyo ari cyo cyangwa niba yarasomye itegeko rihana ingengabitekerezo yararisomye neza …Tuzamurega guharabika Umunyamakuru mu ruhame.”

KNC yasanze imyifatire ya Meya kwaba ari ugufata ku munwa itangazamakuru ngo ritagaragaza ibibazo biri mu karere ke nk’uko no mu bihe byashize byigeze kumuvugwaho.

Twagerageje kuvugisha Meya Kangwagye kuri telefone guhera kuri uyu wa Gatatu ngo tumenye niba azasaba imbabazi, ariko mu nshuro nyinshi ntiyitaba, n’ubutumwa bugufi twamwandikiye ntibwasubizwa.

[email protected]
twitter :@NtakirutaDeus


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE