Tura tugabane: Umwiryane no kwikunda byarunduye RRM ya Nsabimana Callixte ‘Sankara’

Yanditswe na IGIHE
Kuya 2 Kamena 2019 saa 03:26
Yasuwe :
0 0

Nubwo Nsabimana Callixte wiyise ‘Sankara’ ubu afungiwe mu Rwanda kubera ibyaha 16 aregwa kandi yemera birimo iterabwoba, ubwicanyi n’ibindi, yafashwe ishyaka yashinze ryugarijwe n’umwiryane, kurwanira ubutegetsi no gushinjanya ubugambanyi hagati y’abarigize.

Ubwo yagezwaga imbere y’urukiko ku wa 23 Gicurasi 2019, mu byaha Nsabimana yarezwe harimo gushinga no kuyobora Rwanda Revolutionary Movement, RRM, umutwe yashinze afatanyije n’abarimo Noble Marara, ku wa 28 Ukwakira 2017. 

Mbere y’uko Nsabimana afatwa, RRM yihuje na PDR Ihumure na CNRD Ubwiyunge ya Gen Irategeka Wilson, bibyara MRCD iyobowe na Paul Rusesabagina ikanagira umutwe w’abarwanyi wa FLN, yari abereye umuvugizi.

Ikiganiro cy’amajwi cyagiye hanze cyumvikanisha uburyo RRM yacitsemo ibice na mbere y’ifatwa rya Nsabimana, kubera ubwumvikane buke, gusuzugurana no kutemera uburyo abayobozi bishyira mu myanya. Ni ikiganiro cyabaye bahuje itumanaho [conference call], cyumvikanamo amatiku hagati y’abasivili n’abahoze mu gisirikare. 

Uwo mutwe ugizwe n’abantu ahanini bavuye mu Rwanda bahunze ibyaha bakoze cyangwa andi makosa. Abenshi babanje no kuba muri RNC mbere yo gutangiza ishyaka ryabo.

Icyo kiganiro kirimo abantu 12 barimo Nahimana Straton nk’umunyamabanga mukuru wa RRM, Nsengimana Herman, Twihangane Sharif, Nsabimana Callixte ‘Sankara’, Nkurunziza Camille, Abega n’abandi, bashinjaga Noble Marara ko adashyigikiye bagenzi be mu migambi yose bafite.

Uyu Camille Nkurunziza uri mu bashinze RRM, yiciwe muri Afurika y’Epfo mu ijoro ryo ku wa 30 Gicurasi 2019 agerageza kurwanya Polisi.

Marara aba ashinjwa ko yagiye mu itangazamakuru n’imbuga nkoranyambaga akanenga ibikorwa bya bagenzi be, nabo bagatangira kumukeka amababa.

Muri iki kiganiro kitarangwamo ukubahana na guke, hari aho Marara avuga ko barimo kumushyira ku nkeke, ati “Abantu 11 bambaza ikibazo kimwe ngo kubera ko ntavuga ngo tujye kurwana tujye kurwana tujya kurwana. Ubundi se abantu 11 murashaka kurwana? Mugende [aseka].”

Bamushinja kandi ko nubwo ari mu bashinze RRM, ashaka kwiyoberanya avuga ko atakiri mu buyobozi bw’ishyaka. Humvikana umwe amubwira ati “Si wowe washinze ishyaka, si wowe watwinjijemo Marara si wowe wanzanye?”

Undi asubiza ko kuba mu bashinze ishyaka bitavuze ko uri umuyobozi kuko ushobora kurishinga ukiryamira. Uwitwa Kabuto anavuga ko Marara yakoze ikiganiro gisa n’ikibamagana, ibintu nabyo yitarutsa.

Ati “Ntabwo cyigeze kibamagana basore. Ariko kuki muvuga amagambo mabi gusa? Ubundi n’igihe nabaga ndangije ayo magambo naravugaga ngo ‘usibye ko n’ushaka gukora intambara atayivuga.’ Ariko iryo ryo kuki mutarivuga? Kuki mwibanda gusa ku magambo yo gushakisha gusa ukuntu mutera bene wanyu ibyuma ? Puuu…”

Uwitwa Sylvestre Nsengiyumva yasabye Marara ko niba hari impungenge afite kuri RRM, ashaka kuyigumamo yakorana inama na bagenzi be ibibazo bye bikaganirwaho, ariko akubaha inzego ziyigize cyangwa byamunanira agasezera.

Marara we avuga ko atarimo kurwanya RRM, nubwo ngo bagenzi be batemera ibyo ababwira ahubwo bagatsimbarara ku byo bashaka.

Ati “Njye ntabwo nshobora gusezera muri RRM kuko nta mpamvu ituma nsezera, niba amahame yayo atagenderwaho uko twayashyizeho, ntabwo aba ari njye munyamakosa ahubwo abayahinduye nibo baba ari abanyamakosa. Icyo gihe rero njye nisubirira inyuma kugira ngo ibyemezo bifatwa bye kumbarwaho. ”

Nsengiyumva Sylvestre ahita avuga ati “Niba uteguye Marara, ugomba guhagarika kuvuga ibitandukanye [n’ibyacu] nubwo waba uri umunyamuryango usanzwe.”

Marara ati “Njyewe nta nubwo nzi uwo Sylvestre uwo ari we umbwira kwegura, ibi nibyo bibazo biri muri RRM. Wowe uri inde mbere na mbere? Ntabwo nkuzi na gato.”

Marara yavuze ko umuntu wese ufite amakosa ahamagarwa na Abega ushinzwe imyitwarire muri RRM kandi ngo ntiyigeze amutumira, aho kuba Sylvestre atanazi.

Hanzuwe ko urwego rushinzwe imyitwarire rwamuhamagaza akaba ari rwo rwumva ibibazo bye, ariko haguma impungenge z’uko yari amaze kuvuga ko nta nama yindi ya RRM azitabira, bigafatwa nko ‘gukinisha abajama’.

Ibi byose byagejeje mu Ukwakira 2018 ubwo RRM yandikaga itangazo yirukana bamwe mu bayishinze barimo Marara.

Ukwikunda mu gutanga imyanya

Ikindi kibazo cyarunduye RRM ni uko mu kwiha no gutanga imyanya, habayeho ukugumuka kwa bamwe batumvaga uko bahabwa imyanya ya gisivili kandi barahoze mu gisirikare.

Umwe ni Nkurunziza Camille uheruka kwicirwa muri Afurika y’Epfo, wavuze ko mbere yari ashinzwe ibikorwa bya gisirikare muri RRM, banagiye muri MRCD ashingwa komisiyo y’umutekano n’ishyinguranyandiko.

Ngo haje kubaho umunsi umwe atumvikanye na Nsabimana Callixte, ndetse mu nama yakurikiyeho yanga kuyijyamo, maze ishyaka ritangira kumuheza. Nyuma yaje kumenyeshwa ko yagizwe umuyobozi ushinzwe impunzi na diaspora.

 Nkurunziza ati “Icyo ni igitutsi kuri njye, ndi umusirikare watojwe, navuye mu gisirikare twenda kurwanya naratojwe […], ndi mpuzamahanga, noneho Nsabimana angire ngo ukuriye abasivile? Ntabwo nabyemera, ntabwo nabyihanganira.”

“Icyo ndi cyo kandi ntazavaho ni uko ndi umusirikare, komando, ubumenyi mfite nashatse kubuha abandi. Maze imyaka 20 nkorerwa akarengane, nzapfa nkarwanya, rero ntabwo kaza kunkorerwa mu ishyaka nashinze.”

Yavuze ko niba ari umwanya ushishikaje Nsabimana yawufata akawugereka ku byo ayobora, we akibera umunyamuryango usanzwe.

Yakomeje ati “Niba mutampaye umwanya wo kuvuga ngo njye mu bikorwa bya gisirikare, mundeke njyenyine. Inama y’ubuyobozi ndayemera ijana ku ijana, ariko iby’imyanya, uri umusivile [Nsabimana ‘Sankara’] nawe uzajye kubayobora kandi uri n’impunzi ufite n’ibyangombwa by’impunzi.”

Ni ikintu cyongereye akavuyo mu kiganiro, ariko baza kuvuga ko bose ari abasivile kuko n’uwari mu gisirikare yagihunze.

Marara uba avuga ko nk’abatangije ishyaka hari abantu bakwiye kumuhuza nawe n’abo batagomba guhura, akomoza ku wo yitaga umuhungu ariko akibutswa ko atari ‘umuhungu’ ahubwo Herman ari umusirikare uri ku rugamba, Marara ati “Oya ni umuhungu araga… ni iki se ?”

Bahise bamwanjama bamubaza niba atangiye no kubatuka, abandi bafatwa n’ibitwenge.

Mu kiganiro bemeranyijwe ko amakimbirane ari muri RRM ari hagati y’abantu bayishinze kandi ari bo bakomeye mu ishyaka, basaba ko hategurwa inama ya Marara, Nkurunziza Camille, Nsabimana na Kabuto, kuri telefoni, bagakemura ibibazo bafitanye.

Mbere y’uko ikiganiro kirangira ariko Marara yumvikana avuga ko “hari ibibazo ariko ni n’ibibazo bitakemuka, nta muti bifite.”

Nyuma y’ifatwa rya Nsabimana, urukiko ruheruka kwemeza ko akurikiranwa afunzwe mu gihe urubanza rutaratangira kuburanwa mu mizi.

Nsabimana Callixte 'Sankara', Noble Marara na Nsengiyumva Sylvestre baba batumvikana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza