Kwamamaza

Tugomba gutabara abaturage tutazaririye - Gen Nyamvumba

Yanditswe kuya 17-11-2016 saa 13:18' na IGIHE


Ubwo yasozaga amahugurwa mpuzamahanga ajyanye no gushyira mu bikorwa amasezerano ya Kigali ku gutabara abasivile mu ntambara, Umugaba Mukuru w’Ingabo z’u Rwanda, Gen Patrick Nyamvumba, yasabye abayitabiriye kuzashyira mu bikorwa ibyo bayigiyemo birimo no gutabara abaturage byihuse babakiza abashaka kubagirira nabi.

Aya mahugurwa yari amaze icyumweru, yasojwe kuri uyu wa Gatatu mu Ishuri ry’u Rwanda ryigisha amahoro riherereye mu Karere ka Musanze, aho yitabiriwe n’abasirikare, abapolisi n’abasivile 36 baturutse mu bihugu 14 birimo ibyo ku mugabane wa Afurika, Leta Zunze Ubumwe za Amerika n’u Buholandi.

Uyu muhango kandi wanitabiriwe n’abajyanama mu bya gisirikare bahagarariye Leta Zunze Ubumwe za Amerika n’u Buholandi mu Rwanda.

Mu ijambo risoza aya mahugurwa, Gen Patrick Nyamvumba, yavuze ko ubushobozi buke n’ubushake buke mu gutabara ari byo bituma abasivile bagwa mu ntambara hirya no hino.

Aha yasobanuye ko ibikorwa byo kubungabunga amahoro by’Umuryango w’Abibumbye bikwiye kunozwa kugira ngo ababigiramo uruhare babikore neza barengera abasivile kuko ariyo ntego nyamukuru yabyo.

Gen Nyamvumba yavuze ko amasezerano ya Kigali agaragaza ingingo zikwiye kwitabwaho mu kubungabunga amahoro uhereye ku busesenguzi bw’ahabera intambara, gutegura ingabo zoherezwa, kuzitoza no kuziha ibikoresho no kureba umusaruro zitanga iyo ziri muri ibyo bikorwa.

Yagize ati “Bigaragara ko amategeko mpuzamahanga yo kurengera abaturage atubahirizwa mu ntambara zigenda zivuka muri iki gihe, Amasezerano ya Kigali atwereka ko tugomba gutabara abaturage tutazaririye tukabakiza abashaka kubagirira nabi.”

Yasabye abarangije aya mahugurwa gukoresha ubumenyi bahawe babushyira mu bikorwa aho bajya mu butumwa bw’amahoro no mu kazi kabo ko kurengera abaturage bashinzwe.

Abajyanama mu by’Ingabo bahagarariye Amerika n’u Buholandi mu Rwanda, bashimye ubufatanye hagati y’ibihugu byabo na Guverinoma y’u Rwanda mu gutegura aya mahugurwa. Bagaragaje ko ibihugu byabo bizakomeza gushyigikira ibikorwa byo kubungabunga amahoro kandi ko biyemeje gushyira mu bikorwa Amasezerano ya Kigali agamije kurengera abasivile mu ntambara.

Maj Muyunda Nyoka waturutse mu ngabo za Zambia, yavuze ko aya mahugurwa yamugiriye akamaro. Ati “ Twize ko inshingano dufite nk’abasirikare ari ukurengera abasivile, ni yo nshingano yacu tugomba kwitaho mu gihe hari intambara.”

Yongeyeho ko nta rwitwazo na rumwe abari mu butumwa bw’amahoro bakwiye gushyira imbere bazuyaza mu gutabara abaturage, yemeza ko n’iyo haba inzitizi byaba bishingiye kuri manda bafite yo gutabara.

Maj Francisca Aholo waturutse mu Ngabo zirwanira mu kirere muri Ghana, yavuze ko Amasezerano ya Kigali abereyeho kuzuza umabwiriza ya Loni mu kurengera abaturage.

Ati“ Tugomba kwita ku gutabara abasivile kandi Amasezerano ya Kigali ni cyo atwigisha, kudatinda na gato mu bikorwa byo gutabara abaturage.”

Madamu Lauren Spink ukorera mu Kigo kirengera abasivile mu Ntambara gifite icyicaro i Washington DC, muri Leta Zunze Ubumwe za Amerika, akaba muri iyi minsi akorera i Goma muri Repubulika Iharanira Demukarasi ya Congo, yavuze ko Amasezerano ya Kigali ashobora kugerwaho, bityo ko icyo bisaba ari ubushake n’imikoranire y’abasirikare, abapolisi, abasivile bari mu bikorwa byo kubungabunga amahoro, bakanashyikirwa n’Inama y’Umutekano ku Isi n’Ubunyamabanga bwa Loni.

Amasezerano ya Kigali ku kurengera abasivile mu ntambara yemejwe muri Gicurasi 2015. Akubiyemo amahame 18 yerekana uburyo bwo gutabara abaturage mu gihe cy’intambara. Aya masezerano kandi agamije gushimangira uburyo Umuryango Mpuzamahanga ukwiye gutabara abaturage utazuyaje mu gihe cy’intambara, kugira ngo ibikorwa byo kubungabunga amahoro bibashe kugera ku ntego.

Amasezerano ya Kigali amaze gushyirwaho umukono n’ibihugu 38 byo hirya no hino ku Isi.

Abari bitabiriye aya mahugurwa batahanye intego yo gutabara byihuse ababa bari mu kaga mu rwego rwo kubahiriza amasezerano ya Kigali
Si ingabo gusa kuko n'urwego rwa polisi rwari rwitabiriye aya mahugurwa
Abitabiriye aya mahugurwa banahawe impamyabumenyi
Abasivile nabo bahuguwe ku kurinda abaturage mu bihe by'intambara
Gen Nyamvumba yabasabye kurinda no gutabara bwangu abaturage baba bibasiwe n'intambara
Abitabiriye aya mahugurwa bari 36 baturutse muri Afurika, Amerika n'u Buholandi
Gen Nyamvumba aganira n’abajyanama mu bya gisirikare bahagarariye Amerika n’u Buholandi mu Rwanda

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved