Tuyisenge yatorewe kuyobora urubyiruko muri FPR Inkotanyi, yiyemeza guhashya inda ziterwa abangavu

Yanditswe na Ferdinand Maniraguha
Kuya 27 Ukwakira 2019 saa 06:46
Yasuwe :
0 0

Tuyisenge Joseph ni we watorewe kuba Umuyobozi w’Urugaga rw’Urubyiruko rushamikiye ku Muryango FPR Inkotanyi, yiyemeza gushyira imbaraga nyinshi mu bukangurambaga bugamije guhashya ikibazo cy’abangavu baterwa inda.

Tuyisenge usanzwe ayobora Urubyiruko mu Karere ka Ngororero, yatorewe mu Nama Nkuru y’Urugaga rw’Urubyiruko rushamikiye kuri FPR Inkotanyi yabaye kuri iki Cyumweru tariki 27 Ukwakira 2019, aho yatsinze ku majwi 70.6 % by’inteko itora yari igizwe n’urubyiruko 693.

Minisiteri y’Ubuzima igaragaza ko umubare w’abangavu babyara imburagihe wavuye ku bana 17,337 mu mwaka wa 2017 ugera ku bana 19,832 mu mwaka wa 2018.

Uyu mugabo usanzwe ari umurezi, yavuze ko imbaraga nyinshi azazishyira mu bukangurambaga bugamije guhashya ikibazo cy’abangavu baterwa inda gikomeje kwiyongera.

Aganira na IGIHE nyuma yo gutorwa, Tuyisenge yagize ati “Niteguye gushyira imbaraga mu bijyanye no kurwanya gutera inda abangavu. Iyo batewe inda bakiri bato hahita hakenerwa indi ngengo y’imari irenzeho, amafaranga yakabaye akora ibindi akajya gukemura icyo kibazo.”

Yavuze ko ubukangurambaga bwa mbere azabuhera muri bagenzi be bayobora urubyiruko ku nzego zitandukanye, baharanira kubera abo bayobora icyitegererezo.

Tuyisenge yavuze azashishikariza urubyiruko kumenya uko bafata imibiri yabo, bamenya agaciro kabo n’ingaruka zo gupfusha ubusa imyaka y’ubuto.

Yagize ati “Bajya bavuga ngo umutungo w’umuntu ni igihe cy’imyaka ye y’urubyiruko kandi aho umutungo wawe uri niho umutima wawe uba uri. Ndasaba buri wese w’urubyiruko gufata imyaka ye nk’umutungo we ukomeye, aramutse yumva agaciro ke n’umusanzu igihugu kimutegerejeho yakagombye gukora uko ashoboye akita ku mutungo we w’ubuto bwe.”

Yavuze ko azanashyira imbere mu guhashya ikibazo cy’ibiyobyabwenge mu rubyiruko no kugabanya umubare w’abana bata ishuri.

Tuyisenge watowe avuka mu karere ka Ngororero, afite umugore n’abana babiri. Afite Impamyabushobozi y’Icyiciro cya Kabiri cya Kaminuza mu bijyanye n’Ivugururamibereho yakuye muri Kaminuza y’u Rwanda i Huye. Asanzwe ari umwarimu kuri TTC Muramba mu Karere ka Ngororero.

Tuyisenge Joseph yavuze ko azashyira ingufu mu bukangurambaga bugamije guhashya inda ziterwa abangavu
Urubyiruko rwatoye abazaruyobora mu myaka iri imbere
Abashinzwe amatora ubwo bazengurukaga bakusanya amajwi
Ubwo hakorwaga amatora yo gushaka abayobozi bashya b'Urugaga rw'Urubyiruko rushamikiye kuri FPR Inkotanyi
Urutonde rw'abiyamamaje ku mwanya wo kuba Perezida w'Urugaga rw'urubyiruko rushamikiye kuri FPR Inkotanyi
Minisitiri w'Urubyiruko Rosemary Mbabazi (hagati) yafatanyije n'urubyiruko gucinya akadiho
Umuhanzi Intore Tuyisenge ubwo yasusurutsaga urubyiruko rwitabiriye Inama Nkuru y’Urugaga rw’Urubyiruko rushamikiye kuri FPR Inkotanyi
Minisitiri w'Urubyiruko, Rosemary Mbabazi (hagati) na Utumatwishima Abdallah (ibumoso) bifatanya n'urubyiruko gushyiraho morale

Amafoto: Niyonzima Moïse

Mugwiza Olivier


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza