Tom Close yatorewe kuba Perezida w’Ihuriro Nyafurika ryo gutanga amaraso mu bihugu 13

Yanditswe na IGIHE
Kuya 17 Gashyantare 2017 saa 02:29
Yasuwe : XX
0

Dr Muyombo Thomas uzwi nka Tom Close yatorewe kuba Perezida w’Ihuriro Nyafurika rishinzwe ibyo gutanga amaraso mu bihugu 13 biri mu gace k’Uburasirazuba bwa Afurika.

Amatora y’Umuyobozi wa Africa Society for Blood Transfusion (AfSBT) mu gace k’Uburasirazuba bwa Afurika yabaye mu mpera z’umwaka ushize gusa ibyayavuyemo byemejwe n’Inama ya komite nyobozi y’iri huriro yabereye mu Rwanda mu cyumweru gishize.

Abatsinze batangajwe kuri uyu wa Kane tariki ya 16 Gashyantare 2017, aho Dr Muyombo Thomas yatorewe guhagararira agace ka EAC kagizwe n’ibihugu 13 birimo Ibirwa bya Comores, Djibouti, Eritrea, Ethiopia, Kenya, Madagascar, Mayotte, Réunion, Rwanda, Somalia, Tanzania, Sudani y’Epfo na Uganda.

Dr Muyombo azatangira inshingano ze mu 2018, akaba azaba asimbuye Umunya-Kenya Charles Rombo bari bahanganiye umwanya. Amategeko yo muri iri huriro agena ko umuyobozi atorerwa manda y’imyaka ine ariko ibiri muri yo akayimara akorana n’uwo asimbuye.

Mu kiganiro kigufi IGIHE yagiranye na Dr Muyombo, yavuze ko gutorerwa uyu mwanya ari ishema ku Rwanda nk’igihugu gikomeje gushyira imbaraga nyinshi mu bijyanye no kubungabunga ubuzima bw’abantu by’umwihariko abakeneye amaraso.

Ati "Ni intambwe ku kigo cyo gishinzwe gutanga amaraso mu Rwanda cyane ko twabaye igihugu cya kabiri muri Afurika gifite serivisi ziri ku rwego rwa mbere. Kujya kuri uyu mwanya bidufitiye inyungu kuko bizadufasha gukomeza kuzamura urwego rw’imikorere turiho ndetse tukanigisha abandi muri ibyo bihugu. Ubundi igihugu gifite serivisi ziri ku rwego rw’u Rwanda ni Namibia, ibindi byose biri inyuma yacu."

Dr Muyombo Thomas yatangiye gukora mu kigo cy’Igihugu gishinzwe ibijyanye n’amaraso mu 2015 avuye mu byari ibitaro bya Polisi ku Kacyiru aho yakoraga nk’umuganga bw’indwara z’abana.

Dr Muyombo Thomas agiye kuyobora Ihuriro Nyafurika rishinzwe ibyo gutanga amaraso ariko mu gace ka Afurika y'Uburasirazuba
Abandi bagiye batorwa hagendewe ku bice bitandukanye bya Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza