EALA izasubira ku mishinga itatu y’amategeko yanzwe na Tanzania

Yanditswe na Uwishyaka Jean Louis
Kuya 19 Werurwe 2017 saa 09:27
Yasuwe :
0 0

Inteko Ishinga Amategeko y’Umuryango wa Afurika y’Uburasirasirazuba (EALA) ivuga ko izakomeza imishinga itatu yanzwe na Tanzania muKwakira 2016.

Iyo mishinga irimo ushyiraho uburyo bwo guhererekanya amafaranga hifashishijwe ikoranabuhanga, ugena uburyo bwo guteza imbere umuco n’impano zitandukanye, wari witezweho guhanga imirimo mishya no gutanga akazi ku rubyiruko watanzweho na Dr James Ndahiro uhagarariye u Rwanda muri EALA n’ushyiraho uburyo bwo kurengera ibidukikije wazamuwe na Christophe Bazivamo nkuko The New Times ibitangaza.

Tanzania yasobanuye ko umushinga w’itegeko rigena uburyo bwo guhererekanya amafaranga hakoreshejwe ikoranabuhanga yawanze ivuga ko ibibazo bijyanye n’ubu buryo biri kwigwaho n’itsinda ryashyizweho na EAC kwiga uburyo bwo guhuza amategeko agamije gukumira ibyaha by’ikorabuhanga.

Iki gihugu kivuga ko kugira ngo itegeko iryo ari ryo ryose rijyanye n’uburyo bwo guhererekanya amafaranga hakoreshejwe ikoranabuhanga rishyirweho umukono, ari uko hagomba kubanza kugaragazwa icyuho kiri mu mategeko ya buri gihugu ku bijyanye n’iyi ngingo.

Tanzania kandi yasobanuye ko impamvu yanze kwemeza umushinga w’itegeko rishyiraho uburyo bwo guteza imbere umuco n’abafite impano zinyuranye ari uko hari aho rinyuranya n’ingingo zimwe na zimwe z’amasezerano ashyiraho umuryango wa EAC.

Depite Valerie Nyirahabineza uhagarariye u Rwanda muri EALA akaba n’Umuyobozi wa Komisiyo ishinzwe ubuhinzi, ubukerarugendo n’umutungo kamere, yavuze ko Tanzania yanze kwemeza umushinga w’itegeko rigena uburyo bwo kurengera ibidukikije, kubera ko hari ibindi bihugu binyamuryango bitemeje amasezerano arebana n’ibidukikije n’umutungo kamere.

Dr James Ndahiro avuga ko ibyo Tanzania yakoze ari urwitwazo kuko nta shingiro bifite. Ati ‘Nta mpamvu zihari zifatika, iyo imishinga y’itegeko izagaruka mu nama rusange mu gihe tugiye kwicara nka komite tuyisubiremo twongere tuyohereze.’

Ubusanzwe iyo umushinga w’itegeko wemejwe n’Inteko, umuyobozi wayo abimenyesha abakuru b’ibihugu akabasaba kuwemeza.

Umuyobozi wa EALA, Daniel Kidega, avuga ko kwemeza itegeko ari ingingo iba ihuriweho n’Inteko ubwayo n’abakuru b’ibihugu, bityo ko iyo umaze kwemezwa wohererezwa abakuru b’ibihugu by’uyu muryango kugira ngo bawemeze cyangwa se bakawanga.

Umushinga w’itegeko utemejwe nyuma y’amezi atatu wemerejwe mu Nteko rusange, ugarurwamo hagatangwa impamvu utemejwe ukongera ukigwa neza, ukemezwa ukongera ugasubizwa abakuru b’ibihugu.

Iyi mishinga y’amategeko yemejwe n’ibihugu nka Kenya, u Rwanda na Uganda, gusa ntiwajyanywe i Burundi nyuma y’aho Tanzania yari yangiye kuwushyiraho umukono.

Daniel Kidega uyobora EALA yavuze ko iyo umushinga w'itegeko utemejwe n'abakuru b'ibihugu ugaruka mu Nteko ugasuzumwa neza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244