Tigo yishyuriye mituweli abaturage 410 batishoboye

Yanditswe na Ishimwe Israel
Kuya 24 Nzeri 2016 saa 06:25
Yasuwe : XX
0 0

Sosiyete y’Itumanaho ya Tigo Rwanda yatanze inkunga ya miliyoni n’ibihumbi 230 y’amafaranga y’u Rwanda yo kurihira ubwisungane mu kwivuza abaturage 410 batishoboye bo mu Mirenge ya Gataraga na Gashaki mu Karere ka Musanze.

Iki gikorwa cyabaye kuri uyu wa Gatandatu nyuma y’umuganda rusange wa buri kwezi, wahuje abaturage bo muri iyi mirenge, abayobozi bo mu nzego z’ibanze, abakozi bo muri Tigo, abashinzwe umutekano ndetse n’abayobozi b’akarere.

Nyiramabaraza Dative, umuturage utuye mu Mudugudu wa Rukingo, Akagari ka Murago mu Murenge wa Gataraga waganiriye na IGIHE yishimiye ubu bufasha yahawe bwo kwishyurirwa mituweli avuga ko izamufasha kwivuza neza kandi ku gihe.

Yagize ati “ Nishimiye cyane kuba nahawe mituweli, nari narabuze ubushobozi, mpora nibaza ndamutse nkoze nk’impanuka uburyo nabyitwaramo ariko ndashimira Tigo yanyibutse. Ubu nanjye nizeye ko umwana wanjye aramutse arwaye namujyana kwa muganga akivuza neza nta kibazo.”

Umunyamabanga Nshingwabikorwa w’Umurenge wa Gataraga, Ruberwa Roger yatangaje ko bishimye cyane inkunga yagenewe abaturage kuko izabafasha mu rugamba rwo kwesa imihigo.

Yagize ati “Twishimiye cyane ubufasha Tigo yaduhaye bwo kugurira mituweli abaturage 410. Iki gikorwa kizatuma abaturage bashobora kwivuza ku buryo bizadufasha no kwesa imihigo kugera ku 100%.Turashishikariza n’abandi bafatanyabikorwa bacu kurushaho kugera ikirenge mu cya Tigo kugira ngo tuzagere ku ntego yacu aho abaturage bose bazaba bafite mituweli.”

Ruberwa atangaza ko bishimira intambwe imaze guterwa mu gutanga umusanzu w’ubwisungane mu kwivuza.

Ati “Umwaka ushize twageze kuri 84% mu kugira mituweli, ubu dufite 60% kandi twizeye ko bizagenda neza."

Umunyamategeko wari uhagarariye Tigo muri iki gikorwa, Sandra Cyamweshi yashimangiye ko ibi bikorwa biri mu rwego rwo kurushaho kwegera abakiliya babo no kwifatanya n’Abanyarwanda muri gahunda ziteza imbere igihugu.

Yagize ati “Tigo ntikora ibijyanye n’itumanaho gusa ahubwo dutera inkunga ibikorwa byose bishimangira ndetse bigateza imbere igihugu. Twaganiriye n’abayobozi b’Akarere ka Musanze batubwira ko muri iyi Mirenge harimo ikibazo cy’abaturage badafite mituweli, dufata icyemezo cyo kuzibagurira. Iyi nkunga ituruka mu bakozi na Tigo nk’ikigo kugira ngo bereke abafatanyabikorwa babo ko bahari, bari kumwe kandi babitayeho.”

Abaturage batuye mu mirenge ya Gashaki na Gataraga bagaragaje ibibazo by’ubushoreke biri ku isonga y’ibituma bakena bitewe no kugira abana benshi, rimwe na rimwe bikabagora no kubishyurira ubwisungane mu kwivuza.

Sandra Cyamweshyi(ibumoso) wari uhagarariye Tigo ashyikiriza Meya wa Musanze, Musabyimana Jean Claude inkunga yo kugurira mituweli abaturage 410
Meya wa Musanze, Musabyimana Jean Claude yishimiye inkunga abaturage bahawe
Mu gikorwa cyo gutanga mituweli ku baturage batishoboye
Uhagarariye Polisi muri Musanze ashyikiriza umuturage mituweli
Uhagarariye ingabo mu Karere ka Musanze ashyikiriza umuturage mituweli
Abaturage bitabiriye umuganda ari benshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE