Sosiyete za ‘betting’ ziteze kunguka akayabo mu gikombe cy’Isi

Yanditswe na Mukaneza M.Ange
Kuya 3 Kamena 2018 saa 03:10
Yasuwe :
0 0

Mu gihe hasigaye iminsi ibarirwa ku ntoki ngo Igikombe cy’Isi cya 2018 gitangire, Sosiyete zikora ibijyanye n’imikino y’amahirwe izwi nka ‘betting’ zatangaje ko zifite icyizere cyo kuzungukiramo akayabo.

Igikombe cy’Isi cy’umupira w’amaguru kigiye kuba ku nshuro ya 21, kizakinirwa mu Burusiya kuva tariki ya 14 Kamena kugeza ku ya 15 Nyakanga 2018; kizitabirwa n’amakipe 32 azaba ahatanira miliyoni zigera kuri 400 z’amadolari.

Mu gihe ikipe izegukana iri rushanwa izahabwa miliyoni 38 z’amadolari, sosiyete zikora ‘betting’ mu Rwanda kuri ubu zibarirwa muri eshashatu, nazo ngo zizeye kutazaviramo aho.

Nk’uko umwe mu bayobozi wa Lucky Bets wifuje ko amazina ye agirwa ibanga yabitangaje, bongereye umubare w’ibintu abantu bashobora kugeragezaho amahirwe yabo.

Ati “Abakiliya bacu bashobora no kugeragereza amahirwe ku ikipe iri bube iya mbere mu guhabwa ikarita y’umuhondo, ikipe iri butsinde mu minota 15 ya mbere, niba umukino uri bwongererwe iminota n’ibindi.”

Nubwo hari abiyumvisha ko iyi mikino ari uburyo bworoshye bwo kubona amafaranga, abayikina barimo bo bavuga ko kugira ngo utsindire amafaranga biba bitoroshye, ndetse bake aribo babasha kuyegukana.

Yagize ati “Bisaba ibintu byinshi n’umwanya wo gukora ubushakashatsi ku mikino n’amakipe wifuza kugeragerezaho amahirwe yawe. Ikindi ugomba kuvuga uko umukino uza kugenda ushingiye ku bushakashatsi. “

Umwe mu bakozi ba African Bets utifuje ko amazina ye atangazwa yabwiye The New Times, yavuze ko niyo nta mikino y’amakipe akomeye ihari, bo batajya bajya mu kiruhuko kuko iteka abantu bahora baza kugerageza amahirwe.

Ati “Tuvugishije ukuri turateganya kuzakorera amafaranga mu gikombe cy’Isi kubera ko atari buri gihe imikino nk’iyi komeye iba kandi shampiyona zikomeye zararangiye. Amahirwe yacu ni menshi ugereranyije n’izindi sosiyete kandi ndakeka ko aziyongera mu gihe igikombe cy’Isi kizaba kiri kuba.”

Uyu mukozi yavuze ko iyo hari imikino y’amakipe akomeye, buri mpera z’icyumweru bakira abaje gutega bagera ku 5000, muri bo hakaba harimo n’abashyura ibihumbi 500 ngo bagerageze amahirwe yabo. Muri aba ariko hari abagira amahirwe yo gutsindira nka miliyoni eshatu kandi yatanze 300 gusa.

Mu bagiye bagira amahirwe yo gutsindira amafaranga harimo nka Munyakazi Jean Claude watsindiye asaga miliyoni 156 Frw mu 2014, icyo gihe nyamara yari yakoresheje ibihumbi 600 by’Amanyarwanda gusa.

Minisiteri y’Ubucuruzi n’Inganda itangazo ko kugeza mu 2016, iyi mikino yinjirije igihugu asaga miliyari y’Amanyarwanda. Buri muntu ugiye gukina akatwa 15% by’umusoro, mu gihe ibigo bya ‘betting’ nabyo bitanga 13% by’ayinjijwe.

Amategeko y’u Rwanda ntiyemerere abafite munsi y’imyaka 18 gukina iyi mikino y’amahirwe.

Mu gihe hasigaye iminsi ibarirwa ku ntoki ngo Igikombe cy’Isi cya 2018 gitangire, Sosiyete zikora ibijyanye n’imikino y’amahirwe izwi nka ‘betting’ zatangaje ko zifite icyizere cyo kuzungukiramo akayabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza