Kwamamaza

Senateri Rutaremara yasubije Green Party ikomeje gusaba isaranganywa ry’ubutegetsi

Yanditswe kuya 15-09-2016 saa 10:21' na Rabbi Malo Umucunguzi


Itegeko Nshinga ry’u Rwanda, riteganya ko Umutwe wa Politiki ugomba gusaranganya ubutegetsi mu nzego za Leta hakurikijwe amahame remezo ateganywa naryo kandi bigakorwa ‘nta bwikanyize’.

Ishyaka Riharanira Demokarasi no Kurengera Ibidukikije, Democratic Green Party of Rwanda (DGPR) rivuga ko mu Rwanda hari ibikibura ngo ingingo y’isaranganya ry’ubutegetsi inozwe neza, nk’aho rivuga ko umukandida wigenga ushaka kuba umudepite asabwa amajwi angana n’ay’ishyaka.

Mu kiganiro cyatambutse kuri Flash FM kuri uyu wa Kane, Senateri Tito Rutaremara wo mu mutwe wa Politiki, FPR Inkotanyi n’Umunyamabanga Mukuru wa DGPR Ntezimana Jean Claude, bagaragaje ibitekerezo binyuranye ku buryo isaranganya ry’ubutegetsi rihagaze mu Rwanda.

Ntezimana yavuze ko no mu bihugu bimwe byimakaje demokarasi bitaba binoze, bikaba ari ikintu cyiza mu Rwanda kuba isaranganya ry’ubutegetsi riteganywa mu rwego rw’amategeko.

Ati “Ni ikintu cy’ingenzi cyane ariko ku bijyanye no kuvuga ngo ubutegetsi burasangiwe, twavuga ko hakenewe kongerwamo ingufu kuko hari ukuba biri mu mategeko, hari ukuba hari intambwe byashyizwe mu bikorwa, ariko tukavuga ngo ntabwo ari 100% tugendeye ku bisobanuro bya demokarasi.’’

“Gusaranganya ubutegetsi nabyo byisanga muri demokarasi kuko ni ubutegetsi bw’abaturage bose, ntabwo ari igice kimwe cyangwa umuntu runaka. Twavuga ngo hari ibyo dusaba twifuza ko byagerwaho nk’ibijyanye no kujya mu Nteko, aho twasabaga ko nk’umukandida wigenga ava ku majwi 5% asabwa nk’ay’umukandida w’ishyaka.’’

Green Party ivuga ko umukandida wigenga ushaka kuba umudepite yajya atorerwa ku majwi 2%, ndetse n’amafaranga bahabwa yo kwiyamamaza akajya atangwa mbere y’amatora aho kuba nyuma yayo.

Senateri Tito Rutaremara yavuze ko nka Green Party itangiye vuba idakwiye kuvuga ingingo yo gusaranganya ubutegetsi kandi itaranagaragaza binyuze mu matora ko hari abarwanashyaka bayiri inyuma.

Ati “Kugira ngo hasaranganywe ubutegetsi ni uko uba ufite n’abaturage uhagarariye bikagaragara. Bitari ibyo abantu babiri bakwishyira hamwe bati dufite ishyaka. Ni nabyo bizamo ibyo Green Party isaba ngo babahe amafaranga mbere, icyo gihe abantu batatu bajya hamwe bati dufite ishyaka nimuduhe amafaranga, nyuma bazabura abantu bakigendera.’’

Senateri Rutaremara yagarutse ku buryo isaranganywa ry’ubutegetsi mu Rwanda riteye, aho Itegeko Nshinga rishimangira ko ishyaka rya Perezida wa Repubulika ridashobora no gutanga Perezida w’Umutwe w’Abadepite.

Ati “Ngira ngo muzi ko harimo uwa PL (Donatille Mukabalisa]. Hanyuma ibindi, ishyaka ryatsinze amatora ntirigomba kurenza ba Minisitiri 50%, ibindi bikagabanywa n’abandi. Minisitiri w’Intebe si uwa FPR, ba Minisitiri Biruta n’abandi bose… bari muri PDI n’ahandi. Kandi gusaranganya ubutegetsi bikagira na buriya buryo bw’amatora bwemera n’abagore, urubyiruko, abamugaye, cyangwa nko muri Sena buzanamo abantu bahagarariye ibice bimwe nk’abarimu bakuru muri za Kaminuza,’’

Senateri Rutaremara ati " gusaranganya ubutegetsi ntibivuga ko buri Munyarwanda wese azategeka"

“Gusaranganya ubutegetsi ntibivuga ko buri Munyarwanda wese azategeka”

Senateri Rutaremara yavuze ko mu Rwanda ubutegetsi busaranganywa, mu gihe hari ibihugu nko muri Amerika, ishyaka ritsinda rigatwara byose naho utsinzwe agatahiraho, iyi politiki ngo u Rwanda rukaba ruyisangiye n’u Busuwisi.

Ati “Gusaranganya ubutegetsi ntibivuga ko buri Munyarwanda wese azategeka, iyo myanya ntiyaboneka. Kandi rero ntibivuga ko ishyaka ritangiye ritaranagerageza ngo rirebe ko rifite abantu mu matora… keretse nibura amatora abaye rikareba nibura ko rifite abantu ngo rirebe ko ryafatanya n’andi mashyaka kuyobora.’’

“Ubwo nka Green Pary, amatora natangira ikinjira mu matora, ikerekana ko ifite abarwanashyaka babo… ahandi mu gusaranganya ubutegetsi mu mirimo ya leta, muzi ko bakora ibizamini bitari ibya politiki. Icyo gihe bituruka ku wagiye atsinda, watsinda ukaba umunyamabanga aha, umutekinisiye hariya, ibyo ngibyo muba mubisangiye.’’

Ntezimana wa Green Party yavuze ko igihe bamaze bashinze ishyaka ari kimwe, ariko hanarebwa ku bikorwa by’ishyaka, ubushake bwa Politiki na gahunda ishyaka rishyize imbere kuko rigamije kubaka igihugu.

Ati “Amashyaka yose nta kindi aba abereyeho, aba atandukanye n’Imiryango itegamiye kuri Leta, aba ari gahunda y’ubutegetsi. Ubundi amashyaka yose yakabaye yoroherezwa n’igihe habayeho ayo matora kuko ntahoraho, ku buryo buri shyaka ryose ryoroherezwa… Ntabwo ari ukuvuga ngo uba urishinze ngo utunge ubuzima bwawe bwonyine,’’

Ntezimana yavuze ko amatora yenda kuba mu mwaka utaha hakazabanza aya Perezida wa Repubulika n’ay’ Inteko Ishinga Amategeko mu 2018, ku buryo hakwiye kurebwa niba umuhanda uzageza aya mashyaka atari na Green Party gusa, mu nzego z’ubutegetsi, uharuye cyangwa niba urimo imikuku.

Senateri Rutaremara ntakozwa igabanywa ry’amajwi Green Party isaba

Ku busabe bwa Green Party ko Umukandida uskaha kujya mu Nteko Ishinga Amategeko yajya atorwa ku majwi 2% aho gukomeza kuba 5%, Senateri Rutaremara yavuze ko bikozwe byaba nta butabera burimo, kuko hashyirwa imbere uwagize amajwi make.

Rutaremara yavuze ko hari ibihugu binini bifite n’amafaranga menshi bikagira n’abadepite benshi, ariko u Rwanda nk’igihugu gito gifite abadepite bake 80, imyanya igomba guhatanirwa.

Ati “ [Ukavuga ngo] Wowe injira watowe n’abaturage bake kandi ujye kuvugira abaturage benshi! Niba umubwiye 2%, ishyaka ryo rikabona 4% ntirizabona ujya mu nteko. Ubwo se usigaye kandi yaragize 4% wowe wabonye 2% ugiye mu nteko, wa wundi wakurushije we ntagiyeyo, urumva ko nta butabera buba burimo. Iyo umukandida yabikoze ni uko aba yizeye ko ashobora kuyabona (5%). Adashoboye kuyabona, niyinjire mu mashyaka arahari cyangwa ashinge irye.’’

Umunyamabanga Mukuru wa DGPR, Ntezimana Jean Claude

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 1 Ukwakira 2016
Copyright © 2009 -2014 - IGIHE Ltd - All Rights Reserved