Kwamamaza

Tumba, Gahenerezo, Matyazo; uduce twiganjemo icyorezo cya Sida muri Huye

Yanditswe kuya 29-08-2016 saa 08:11' na Kwizera Prudence


Ibitaro by’Akarere ka Huye bya Kabutare biratangaza ko hashyizweho gahunda zitandukanye zigamije gukumira ubwandu bushya bwa Virusi itera Sida, kandi ibipimo byerekana ko hari umusaruro ufatika nubwo hakiri bamwe badindiza iyi gahunda.

Ubwo hatangizwaga ibikorwa biherekeza umunsi mpuzamahanga wo kurwanya Sida (wizihijwe kuya 1 Ukuboza 2015), ibitaro bya Kabutare byagaragaje uko kugeza ubu ubwandu bushya bwa Virusi itera Sida buhagaze ndetse n’uduce two mu karere ka Huye twiganjemo iki cyorezo.

Umukozi ushinzwe gukurikirana ibikorwa by’ubuzima mu gace ka Kabutare, Fabien Nshimiyimana, yavuze ko kugeza ubu muri zone (agace) ibitaro bya Kabutare bikoreramo, ibipimo byerekana ko mu mezi atandatu ashize abantu bafite ubwandu bwa Virusi itera Sida bageze kuri 3, 6% bavuye ku 9%.

Nshimiyimana yasobanuye ko aho ibitaro bya Kabutare bikorera hagizwe n’ibigonderabuzima 17 byo mu karere ka Huye.

Yagize ati “Muri rusange tubaze abantu bipimisha ku bushake n’abipimisha babisabwe na muganga, ubwandu bwa Virusi itera Sida mu mezi atandatu ashize bugaragaza ko ikigereranyo cy’abanduye kiri kuri 3,6%, byaramanutse cyane kuko mbere yaho bari ku 9%”.

N’ubwo ibipimo byerekana ko ubwandu bwa Virusi itera Sida muri Kabutare bwagabanutse, Nshimiyimana yagaragaje ko hakiri imbogamizi zishingiye ku bakora umwuga w’uburaya bakoma mu nkokora gahunda yo gukumira burundu ubwandu bushya.

Yagaragaje ko kugeza ubu muri Huye, uduce tugaragaramo abakora umwuga w’uburaya aritwo dutuma ibipimo by’abafite ubwandu bushya bwa Virusi itera Sida bizamuka.

Ati “Haracyari abana bigurisha, kuko muri 3,6% nababwiye dufite mu bitaro byacu, iyo urebye usanga abenshi ari abaturuka ahantu higanje umwuga w’uburaya. Urugero dufite abaturuka mu Gahenerezo, abaturuka Tumba no ku Mukoni, ndetse n’utundi duce nka Matyazo na Rwabuye tukigaragaramo abigurisha”.

Akomeza asobanura ko kugira ngo ibipimo by’ubwandu bwa Sida bigabanuke byatewe n’uko hashyizweho gahunda zitandukanye zigamije gukumira ubwandu bushya cyane cyane abanduye bigishwa kutanduza abandi, ndetse n’ababyeyi bashishikarizwa kwipimisha igihe batwite kandi bakabyarira kwa muganga.

Nshimiyimana yavuze ko hakiri byinshi byo gukora kandi inzego zose zifatanyije kugira ngo abantu bakomeze kwigishwa uburyo bwo gukumira ikwirakwizwa ry’ubwandu bushya bwa Virusi itera Sida.

Yagize ati “Haracyari akazi kanini ku nzego zose zifatanyije kugira ngo tubashe kwigisha abantu uburyo bwo kwikingira ndetse n’ubundi bburyo bukoreshwa mu kwirinda Sida. Harimo Kwifata, Ubudahemuka no gukoresha agakingirizo”.

Urubyiruko nirwo rwibasiwe

Umukozi ushinzwe gukurikirana ibikorwa by’ubuzima muri Kabutare, Fabien Nshimiyimana, avuga ko ibipimo byerekana ko urubyiruko arirwo rwibasiwe n’ubwandu bushya bwa Virusi itera Sida, bityo ngo niyo mpamvu arirwo bibandaho mu gutanga inyigisho.

Nshimiyimana yavuze ko bibanda ku rubyiruko kuko basanga abakiri bato baramutse birinze ibishuko by’ababashora mu mibonano mpuzabitsina, ubwandu bushya bwa Virusi itera Sida bwakumirwa burundu.

Ati “Urubyiruko nirwo twahisemo kuko usanga ahanini arirwo rwibasiwe, kuko usanga abagabo bakuze bashuka abana b’abakobwa ngo baryamane nabo bibanda ku rubyiruko kuko nirwo rushukika cyane, kuko ahanini ruba rudasobanukiwe neza, bityo rero dusanga turamutse dufatiye mu rubyiruko twaba duhagaritse ubwandu bushya bwa Virusi itera Sida”.

Ibikorwa biherekeza umunsi mpuzamahanga wo kurwanya Sida bimara umwaka wose, abantu b’ingeri zitandukanye bigishwa uburyo iki cyorezo cyakumirwa burundu.

Umunsi mpuzamahanga uheruka kwizihizwa mu Ukuboza 2015, wari ufite insanganyamatsiko igira iti “Kurinda no kuvuza abana Virusi itera Sida ni inshingano ya buri wese”.

Uyu munsi mpuzamahanga wo kurwanya Sida watangiye kwizihizwa ku rwego rw’isi kuya 1 Ukuboza 1988.

Umukozi ushinzwe gukurikirana ibikorwa by’ubuzima mu gace ka Kabutare, Fabien Nshimiyimana
Urubyiruko rwitabiriye ibikorwa biherekeza umunsi mpuzamahanga wo kurwanya Sida
Habaye igikorwa cyo kwipimisha ku bushake

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved