Tony Adams na Louis Van Gaal bazitabira umuhango wo Kwita Izina uzakurikirwa n’igitaramo cya Ne-Yo

Yanditswe na Ferdinand Maniraguha
Kuya 20 Kanama 2019 saa 12:09
Yasuwe :
0 0

Tony Alexander Adams wabaye kapiteni w’ikipe ya Arsenal FC hamwe n’uwahoze ari umutoza w’Umuholandi, Louis Van Gaal, ni bamwe mu bashyitsi bategejwe mu munsi ukomeye wo Kwita Izina, uteganyijwe ku wa 6 Nzeri 2019.

Ni umunsi ngarukamwaka uzabera mu Kinigi mu karere ka Musanze, aho muri uyu mwaka, abana 25 b’ingagi bazahabwa amazina.

Umuyobozi Mukuru mu Kigo cy’Igihugu cy’Iterambere RDB, ushinzwe ubukerarugendo, Belise Kaliza, kuri uyu wa Kabiri yabwiye abanyamakuru ko uyu mwaka Kwita Izina bizarangwa n’ibikorwa binyuranye, aho uretse abashyitsi bazitabira, ku munsi ukurikiyeho ku wa 7 Nzeri hazaba igitaramo kizitabirwa n’abahanzi barimo Meddy na Ne-Yo wo muri Leta Zunze Ubumwe za Amerika.

Meddy na Ne-Yo na bo bazita amazina abana b’ingagi, hamwe n’umunyarwandakazi Sherrie Silver, umubyinnyi w’icyamamare ubarizwa mu Bwongereza.

Tony Adams w’imyaka 52 yakiniye Arsenal yo mu Bwongereza imyaka 19 hagati ya 1983 na 2002 aba na kapiteni wayo imyaka 14. Mu myaka 22 yamaze muri Arsenal FC yatwaye ibikombe 13 maze yubakirwa ikibumbano hanze ya Emirates Stadium.

U Rwanda na Arsenal bifitanye amasezerano yo kumenyekanisha u Rwanda nk’icyerekezo cy’ishoramari n’ubukerarugendo binyuze muri gahunda ya Visit Rwanda, mu gihe cy’imyaka itatu.

Louis Van Gaal w’imyaka 68 we yatoje amakipe akomeye arimo Bayern Munich, Ajax Amsterdam, FC Barcelona, Ikipe y’Igihugu y’u Buholandi na Manchester United.

Mu kiganiro n’abanyamakuru kuri uyu wa Kabiri, Belise Kaliza, yavuze ko igikorwa cyo Kwita Izina cyateguwe hamwe n’ibindi bikorwa bitandukanye bigamije kubungabunga urusobe rw’ibinyabuzima.

Kaliza yavuze ko ku bufatanye n’abikorera bakora mu bijyanye no kurengera urusobe rw’ibinyabuzima, bateguye ibikorwa bigamije kumenyekanisha igikorwa cyo Kwita Izina aho tariki 24 Kanama hateguwe isiganwa ry’amagare ryiswe Rhino Cycling Velo Race rizabera mu Ntara y’i burasirazuba, tariki 31 Kanama na Tariki 1 Nzeri hateganyijwe igikorwa cy’Umuganda n’irushanwa rya Tennis bizabera i Musanze, mu gihe tariki 5 Nzeri hateganyijwe gusiganwa ku maguru ibirometero bitatu muri Pariki ya Nyungwe, isiganwa ryiswe Gorilla Fun Run.

Tariki 7 uretse igitaramo cya Ne-Yo na Meddy hazaba n’umusangiro (Gala Dinner) uzabera muri Kigali Convention Centre.

Mu bindi bizakorwa harimo inama yiga ku kubungabunga urusobe rw’ibinyabuzima yateguwe ku bufatanye na Kaminuza ya African Leadership University izaba guhera tariki 8 kugeza tariki 9 Nzeri n’imurika rizafungurwa tariki 7 Nzeri.

Umunyamabanga Nshingwabikorwa w’Intara y’Amajyaruguru, Jabo Paul yavuze ko abikorera bo muri iyo ntara biteguye bihagije umuhango wo Kwita Izina.

Yavuze ko ari umuhango ufite byinshi usobanuye ari ku baturage baturiye Pariki y’Ibirunga bahabwa ibyavuye mu bukerarugendo ndetse n’abikorera babona inyungu bivuye ku gucuruza ibicuruzwa byabo ku bakerarugendo.

Jabo yavuze ko nk’ubu hari ibigori bizifashishwa mu busabane mu Kwita Izina kandi byose bizava mu baturage bo mu Ntara y’Amajyaruguru n’ibindi.

Ati “Abikorera bacu dufitanye inama ejo , abantu bose bafite amahoteli muri biriya bice kugira ngo twongere twishishemo ijisho turebe niba twiteguye bihagije. Icyo nababwira imyanzuro y’iyo nama y’ejo izaba ari ukuvuga ngo turiteguye.”

Umuyobozi w’Ishyirahamwe ry’Abatwara n’abatembereza ba mukerarugendo mu Rwanda (RTTA) Mutoni Bonita yavuze ko ku ruhande rwabo biteguye kandi bagiye gushyira imbaraga mu kumenyekanisha umuhango wo Kwita Izina ku buryo uzitabirwa n’abantu benshi.

Abantu basaga ibihumbi bitatu bamaze kwiyandikisha kuzitabira umuhango wo Kwita Izina binyuze ku rubuga rwa RDB cyangwa se ukanze hano http://www.rdb.rw/kwitizina/. Kwitabira uwo muhango ni Ubuntu.

Ne-Yo azakorera mu Rwanda igitaramo gikomeye ku wa 7 Nzeri
Tony Adams ni umwe mu bashyitsi bategerejwe mu Kwita Izina
Tony Adams ni umwe mu bagize amateka akomeye muri Arsenal FC
Louis Van Gaal ni umwe mu bashyitsi bategerejwe
Abanyamakuru batandukanye bitabiriye
Abayobozi batandukanye baganira n'abanyamakuru ku myiteguro y'umunsi wo Kwita Izina
Belise Kaliza ubwo yaganiraga n'abanyamakuru ku muhango wo Kwita Izina
Kaliza yavuze ko uyu mwaka umuhango wo Kwita Izina uzaba wihariye
Naivasha Oakes ushinzwe ubufatanye bw'u Rwanda n'ikipe ya Arsenal
Sunny Ntayombya ushinzwe itumanaho muri RDB
Umunyamabanga Nshingwabikorwa w’Intara y’Amajyaruguru, Jabo Paul yavuze ko abikorera bo muri iyo ntara biteguye bihagije umuhango wo Kwita Izina
Umuyobozi ushinzwe Iyamamazabikorwa muri RDB, Mutesi Linda,umwe mu bitabiriye ikiganiro
Umuyobozi w’Ishyirahamwe ry’Abatwara n’abatembereza ba mukerarugendo mu Rwanda (RTTA) Mutoni Bonita

Amafoto ya IGIHE: Niyonzima Moise


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza