Sena nshya izagaragaramo amasura mashya menshi

Yanditswe na Habimana James
Kuya 9 Kanama 2019 saa 09:33
Yasuwe :
0 0

Kuri uyu wa Gatanu tariki 9 Kanama 2019, niyo tariki ya nyuma yo gutanga kandidatire y’abakandida bazatorwa mu matora y’abasenateri ateganyijwe mu kwezi gutaha.

Komisiyo y’Igihugu y’Amatora (NEC), yagaragaje ko nubwo n’abasenateri basoje manda zabo bemerewe kongera kwiyamamaza, kugeza kuri uyu wa Kane bari batarakira kandidatire y’umwe muri aba.

Umunyamabanga Nshingwabikorwa wa Komisiyo y’Igihugu y’Amatora (NEC), Charles Munyaneza, yabwiye The New Times ko uburyo abantu bitabiriye gutanga kandidatire uyu mwaka bitari byarigeze bibaho.

Yagize ati “Buri Ntara ugiye kubara dufitemo abakandida barindwi, dufite abagore n’abagabo, abakuze n’abakiri bato.”

Yakomeje agira ati “Turahagarika kwakira kandidatire saa kumi n’imwe z’uyu wa Gatanu ariko kugeza ubu ntiturabona n’umwe mu bari basanzwemo ugaragaza ubushake bwo kongera kwiyamamaza.”

Gutanga kandidatire ku cyicaro cya NEC giherereye ku Kimihurura mu Mujyi wa Kigali, byatangiye tariki 22 Nyakanga uyu mwaka.

Munyaneza yagize ati “Kuba abatanze kandidatire ari benshi bigaragaza ko abantu batangiye kumenya uko Sena ikora, mbere babaga batazi uko ikora ariko ibyo tubona uyu munsi ni ikimenyetso cyiza no gushaka kumenya no gukorera igihugu.”

Munyaneza yavuze ko nyuma yo kwakira kandidatire, itegeko risaba NEC kuzigenzura.

Yavuze ko bakora raporo harimo imyirondoro yatanzwe, hakarebwa abatujuje ibisabwa, barangiza bakabyohereza mu Rukiko rw’Ikirenga mu minsi itatu nyuma y’umunsi watangiweho kandidatire.

Nyuma y’ibi, Urukiko rw’Ikirenga itegeko riruha iminsi itanu yo kugenzura izi kandidatire mbere y’uko rwohereza lisiti ya nyuma ku bemewe kwiyamamaza muri NEC.

NEC niyo ifite inshingano zo gutangaza abakandida bemewe.

Sena igizwe n’abasenateri 26 barimo 12 batorwa bahagarariye intara enye z’igihugu n’Umujyi wa Kigali, abasenateri umunani bashyirwaho na Perezida wa Repubulika.

Hari abasenateri bane bashyirwaho n’Ihuriro ry’imitwe ya Politiki yemewe mu Rwanda, umusenateri umwe uhagarariye amashuri makuru ya Leta n’undi umwe uhagarariye amashuri makuru yigenga.

Nkuko bigaragara ku ngengabihe nshya ya Komisiyo y’Igihugu y’Amatora, amatora y’abasenateri azaba guhera tariki 16 kugeza tariki 18 Nzeri 2019.

Umunyamabanga Nshingwabikorwa wa Komisiyo y’Igihugu y’Amatora (NEC), Charles Munyaneza ari kumwe na Perezida w'iyi Komisiyo Prof Kalisa Mbanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza